Published:Updated:

தத்தெடுத்தலுக்கும் மகப்பேறு விடுமுறை!

தத்தெடுத்தலுக்கும் மகப்பேறு விடுமுறை!
பிரீமியம் ஸ்டோரி
தத்தெடுத்தலுக்கும் மகப்பேறு விடுமுறை!

மாற்றம் நல்லதுவி.எஸ்.சரவணன்

தத்தெடுத்தலுக்கும் மகப்பேறு விடுமுறை!

மாற்றம் நல்லதுவி.எஸ்.சரவணன்

Published:Updated:
தத்தெடுத்தலுக்கும் மகப்பேறு விடுமுறை!
பிரீமியம் ஸ்டோரி
தத்தெடுத்தலுக்கும் மகப்பேறு விடுமுறை!

சென்னையில் ஐ.டி நிறுவனம் ஒன்றில் பணிபுரிகிறார் நதியா (பெயர் மாற்றப்பட்டுள்ளது). அவரின் கணவருக்கும் ஐ.டி பணிதான். இருவருக்கும் திருமணமாகி பல ஆண்டுகளாகியும் குழந்தை இல்லை. இருவரும் மனமொத்து ஒரு குழந்தையைத் தத்தெடுக்க முடிவு செய்கிறார்கள். ஒரே ஒரு பிரச்னை... வீட்டிலிருந்து குழந்தையைப் பார்த்துக்கொள்வது யார் என்பதுதான். இதற்காக யாராவது ஒருவர் வேலையை விட வேண்டியிருக்கும். ஆனால், வாங்கியிருக்கும் வீட்டுக்கடனுக்கான
இ.எம்.ஐ-யை நினைத்து முடிவைத் தள்ளிப்போட்டபடியே வந்தனர். இதை உடன் வேலைசெய்யும் நண்பர் ஒருவரிடம் சொல்ல, ‘மகப்பேறு விடுமுறைபோல, தத்தெடுப்புக்கும் நம் நிறுவனத்தில் விடுமுறை உண்டே!’ என்று தகவல் சொல்லியிருக்கிறார் அவர். சந்தோஷமாகி விட்டனர் நதியாவும் அவரின் கணவரும். ஆக, இன்னும் ஓரிரு மாதங்களில் நதியா வீட்டில் குழந்தையின் சிரிப்புச் சத்தம் கேட்கும்.

தத்தெடுத்தலுக்கும் மகப்பேறு விடுமுறை!

இந்தியாவில், குறிப்பிட்ட பெரு நிறுவனங்கள் குழந்தைத் தத்தெடுப்புக்கு விடுமுறை அளித்து வருகின்றன. இப்போது பல ஐ.டி நிறுவனங்களும் அதில் சேருகின்றன. சமீபத்தில் ‘அக்சன்ச்சர்’ நிறுவனம் இணைந்திருக்கிறது. அந்நிறுவனம், தன் ஊழியர்களுக்குக் குழந்தைத் தத்தெடுப்புக்கு ஏற்கெனவே அளித்துவந்த எட்டு வார விடுப்பை, இப்போது 22 வாரங்களாக நீட்டித்துள்ளது.

`‘இரண்டரை மாத கைக்குழந்தையைத் தத்தெடுத்தபோது...''

இரண்டு குழந்தைகளைத் தத்தெடுத்து வளர்த்துவரும் பெங்களூரைச் சேர்ந்த ஆராதனா, “குழந்தைத் தத்தெடுப்புக்காக ஐ.டி நிறுவனங்களில் விடுமுறை தருவது பெண்களுக்குச் சாதகமானது. குழந்தையைத் தத்தெடுக்க வேண்டும் என்பதால்தான், நான் பார்த்துக்கொண்டிருந்த வேலையை விட்டுவிட்டேன். இதுபோல எனக்கும் வசதியிருந்திருந்தால் வேலையிலேயே தொடர்ந்திருப்பேன். இரண்டரை மாதக் கைக்குழந்தையாக வீட்டுக்கு எடுத்து வந்தோம். எங்கள் மூத்த மகளை கவனித்துக்கொள்வதில் சிரமம் இருந்தாலும், பிரசவம் தரும் உடல் சார்ந்த பிரச்னைகள் இல்லை என்பதால் சமாளித்துக்கொண்டோம். ஆனாலும், குழந்தையோடு அம்மாவின் உறவு வலுப்பட அதிக நேரம் செலவழிக்க வேண்டியிருந்தது. அப்போதுதான், ‘என்ன சாப்பிட்டால் சளி பிடிக்கும், அதன் அறிகுறிகள் என்ன, எந்த நிலையில் மருத்துவரிடம் அழைத்துச்செல்ல வேண்டும்’ என குழந்தைகளின் உடல் இயக்கம் குறித்த புரிதல் கிடைக்கும்.

குழந்தை வளர வளர இன்னும் கூடுதல் கவனம்கொள்ள வேண்டியிருந்தது. என் முகத்தை நன்கு அடையாளம் கண்டுகொண்டதோடு, என் அருகிலேயே இருக்க வேண்டும் என அழுதது. அதற்காக என் வழக்கமான வேலைகளைத் தள்ளி வைத்தேன். இப்படி நிறைய!

சிலருக்கு மொழிப் பிரச்னையும் ஏற்படுவதுண்டு. என் தோழி மகாராஷ்டி ராவிலிருந்து மூன்று வயது குழந்தையைத் தத்தெடுத்துச் சென்றார். அந்தக் குழந்தையோடு உரையாடுவதில் தொடக்கத்தில் சிக்கல் இருந்தது. அப்படிப்பட்ட நேரங்களில் இதுபோன்ற விடுமுறை மிகவும் உதவியாக இருக்கும்” என்றார்.

‘`குழந்தையைத் தத்தெடுக்க கவுன்சலிங்கும் அவசியம்!”

‘`குழந்தைத் தத்தெடுத்தலுக்கு விடுமுறை கொடுப்பது போலவே கவுன்சலிங்கும் அவசியம்’’ என்கிறார் ஐ.டி நிறுவன ஊழியர் பாலாஜி. இவரின் அனுபவம் சற்று வேறுபட்டது. சமூகச் செயல்பாட்டுதளங்களில் இயங்கும் இவரும் இவர் மனைவியும் குழந்தை ஒன்றைத் தத்தெடுத்தனர். ஆனால், தொடர்ந்து வளர்க்க முடியவில்லை.

“சில தனிப்பட்ட பிரச்னைகளால் ஒரு வாரத்தில் குழந்தையைத் திருப்பி தந்து விட்டோம். அப்போது கற்றுக்கொண்ட விஷயங்கள் நிறையவே உண்டு. குறிப்பாக, தத்தெடுப்பவர்களுக்கு மனதளவில் கவுன்சலிங் அவசியம் தேவை. அப்போது தான் குழந்தை வளர்ப்பைச் சரியாக எதிர்கொள்ள முடியும்.

குழந்தை வளர்ந்ததும் அதனிடம் தத்தெடுத்ததைப் பற்றிச் சொல்வதா... வேண்டாமா? இது பெரிய விவாதம். சொல்வது என முடிவெடுத்துவிட்டால் எந்த வயதில் சொல்வது எனப் பல விஷயங்கள் இருக்கின்றன. அதற் கெல்லாம் மனதளவில் தெளிவுபெற கவுன்சலிங் தேவை” என்கிறார் பாலாஜி.

``வாடகைத்தாய் மூலம் குழந்தை பெறும்போதும் விடுமுறை!''


காப்பகத்துக்குச் சென்று தத்தெடுப்பது தவிர, வாடகைத் தாய் மூலம் குழந்தை பெற்றுக்கொள்பவர்களுக்கும் 22 வாரங்கள் விடுமுறை அளிக்கின்றன நிறுவனங்கள்.

சென்னையைச் சேர்ந்த அரசு அலுவலரான வித்யாவுக்கு, ஒரு குழந்தை பிறந்து இறந்து விட்டது. அதற்குப் பிறகு கருத்தரிக்காததால், வாடகைத் தாய் மூலம் குழந்தை பெற முடி வெடுத்தார். ஆனால், அவருக்குத் தேவையான விடுமுறை கிடைக்கவில்லை. நீதிமன்றத்தில் வழக்குத் தொடுத்து, தன் நிலையை விளக்கிய தும் சம்பளத்துடன் கூடிய விடுமுறை கிடைத் தது. ஏனெனில், மகப்பேறு விடுமுறைகள் வரையறுக்கப்பட்டதைப்போல வாடகைத் தாய் மூலம் பெறும் குழந்தையைக் கவனித்துக் கொள்வதற்கு என விடுமுறை நிர்ணயிக்கப் படவில்லை. இதுபோன்ற அடுத்தடுத்த வழக்குகளில், இப்போது வித்யாவின் வழக்கை முன்னிறுத்தி தீர்ப்புகள் தரப்படுகின்றன.

‘`ஒரே பாலினத் தம்பதிகள் தத்தெடுக்கும்போதும்...’’

வாடகைத் தாய் மட்டுமல்ல... ஒரே பாலினத் தம்பதிகள் தத்தெடுக்கும்போதும் இந்த விடுமுறை விதி பொருந்தும். ‘கோத்ரேஜ்’ நிறுவனத்தின் விழா ஒன்றில், `எங்களின் செயல்திட்டம் புதுமையானது. இரண்டு ஆண்கள் சேர்ந்து ஒரு குழந்தையைத் தத்தெடுக்க முன்வந்தாலும் அவர்களுக்கும் மகப்பேறு விடுப்பு அடிப்படையில் விடுப்பு அளிக்கிறோம்' என்று அந்நிறுவனத்தின் மனிதவளத் துறையின் மேலதிகாரி சுமீத் மித்ரா தெரிவித்தார்.

தத்தெடுத்தலுக்கும் மகப்பேறு விடுமுறை!

சென்ற ஆண்டில் 70% தனியார் நிறுவனங்கள் இந்த விடுமுறையை நடைமுறைப்படுத்துவதில் ஆர்வமும் ஒத்துழைப்பும் காட்டியுள்ளதாக ஓர் ஆய்வு சொல்கிறது.

‘`தத்தெடுப்பதற்கு முந்தைய கால விடுமுறையும் அவசியம்!”


சேலத்தைச் சேர்ந்த குழந்தைகள் பாதுகாப்பு அலுவலர் நா.இந்திரஜித் சொல்கிறார்...

“தத்தெடுத்தலுக்கான விடுமுறைத் திட்டம் ஐ.டி நிறுவனங்களில் விரிவுபடுத்தப்பட்டிருப்பது வரவேற்கப்பட வேண்டியது. ஐ.டி என்பதால் ஐரோப்பிய நாடுகளில் உள்ளதைப் போல  விதிமுறைகள் வகுத்திருப்பதாகத் தெரிகிறது. அதனால்தான், வாடகைத் தாய், லிவிங்  டுகெதர் உள்ளிட்டவற்றை இணைத்திருக்கிறார்கள்.

குழந்தையைத் தத்தெடுப்பதற்கு முந்தைய நாள்களில் விடுமுறை அவசியமா என்று சிலர் கேட்பார்கள். அது மிகவும் அவசியம். சம்பந்தப்பட்ட தம்பதி தங்கள் குடும்பத்தினரைத் தத்தெடுத்தல் முறைக்கு முழுமையாகச் சம்மதிக்க வைக்க வேண்டும். தவிர, குழந்தையை எதிர்கொள்ளும் பக்குவத்துக்கு முதலில் அந்தத் தம்பதி மனதளவில் தயாராக வேண்டும். அதற்கான பயிற்சிக்காகத் தத்தெடுப்புக்கு முன் விடுமுறை தேவை. அதன்பின், குழந்தையைப் பராமரிக்கவும் நெருக்கமான உறவைப் பேணவும் விடுமுறை வேண்டும்.

மகப்பேறுக்கு அரசு கொடுக்கும் விடுமுறை யைப் போல, தத்தெடுத்தலுக்கும் 240 நாள்கள் விடுப்பு கொடுக்கும்பட்சத்தில் தாய்க்கும் சேய்க்குமான உறவு பலப்பட உதவும். மேலும், குழந்தையைக் கையாளும் பயிற்சிகளை அளிக்கவும் இந்நிறுவனங்கள் முன்வர வேண்டும்” என்கிறார் இந்திரஜித்.

இந்த உலகில் எந்தக் குழந்தையும் உணவின்றி பசித்திருக்கக் கூடாது என எல்லோரும் நினைப்போம்... அதேபோல எந்தக் குழந்தையும் உறவின்றியும் வாழக் கூடாது என விரும்புவோம்!