Published:Updated:

வீட்டிலேயே செய்யலாம் வெற்றிகரமான தொழில்கள் - ரூம் ஸ்பிரே - 500 ரூபாய் முதலீட்டில் அசத்தல் லாபம்!

வீட்டிலேயே செய்யலாம் வெற்றிகரமான தொழில்கள்  - ரூம் ஸ்பிரே - 500 ரூபாய் முதலீட்டில் அசத்தல் லாபம்!
பிரீமியம் ஸ்டோரி
News
வீட்டிலேயே செய்யலாம் வெற்றிகரமான தொழில்கள் - ரூம் ஸ்பிரே - 500 ரூபாய் முதலீட்டில் அசத்தல் லாபம்!

சாஹா, படங்கள்: தே.அசோக்குமார்

வாசனை சூழ வாழ யாருக்குத்தான் பிடிக்காது? நல்ல நறுமணம்... உறைவிடத்தை மட்டுமன்றி, உள்ளத்தையும் ரம்மியமாக மாற்றும். ஊதுவத்தியோ, சாம்பிராணியோ சில நிமிடங்கள் மட்டுமே நறுமணம் பரப்பும். தரையைச் சுத்தம் செய்கிற திரவங்கள் கூடுதலாகச் சில நிமிடங்கள் மணம் வீசலாம். பல மணி நேர நறுமணச் சூழலுக்கு ரூம் ஸ்பிரேக்கள்தான் தீர்வு. அதிலும் ஏசி அறைகளிலேயே பெரும்பாலான நேரத்தைக் கழிக்கிறவர்களுக்கு இருப்பிடத்தைச் செயற்கையாக நறுமணமூட்டுவதைத் தவிர வேறு வழியில்லை.

ஆபத்தில்லாத கெமிக்கல்களைக்கொண்டு, வீட்டிலேயே விதம் விதமான நறுமணங்களில் ரூம் ஸ்பிரே தயாரிக்கக் கற்றுத்தருகிறார் சென்னை அரும்பாக்கத்தைச் சேர்ந்த கலைச்செல்வி.

‘`பதினஞ்சு வருஷங்களுக்கு மேல் பினாயில், லிக்விட் சோப், ஹேண்ட் வாஷ், ஃப்ளோர் கிளீனர் தயாரிக்கிற பிசினஸைப் பண்ணிக்கிட்டிருக்கேன். அதுல ஒரு பிரிவுதான் ரூம் ஸ்பிரே தயாரிப்பு. பினாயிலும் ஃப்ளோர் கிளீனரும் ஆர்டர் கொடுக்கிற பலரும் ரூம் ஸ்பிரேயும் சேர்த்துக் கொடுத்தா நல்லாருக்கும்னு கேட்டாங்க.

வீட்டிலேயே செய்யலாம் வெற்றிகரமான தொழில்கள்  - ரூம் ஸ்பிரே - 500 ரூபாய் முதலீட்டில் அசத்தல் லாபம்!

இன்னிக்குக் கடைகள்ல கிடைக்கிற ரூம் ஸ்பிரே எல்லாம் காஸ் நிரப்பினது. அது சிலருக்குச் சுவாசப் பிரச்னைகளை ஏற்படுத்தலாம். கடைகள்ல கிடைக்கிற ஸ்பிரேக்கள்ல இன்னொரு பிரச்னை, அவற்றின் வாசனை. ஸ்டாண்டர்டா சில வாசனைகள்லதான் ஸ்பிரேக்கள் கிடைக்கும். அதைத் தாண்டி சில வாசனைகள் சிலருக்குப் பிடிக்கலாம். வீட்டுலேயே நாமே தயாரிக்கிறபோது அப்படி நம்ம விரும்பற வாசனையில தயாரிக்க முடியும். கொஞ்சம் ஸ்ட்ராங்கா வேணும்னாலோ, மைல்டா வேணும்னாலோ அதுக்கேத்தபடி வாசனையை அட்ஜஸ்ட் செய்துக்கலாம்’’ என்கிற கலைச்செல்வி, ஃப்ரூட் மஸ்க், கார்டன் ப்ளூம், லெமன், ஆரஞ்சு, ஜாஸ்மின் எனப் பிரத்யேக மணங்களில் ரூம் ஸ்பிரே தயாரிக்கிறார்.

‘`காஸ் சேர்க்காமல் தயாரிக்கிறதால, இந்த லிக்விட் ஸ்பிரே 4 முதல் 5 மணி நேரம் வரை வாசனையை அப்படியே இருக்கச் செய்யும். ஸ்ட்ராங்கான வாசனை வேணும்னு கேட்கறவங்க ஃப்ரூட் மஸ்க், ஜாஸ்மின் மாதிரி வாசனைகளைத் தேர்ந்தெடுக்கலாம். மைல்டா இருக்கணும்னா லெமன் தேர்ந்தெடுக்கலாம். ராத்திரி தூங்கற நேரத்துல லாவண்டர் உபயோகிக்கலாம். அது நல்ல தூக்கத்தையும் கொடுக்கும். காலை நேரத்துக்கு சாண்டல் யூஸ் பண்ணலாம். காஸ் சேர்த்துத் தயாரிக்கிற ஸ்பிரேக்கள்ல வெறும் வாசனை மட்டும்தான் வெளியில வரும். லிக்விட் வெளியில தெரியாது.  ஆனா, நான் தயாரிக்கிற ஸ்பிரேக்கள்ல லிக்விட் வெளியில வரும். ஆனா, உடனே ஆவியாகிடும். சுவர்ல கறையாகுமோங்கிற பயம் வேண்டாம்...’’ - நல்ல தகவல்கள் பகிர்கிறவர், வெறும் 500 ரூபாய் முதலீட்டில் இந்தத் தொழிலில் ஈடுபட பெண்களுக்கு நம்பிக்கை தருகிறார்.

அக்வா மிக்ஸ், பெர்ஃப்யூம், ஸ்பிரே பாட்டில்கள் என எல்லாவற்றுக்குமான செலவுகள் இந்த 500 ரூபாய் முதலீட்டில் அடக்கம். இந்தப் பொருள்கள் எல்லா மாவட்டங்களிலும் எளிதாகக் கிடைக்கின்றன.

‘`ஒரு லிட்டர் ரூம் ஸ்பிரே தயாரிக்க நமக்கான அடக்க விலை வெறும் 100 ரூபாய்தான். அதையே நாம 200 ரூபாய் வரை விற்கலாம். கால் லிட்டர், அரை லிட்டர் பாட்டில்களும் விற்கலாம். வெறும் அரை மணி நேரத்தில் 20 லிட்டர் வரை தயாரிக்கலாம். ஒரே நாளில் நாலஞ்சு வகையான ரூம் ஸ்பிரேக்களுக்கு ஆர்டர் இருந்தாலும் பிரச்னையில்லை. ஒன்றோடு ஒன்று வாசனை கலக்காதபடி சில நுணுக்கங்களைக் கத்துக்கிட்டா போதும்...’’ - கலக்கலாகச் சொல்கிற கலையிடம் ஒரே நாள் பயிற்சியில் 500 ரூபாய் கட்டணத்தில் ரூம் ஸ்பிரே தயாரிக்கக் கற்றுக்கொள்ளலாம். ``அடிப்படை நுட்பங்கள் மட்டும்தான் முக்கியம். அவற்றை வைத்துப் பதினைந்துக்கும் மேலான வாசனைகளில் ரூம் ஸ்பிரே தயாரிக்கலாம்’’ என்கிறார் கலைச்செல்வி.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz