"தீபாவளி வந்துடுச்சு...
துணிமணி எடுக்க எங்க போறது...?"
"நம்ம தி.நகருக்குத்தான்!"
"நகை வேற வாங்கணுமே?’’
'தி.நகருக்கே போ!"
"அப்ப மெஹந்தி போட..!"
"அதுக்கும் தி.நகர்தான்!"

"என்னது... மெஹந்தி போடுவதற்குகூட தி.நகருக்குத்தான் போக வேண்டுமா!" என்று ஆச்சர்யப்படுகிறீர்களா...?

துணிகள், நகைகள், வீட்டு உபயோகப் பொருட்கள், இனிப்புகள், பட்டாசுகள் என்று சென்னை, தி.நகர் பகுதியே பரபரத்துக் கொண்டிருக்க... அவற்றுக்கு சற்றும் சளைக் காத ஒன்றாக பளீரிட்டுக் கொண்டிருக்கிறது 'பிளாட்பார மெஹந்தி'! குமரன் சில்க்ஸின் எதிரே, பனகல் பார்க் ஓரமாக இருக்கும் பிளாட்பாரத்தில் வடநாட்டு இளைஞர்கள் சிலர் வரிசையாக உட்கார்ந்திருக்க... 'நான், நீ' என்று கையை நீட்டியபடி அவர்களிடம் மெஹந்தி போட்டுக் கொள்வதற்காக அலைமோதுகிறது பெண்கள் கூட்டம்!

பொதுவாக.... தீபாவளி, பொங்கல், திருமணம் என்று விழாக்கள் வருகின்றன என்றாலே... பெண்கள் பரபரக்க ஆரம்பித்துவிடுவார்கள். காலை முதல் மாலை வரை அத்தனை வேலைகளையும் இழுத்துப் போட்டுக்கொண்டு செய்து முடித்தாலும்... கையில் மருதாணி போட்டுக் கொள்ளவில்லை என்றால்... அந்த விசேஷமே அவர்களுக்கு சிறக்காது.

அத்தனை வேலைகளுக்கு நடுவேயும்... முந்தைய நாளே எப்பாடுபட்டாவது மருதாணி இலைகளைப் பறித்து வந்து, இரவோடு இரவாக கொட்டைப்பாக்கு, யூகலிப்டஸ் ஆயில் இன்னும் இத்யாதிகளையெல்லாம் சேர்த்து அரைத்து உள்ளங்கைகள், பாதங்கள், விரல்கள் என்று அப்பிக் கொண்டு... இரவு முழுக்க தூங்காமல் கண்விழித்து... 'சிவந்துவிட்டதா...?' என்று அவ்வப்போது ஒரு ஓரமாக அதைப் பெயர்த்துப் பார்த்து... சிவக்காவிட்டால், 'உனக்கு பித்த உடம்பு, அதனால சிவக்காது' என்று சமாதானம் சொல்லிக் கொண்டு... அதெல்லாம் அந்தக் காலம்!

ஆனால், இப்போதெல்லாம் சமைக்கக்கூட நேரமில்லை எனும் அளவுக்கு 'ரெடிமேடு' கலாசாரம் ஆக்டோபஸாக ஆக்கிரமித்துவிட்ட பிறகு, மருதாணி இலையாவது... மண்ணாங்கட்டியாவது!

ஒரு பெண்ணின் கையில், மெஹந்தி கோன் கொண்டு கலைமேளா நிகழ்த்தியபடியே நம்மிடம் பேசிய சிவாமேரி எனும் இளைஞர், "எங்களுக்கெல்லாம் சீனியர்... சிவம். இரண்டு ஆண்டுகளுக்கு முன் பிழைப்புத் தேடி சென்னை வந்தார். சரியான வேலை கிடைக்கவில்லை. உடனே, தி.நகர் பகுதியின் ஓரிடத்தில், 'மெஹந்தி போட்டு விடப்படும்' என்று போர்டை போட்டார். இப்போது, தி.நகர் ஏரியாவில் மட்டுமே ஐம்பதுக்கும் மேற்பட்டவர்கள் மெஹந்தி போட்டுவிடும் தொழிலைச் செய்து கொண்டிருக்கிறோம்" என்று குஷியோடு சொன்னார்.

ஒரு பெண்ணின் கைகளில் முதலில் ஒருவித ஆயிலைத் தடவிவிட்டு, அதில் மெஹந்தி போட ஆரம்பித்த வினோத், '‘இது மெஹந்தி ஆயில். இதைத் தடவினால், நன்கு சிவப்பதோடு, டிசைன்கள் சீக்கிரம் அழியாமலும் இருக்கும். இங்கே கிடைக்கும் மெஹந்தி கோன்கள் அவ்வளவாக சிவப்பதில்லை. அதனால் டெல்லியிலிருந்தே வரவழைக்கிறோம். எங்களிடம் டெல்லி, அரேபியன், பாம்பே, ராஜஸ்தானி என்று நிறைய டிசைன்கள் இருக்கின்றன. அரேபியன் டிசைன் பார்ப்பதற்கு மிகவும் அழகாக இருக்கும். இதைத் தவிர... பிள்ளையார், சிவன் என்று கஸ்டமர்களின் விருப்பத்துக்கு ஏற்பவும் போட்டு விடுவோம். இரு கைகளின் இரு பகுதியிலும் போட்டு விடுவதற்கு 300 ரூபாய். இரண்டு கால்களுக்கு 200 ரூபாய். ஆக மொத்தம் 500 ரூபாய் வாங்குகிறோம். இதைத் தவிர, படங்கள், ஓவியங்கள் என்று நுணுக்கமான வேலைப்பாடுகள் இருந்தால்... அதற்கு தக்கவாறு ஆயிரம் ரூபாய்க்கு மேல்கூட வாங்குவோம்" என்று சொல்லிக்கொண்டே, மயக்கும் டிசைனைப் போட்டு அசத்தினார் இரண்டு நிமிடங்களில்.

"உக்காருங்க", "கை நீட்டுங்க", "பரவாயில்லை" - இந்த மூன்று தமிழ் வார்த்தைகளை மட்டுமே தெரிந்து வைத்துக் கொண்டு சக்கை போடு போடுகிறார்கள்.

- ரேவதி
படங்கள் எம்.உசேன்