பொங்கல் லீவ்ல டி.வி. முன்னாடி உட்கார்ந்து, தண்டமா சாப்பிட்டுத் தூங்கிட்டு இருக்காம, சேனல் ஏரியாவுக்கு விசிட் போனா இந்த சின்சியர் ரீட்டா. மங்களகரமா முதல்ல என்ட்ரி தந்தது, சீனியர் மேடம் லட்சுமி வீட்டுக்கு. கலைஞர் டி.வி-யில 'மகாலட்சுமி' சீரியல்ல மேடம்தான் மகாலட்சுமி!

'சீரியலில் முதன் முறையாக'ங்கற டைட்டில் கார்டோட வந்திருக்கற லட்சுமிகிட்ட, ''ரொம்ப நாளைக்கு முன்ன 'கதையல்ல நிஜம்'னு வந்தீங்க. அதோட 'காணவில்லை' கார்டு போட வெச்சுட்டுப் போயிட்டீங்களே மேடம்?"னு கேட்டா, படபடனு வந்து விழுந்தது பதில்.

"எனக்குத் தமிழ் சினிமாவுல ஒரு இடைவெளி ஏற்பட்டாலும், கன்னடம், தெலுங்கு, மலையாளம்னு மத்த மொழிப்படங்கள்ல நிறைய சான்ஸ் வந்தது, வந்திட்டிருக்கு ரீட்டா. கூடவே, கன்னடத்துல 'கதையல்ல நிஜம்' நிகழ்ச்சியையும் பண்ணிட்டு இருக்கேன். இப்போ இந்த சீரியல்!"னு சொன்ன மேடம்கிட்ட,

"பெரும்பாலும் மனைவி, அக்கா, அண்ணினு நடுத்தர வயதுப் பெண்களை சீரியல் ஹீரோயின் ஆக்கறதுதான் சேனல் இலக்கணம். ஆனா, இந்த சீரியல்ல வித்தியாசமா வயசான 'அம்மா' கேரக்டரை ஹீரோயின் ஆக்கியிருக்காங்களே...?"னு சீரியல் ரசிகப் பெருமக்களின் ஆச்சர்யத்தை கேட்டேன்.

"அது புரொட்யூஸர் சாய்ஸ்! அதைப்பத்தி நீ அவர்கிட்டதான் கேட்கணும் ரீட்டா!"னு கைகாட்ட, அட, லட்சுமி மேடத்தோட கணவர் சிவச்சந்திரன் சார்தான் கதை, திரைக்கதை, வசனம், புரொடக்ஷன் மற்றும் கிரியேட்டிவ் ஹெட்!

"அப்போ... இது ஒரு 'குடும்ப' சீரியலா சார்..?"னு சிவச்சந்திரன்கிட்ட கேட்க,

"எக்ஸாட்லி ரீட்டா! ஒரு டாக்டர் பெண். அவங்களோட போலீஸ் கணவர். அந்தத் தம்பதிக்கு ரெண்டு பொண்ணு, ரெண்டு பையன். இந்த வாரிசுங்களுக்கு மத்தவங்க மூலமா நடக்கற கெடுதல்கள்ல இருந்து, அந்தத் தம்பதி எப்படி காப்பாத்தறாங்கங்கிறதுதான் கதை.

இதுல ஒரு விஷயத்துக்கு நான் கேரன்ட்டி ரீட்டா. 'இப்படித்தான் கதை நகரப் போகுது'னு யாராலயும் கணிக்க முடியாது. காமெடி, அதிரடி, க்ரைம், சென்ட்டிமென்ட்னு கலந்து கட்டின கலவை இது. அப்பறம் இன்னொரு விஷயம்... லட்சுமிக்கு கணவரா வர்ற அந்த போலீஸ் கேரக்டரை நான்தான் பண்றேன்!"னு சிவச்சந்திரன் சிரிக்க,

"இப்போ எங்க பொண்ணு சம்யுக்தா ஐந்தாவது படிக்கறா. இப்படி சீரியல்ல ரெண்டு பேரும் பிஸியாயிட்டதால அவள கவனிக்காம விட்டுடக் கூடாதுங்கறதுல ரொம்ப கவனமா இருக்கோம்!"னு வளர்ப்பு மகள் பற்றி கோரஸா பூரிச்சாங்க அந்த 'சீ'ரியல்' தம்பதி!

ஜோடி நம்பர் ஒன்!

'இளமை புதுமை'னு கலக்கிட்டிருந்த அர்ச்சனா கல்யாணம், குழந்தைனு கேப் விட்டுட்டு... மறுபடியும் விஜய் டி.வி. 'கலக்கப்போவது யாரு - ஜூனியர்'ல ஜட்ஜா வந்து சிரிச்சுட்டு இருக்காங்க.

"அப்டியே இருக்கீங்க மேடம்! கொஞ்சம் (!) குண்டாயிட்டீங்க!"னு சொன்னா,

"நீ டைரக்ட்டாவே என்னைக் கிண்டல் பண்ணியிருக்கலாம்!"னு சிரிச்சாங்க சிரிப்பு ஜட்ஜ்!

"சின்னத்திரை ரீ-என்ட்ரி ஓகே. ஆனா, பிக் எஃப்.எம்-லயும் தொகுப்பாளினியா கலக்க ஆரம்பிச்சுட்டீங்களே?!"னு ஆச்சர்யத்தோட கேட்டேன்.

"டி.வி. ஷோல ஜட்ஜா வர்றதாலயோ என்னவோ, அந்த மரியாதையால இப்போ எனக்கு காம்ப்யரிங் ஆஃபர் எதையும் கண்ணுக்கு எட்டின தூரம் வரை காணோம். அப்போதான் பிக் எஃப்.எம்-ல ஆர்.ஜே வாய்ப்பு வந்தது. சந்தோஷமா ஒப்புக்கிட்டேன். ஒரு ரேடியோ தொகுப்பாளினியாவும் என்னால ஹிட் அடிக்க முடிஞ்சதுல, ரொம்பவே சந்தோஷம் எனக்கு!"னு சொன்ன அர்ச்சனா, பிக் எஃப்.எம்-மோட 'கமான் சென்னை' நிகழ்ச்சியின் ஆர்.ஜே மட்டுமில்ல... புரொக்ராம் புரொட்யூஸரும்கூட! கூடவே, 'உற்சவ் ஈவன்ட்ஸ் பிரைவேட் லிமிடெட்'னு ஒரு ஈவன்ட் மேனேஜ்மென்ட் கம்பெனியையும் நடத்திட்டு இருக்காங்க.

"என் ஹஸ்பண்ட் நேவியில இருக்கறதுனால நாடு நாடா சுத்திட்டு இருக்கார். நானும் என் ரெண்டரை வயசுப் பொண்ணும், சென்னையில அம்மா வீட்டுல இருக்கோம். என் பொண்ணு ஜாராகிட்ட 'உன் பேர் என்ன?'னு கேட்டா, 'ஸ்நேக் பாபு'னு சொல்றா! அந்தளவுக்கு காமெடி ஷோ ரசிகை அவ!"னு பெருமைப்பட்டாங்க அர்ச்சனா!

அம்மா பொண்ணு!

பிரஜன் - சாண்ட்ரா தம்பதி வீட்ல அன்னிக்கு ஒரு காபி விசிட் கிடைச்சுது.

"என்ன சாண்ட்ரா... 'ரோஜா கூட்டம்', 'தங்கம்', 'ஜோடி நம்பர் ஒன்', 'அசத்தப்போவது யாரு'னு சேனல் ஏரியால ரொம்ம்ம்ப பிஸியாகிட்டீங்களே!"னு கேட்டா,

"ஆமா ரீட்டா! ஒவ்வொரு வாய்ப்பா வரவர, எனக்கும் ரொம்ப சந்தோஷமா இருந்தது. இடையில ஜாண்டீஸ்ல ரொம்பவே கஷ்டப்பட்டதால, எபிஸோட் கமிட்மென்ட்கள் கழுத்தை நெருக்கிடுச்சு. அதனாலதான் 'தங்கம்' சீரியல்ல இருந்துகூட விலக வேண்டியதாயிருச்சு. பட்... இப்போ நான் மறுபடியும் ஃப்ரெஷ்ஷா ரெடி ஆயிட்டேன்!"னு புத்துணர்ச்சியோட பேசின சாண்ட்ரா,

"சென்னை ஆடியன்ஸ்ல பல பேரு ரொம்ப ஸ்வீட்! எங்க பார்த்தாலும் 'ஏய்... சாண்ட்ரா! பிரஜன் எப்படி இருக்கார்?!'னு ஓடி வந்து பேசறாங்க. ஐ லவ் சென்னை!"னு சந்தோஷப்பட்ட இந்த கேரள சேச்சிகிட்ட,

"பிரஜன் எப்படி இருக்கார்?!"னு நானும் விசாரிக்க,

"ரொம்ப சூப்பரா இருக்கார்! அவர் சினிமா முயற்சிகள்ல தீவிரமா இருந்ததால சின்னத்திரையில கவனம் செலுத்த முடியாம இருந்தார். தெரியுமா... இந்த நியூ இயர் எங்களுக்கு ரொம்பவே ஸ்பெஷல். யெஸ்! இந்த மார்ச் மாசம் பிரஜன் நடிச்ச 'முள்ளும் மலரும்' படம் ரிலீஸ்!"

- அவ்ளோ சந்தோஷம் வழிஞ்சிச்சு சாண்ட்ரா கண்கள்ல!

கலக்குங்க!