ஏர்லி மார்னிங் எய்ட் ஓ கிளாக் எழுந்து, அம்மா கொண்டுவந்து கையில கொடுக்கற காபியை சாப்பிட்டுட்டு, நிதானமா குளிச்சுட்டு, வார்ட்ரோப்ல ரெடியாயிருக்கற சுடிதாரை மாட்டிட்டு, டைனிங்டேபிள்ல ரெடியா இருக்கறத சாப்பிட்டுட்டு, காலேஜ் பஸ் ஏறுறதுதான் பெரும்பாலான சிட்டி, பட்டிதொட்டி கேர்ள்ஸோட வழக்கம்.

ஏதாவது ஒருநாள், ''அப்படியே அந்த தட்டை சிங்க்ல கொண்டு போய் வெச்சுட்டு போம்மா...'' என்று அம்மா தப்பித் தவறி சொன்னால்கூட... ''அடச்சே... இதுக்குத்தான் இன்ஜினீயரிங் படிக்கிறேனா...?'' என்று அலுப்பு காட்டுவது தனிக்கதை!

இதோ... இந்த நாலு பெண்களும் படிப்பது அதேமாதிரியான டிகிரிதான். ஆனால், அம்மா, அப்பாவை மட்டுமல்ல... குடும்பத்தையே தலையில் வைத்துத் தாங்கிக் கொண்டு, எல்லா வேலைகளையும் இழுத்துப்போட்டுக் கொண்டு, படிப்பையும் தொடர்கின்றன கிராமத்திலிருந்து புறப்பட்டிருக்கும் இந்த நம்பிக்கை நட்சத்திரங்கள்!

படிப்பு வாசமே இல்லாத பெற்றோர்களை, எண்பது சதவிகிதத்துக்கு மேல பர்சன்டேஜ் மெயின்டெய்ன் பண்ணி மனசு குளிர வைக்கற படிப்பாளிகள்தான் நால்வருமே. பட், அவங்களோட 'லைஃப் ஸ்டைல்' எவ்ளோ எளிமையா, சுமையா, பொறுப்பா இருக்கு பாருங்க...

முத்துமாரி, இரண்டாம் ஆண்டு பி.எஸ்சி., ஜெயராஜ்-அன்னபாக்கியம் கலைக் கல்லூரி, பெரியகுளம்

"அப்பா மண்ணு வெட்டறார். அம்மா பணியாரம் விக்கறாங்க. நான் ஒரே பொண்ணுங்கறதால ஆசைப்பட்டு, கஷ்டப்பட்டு கம்ப்யூட்டர் சயின்ஸ் படிக்க வைக்கறாங்க. தினமும் காலையில நாலு மணிக்கு எழுந்து வாசல் தெளிச்சுட்டு, பணியாரத்துக்கு மாவு ஆட்டிக் கொடுத்துட்டு, பாத்திரங்கள வெளக்கிட்டு காலேஜுக்கு கிளம்பிப் போவேன். சாயங்காலம் காலேஜ் விட்டு வந்தவொடன ராத்திரிக்கு சமைச்சு வெச்சுட்டு, பாத்திரங்கள வெளக்குவேன்.

காலேஜுக்குப் போடறதுக்கு ரெண்டு செட் டிரெஸ்தான் இருக்குங்கறதால, அதை துவைச்சுப் போட்டுட்டு படிக்க உட்காருவேன். லீவ் நாள்ல அம்மாகூட சேந்து பணியாரம் வைப்பேன். இப்போ 88% பர்சன்டேஜ் வெச்சுருக்கேன். இந்த செமஸ்டர்ல இன்னும் நல்லா படிக்கணும்!"

செல்லாயி, இரண்டாம் ஆண்டு டி.எம்.எல்.டி., அரசு மருத்துவக்கல்லூரி, தேனி

"அப்பாவும் அம்மாவும் கூலி வேலைக்குப் போறாங்க. அவங்க வெள்ளன கிளம்பிப் போகணுங்கறதால காலையில நான்தான் சோறு ஆக்கி, தம்பி, தங்கச்சிய ஸ்கூலுக்கு கிளப்பி விடுவேன். சாயங்காலம் அஞ்சு மணிக்கு காலேஜ் முடிச்சு வந்தவொடன துணி துவைச்சுட்டு, வீட்டு வேலைகள முடிச்சுட்டு தம்பி, தங்கச்சிக்கு பாடம் சொல்லிக் கொடுத்துக்கிட்டே நானும் படிச்சுக்குவேன். சனி, ஞாயிறுல எங்கம்மாகூட சேர்ந்து கூலி வேலைக்குப் போவேன். நல்லா படிச்சு, நல்ல வேலை கிடைச்சு, அம்மா, அப்பாவுக்கு அதுக்கு அப்புறமாச்சும் ஓய்வு கொடுக்கணும். என் தம்பி, தங்கச்சியப் படிக்க வைக்கணும்!"

செல்வி, முதலாமாண்டு பி.காம்., அம்மன் கலை அறிவியல் கல்லூரி, திண்டுக்கல்

"ட்வெல்த்ல நான் 1,050 மார்க். இன்ஜினீயரிங் படிக்கணுங்கற கனவுல இருந்தேன். ஆனா, 'படிக்க வைக்க வசதியில்ல. மில் வேலைக்குப் போ'னு வீட்டுல சொல்லிட்டாங்க. 'நான் படிக்கணும்' நான் அழுகையா அழுக, ஒருவழியா அங்கயிங்கனு வட்டிக்கு வாங்கி இப்போ என்னை காலேஜ்ல சேர்த்து விட்டிருக்காங்க எங்கப்பா.

காலையில நான் நாலரை டு ஆறு மணி வரைக்கும் படிப்பேன். அப்பறம் எங்க குடிசை வீட்டைக் கூட்டி, சமைப்பேன். எனக்கும், கூலி வேலைக்குப் போயிருக்க எங்கப்பா அம்மாவுக்கும் சாப்பாடு எடுத்துட்டு, காலேஜுக்குப் போற வழியில கொடுத்துட்டுப் போவேன். சாயங்காலம் காசுக்குப் பூ கட்டுவேன். அந்தக் காசுலதான் புக்ஸ் வாங்கிப்பேன். ராத்திரிக்கு சமைச்சு வச்சுட்டு சீக்கிரமா தூங்கிடுவேன். அடுத்தநாள் காலையில நாலரைக்கு எழுந்து படிக்கணுமே?!"

செல்வி, இறுதியாண்டு பி.சி.ஏ., வித்யாசாகர் மகளிர் கல்லூரி, செங்கல்பட்டு

"எங்கப்பா ஒரு சின்ன டிபன் கடையில சர்வரா வேலை பார்க்கறார். அம்மா வீட்டுலதான் இருக்காங்க. எங்க வீட்டுல மூணு பொண்ணுங்க. நான் கடைக்குட்டி. சின்னக்கா ஆனந்தி, வேலைக்குப் போய் பெரிய அக்கா சுதாவைப் படிக்க வச்சாங்க. இப்போ பெரியக்கா நர்ஸ் வேலையில சேர்ந்து சின்னக்காவை காலேஜ்ல சேர்த்து விட்டிருக்காங்க. பி.எஃப். பணத்தை வெச்சு, என்னையும் காலேஜ்ல சேர்த்து விட்டாங்க.

முதல் மார்க் எடுத்ததால கிடைச்ச ஸ்கார்லர்ஷிப்ல ரெண்டாவது வருஷம் ஃபீஸ் கட்டியாச்சு. ஆனா, ஃபைனல் இயர்ல ஸ்காலர்ஷிப் இல்லாததால பீஸ் கட்ட முடியாமப்போக, டிஸ்கன்டின்யூ பண்ணிடலாம்னு முடிவெடுத்துட்டோம். அப்பறம் காலேஜ் பிரின்ஸிபால், லெக்சரர்ஸ், ஸ்டூடன்ட்ஸ் எல்லாம் சேர்ந்து எனக்கு அந்த பீஸைக் கட்டினாங்க. இப்போ எண்பது சதவிகிதம் மார்க் இருக்கு. இந்த வருஷம் யுனிவர்சிட்டி கோல் மெடல் வாங்கணும்னு வெறியா படிச்சிட்டு இருக்கேன்!

வீடு கூட்டறது, துணி துவைக்கறது, பாத்திரம் வெளக்கறதுனு நாங்க அம்மாவுக்கு எல்லா வீட்டு வேலைகளும் செஞ்சு கொடுப்போம். ஞாயிறு மட்டும் அம்மாவுக்கு ஃபுல் ரெஸ்ட் கொடுத்துடுவோம். கூடை பின்றது, ஸ்கார்ஃப் போடறதுனு செஞ்சு, வர்ற காசுல குடும்ப செலவுகளை சமாளிப்போம். எங்களுக்காக அப்பா, அம்மா எதையும் சேர்த்து வைக்கலனாலும், நாங்க சுயமா வாழ தன்னம்பிக்கையையும் கல்வியையும் கொடுத்திருக்காங்க!"

நம்பிக்கைகள் வெல்லட்டும்!