நான் பாதி... அவள் பாதி...

காலேஜில் ஆசிரியையாக வேலைபார்க்கும் என் தோழி வீட்டுக்கு மாலையில் சென்றிருந்தேன். வெகு நேரம் மின்சாரம் துண்டிக்கப்பட் டிருந்ததால் சிறிது நேரம்

காத்திருந்து விட்டு வீடு திரும்பி விட்டேன். அடுத்த நாள் தோழியுடன் போனில் பேசிய போது, அன்று காலேஜுக்கு செல்ல வில்லை என்று அவள் சொன்னாள். அவள் விடுமுறை அதிகம் எடுக்க விரும்பாதவள். ஏன் காரணமின்றி லீவு எடுத்தாள் என்று கேட்டேன். அதன் பிறகுதான் சொன்னாள்... "என் செருப்பில் ஒன்றை நீ போட்டுச் சென்றுவிட்டாயே... நான் எப்படி காலேஜுக்குப் போவது" என்று. அப்போதுதான் கவனித்தேன்... முந்தின நாள் இரவில் அவளுடைய ஒரு செருப்பையும், என்னுடைய ஒரு செருப்பையும் சேர்த்து போட்டு வந்து விட்டேன் என்பதை. அதற்காக லீவு எடுத்ததை எப்போது நினைத்தாலும் சிரிப்பு வரும்.

-பி.ரூபி, முசிறி

இன்ப அதிர்ச்சி கேள்வித்தாள்!

கல்லூரி இறுதியாண்டின்போது செமஸ்டர் எக்ஸாமுக்கு 'ரிவிஷன்' செய்யும்விதமாக, 'மாதிரி வினாத்தாள்' ஒன்றை வீட்டில் விடிய விடிய தயாரித்த எங்கள் லெக்சரர் ஒருவர், கவரில் போட்டு எடுத்து வந்திருக்கிறார். அதை பியூனிடம் தந்து, "உள்ளே கேள்வித்தாள் இருக்கு. ஜெராக்ஸ் எடுத்து எல்லா கேர்ள்ஸூக்கும் கொடுத்துடு" என்று கூறியிருக்கிறார். அதன்படியே பியூன் மூலமாக வந்து சேர்ந்த கேள்வித்தாளைக் கையில் வாங்கிய எங்களுக்கு இன்ப அதிர்ச்சி! ஆம்... கேள்வித்தாளுடன் ராணுவ வீரராகப் பணிபுரியும் லெக்சரரின் கணவர் அவருக்கு எழுதியிருந்த அன்பு மடலும் இணைக்கப்பட்டிருந்தது! தன் கணவரின் கடிதம் வந்த கவரிலேயே கேள்வித்தாளையும் வைத்திருக்கிறார் லெக்சரர்... அதில் கடிதம் இருந்ததை அறியாமல்! பியூனும் விஷயம் புரியாமல் 'கருமமே கண்ணாக' பிரதி எடுத்து, பின் செய்துவிட்டார்!

அதைத் தொடர்ந்து வந்த வகுப்புகளில்... ''மேடம், அடுத்த செமஸ்டர் 'மாதிரி கேள்வித்தாளு'க்காக ஆவலோட காத்திருக்கோம்!'' என்று அடிக்கடி நாங்கள் தமாஷ் பண்ண... ஒவ்வொரு தடவையும் முகம் குங்குமப்பூதான் மேடத்துக்கு!

- ர.மாலதி, சென்னை-106

திணறடித்த 'தேவலோக' கார்த்திகை!

கல்லூரி விடுதியில் தங்கிப் படித்த காலத்தில், அந்த ஆண்டு கார்த்திகை தீபத்துக்கு விடுமுறை இல்லை. "ஹாஸ்டல்லயே விளக்கேத்தி கொண்டாடுங்கள்" என்று கூறியதுடன், ஆளுக்கு நான்கு தீபமும் கொடுத்து அவரவர் அறைகளில் ஏற்றி மகிழச் செய்தார் பிரின்ஸி மேம். "நம்ம ரூம்ல இந்த நாலு தீபத்தை மட்டும் ஏத்தக்கூடாது. இன்னும் சூப்பரா ஏதாச்சும் செய்யணும்டி" என்று எங்கள் அறைத் தோழிகள் ஆர்வமாக பரபரத்தோம். நிறைவாக... பர்த் டே கேண்டில்களை வாங்கிச் சுவரில் ஒட்டி, ஒளி வெள்ளத்தில் மிதந்தோம். அப்போது எதிர்பாராத விதமாக ஒரு கேண்டில், கீழே இருந்த நியூஸ்பேப்பர் கட்டின் மீது விழுந்து தீ பற்றிக்கொண்டு... எங்களை அழ வைத்துவிட்டது. ஒருவழியாகப் போராடி அதை அடக்கி முடித்தபோது, எங்கள் ரூம் தேவலோகமாகியிருந்தது! அதாவது... நாங்கள் புகை மண்டலத்துக்குள் இருந்தோம். விஷயம் கேள்விப்பட்டு ஹாஸ்டல் வார்டன் 'ஹிட்லி' (ஹிட்லருக்கு பெண் பால்) வந்து எங்களைக் காய்ச்சி எடுத்ததில், கார்த்திகை சந்தோஷம் கரைந்தேவிட்டது!

இருந்தாலும், அந்த 'தேவலோக' கார்த்திகை இன்று வரை எங்களுக்கு ரொம்பவே ஸ்பெஷல்தான்!

- கே.கலைவாணி, கோத்தகிரி

உண்ட மயக்கம் குண்டனுக்கும் உண்டு!

கல்லூரி வகுப்பில் அன்றைய தினம் 'லஞ்ச்'சுக்கு அடுத்து வந்த முதல் பீரியடில் ஹெச்.ஓ.டி. பாடங்களை நடத்திக் கொண்டிருந்தார். சாப்பாட்டை ஒரு பிடிபிடித்துவிட்டு வந்த இரண்டு மாணவர்களுக்குத் தூக்கம் கண்ணைச் சுழற்றியது. ஒருவன் கிட்டத்தட்ட தூங்கியேவிட, ''உண்ட மயக்கம் தொண்டனுக்கு வந்துடுச்சோ... எந்திரிடா!'' என அதட்டல்போட்டு எழுப்பிவிட்டார் ஹெச்.ஓ.டி. உடனே அடுத்தவன், ''ஸ்மால் கரெக்ஷன் சார்.... உண்ட மயக்கம் 'குண்ட'னுக்கும் உண்டு!'' என்று 'பப்ளிமாஸ்' போல இருக்கும் மற்றவனைக் காலி பண்ண... சமயோஜித நகைச்சுவை காரணமாக தன்னுடைய கோபத்தையும் மறந்து ஹெச்.ஓ.டி. சிரிக்க ஆரம்பிக்க... மொத்த வகுப்பும் சிரிப்பலையில் மிதந்தது. பதறிப்போய் பாதித் தூக்கத்தில் எழுந்தவன், 'நான் எங்க இருக்கேன்... இங்க என்ன நடக்குது' என்ற டைப்பில் நின்றுகொண்டிருந்ததுதான் அனைத்திலும் ஹைலைட்!

- ஜி.வளர்மதி செந்தில்குமார், பவானிசாகர்

இந்தப் பகுதிக்கு உங்கள் கல்லூரி அனுபவங்களையும்
எழுதி அனுப்பலாம், முகவரி
'ஃப்ளாஷ்பேக்',
அவள் விகடன்,
757, அண்ணா சாலை,
சென்னை-600 002