சரசரக்கும் புதிய சுடிதார்கள், அயர்ன் செய்யப்பட்ட பழைய தாவணிகள், ஃபேர்னஸ் க்ரீம் மற்றும் வெள்ளரித் துண்டுகளால் பளபளப்பு கூடிய முகங்கள் என்று வீதிகளில் வளையவர.... கலர்ஃபுல்லாகுது சென்னிமலை.

கை நிறைய பைகள், பை நிறைய செமத்தியான தின்பண்டங்களோடு நொடிக்கொரு சிரிப்பும், நிமிடத்துக்கொரு கலாய்ப்புமாக மலை நோக்கி நடக்கிறார்கள்... நடக்கிறார்கள்... நடந்து கொண்டே இருக்கிறார்கள்!

காரணம்?

'பூப்பறிக்கும் நோன்பி'!

கோயில் திருவிழா, தைப் பொங்கல் என்றாலே... நம் கிராமங்களெல்லாம் கல்யாணத்துக்கும் மேலாக களைகட்டுகின்றன. வேர்கள் விரும்பி குடிபுகும் செழுமையான விவசாய பூமியான கொங்கு மண்டலக் கிராமங்கள் பொங்கலை உச்சபட்ச மகிழ்ச்சியுடன் கொண்டாடுகின்றன. அதிலும் ஈரோடு மாவட்டம்... சென்னிமலை, பவானி, கோயம்புத்தூர் மாவட்டம்... காரமடை, மேட்டுப்பாளையம் போன்ற இடங்களில் கொண்டாடப்படும் 'பூ பறிக்கும் நோன்பி' என்பது அத்தனை ஆனந்த நிகழ்வு.

''அப்படி என்னதான் பண்ணுவீங்க?'' என்று கேட்டால், கொங்கு தமிழில் இப்படி விளக்கம் கொடுக்கிறார் 'சென்னிமலை' மோகனா -

"தை ரெண்டாம் தேதியன்னிக்கு, அதாவது பொங்கலுக்கு மறுநாள் பூப்பறிக்கும் நோம்பி கொண்டாடுவோமுங்க. பொழப்பு, படிப்புக்காக வெளியூர் போன எங்கூரு புள்ளைங்க, பசங்களெல்லாம் ஊருவந்து சேர்ந்துடுவாங்க. அவங்கவுங்க வூட்ல உள்ளவங்க மட்டுமில்லாம... டவுனுல இருக்குற உறமுறையையும் (சொந்தக்காரர்கள்) வரச்சொல்லி ஒண்ணா சேர்ந்துக்குவோம். அந்தன்னைக்கு காலங்காத்தால புது டிரெஸ் போட்டுகிட்டு கலகலனு வீட்டை விட்டுக் கௌம்பி வெளியில வந்தோம்னா... ஆம்பளைகளும், பொம்பளைகளுமா ஊரே ஜிகுஜிகுனு இருக்கும். போற வழியில பொண்ணுங்களும், பொம்பளைங்களும் வயசு வித்தியாசமில்லாம கூடிக்கூடி கும்மியடிச்சபடியே போவாங்க.

சென்னிமலையைப் பொறுத்தவரை பக்கத்தால இருக்குற மலைக்கு போவோமுங்க. கூடை, பையில கொண்டாந்த தின்பண்டத்தை எடுத்து வெச்சு தின்னு போட்டு, ஜாலியா சினிமா பாட்டுப் பாடி வெளையாடுவோம். அப்புறமா மலையில இருக்குற பூவை பறிப்போம். பொதுவா ஆவாரம் பூவைத்தான் பறிக்கோணும். ஆனா, அத்தன பேருக்கும் ஆவாரம் பூ கிடைக்குமுகங்ளா? கையில என்ன பூ கிடைச்சாலும் அதை எடுத்து கூடைக்குள்ளே போட்டு நிரப்பிக்குவோம். சமயத்துல பூவே இல்லாம இலை தழையை பறிச்சு நிரப்பிக்கிட்டு மலையை விட்டு இறங்குவோம்.

அடிவாரத்துக்கு வந்ததும்...

'ஓரேரி கரைமேலே ஓலமர சோலை, ஓலமர சோலை
அந்த ஓல பூ கோதும் கிளி இன்னும் வர காணோம்... இன்னும் வர காணோம்'

- இப்படி ஒவ்வொரு மரமா... பத்து மரம் வரைக்கும் பாடிக்கிட்டே கும்மியடிப்போம்.வழிநெடுக இப்படி கும்மியடிச்சுகிட்டே வூடு வந்து சேர்ந்து கொஞ்ச நேரம் 'அக்கடா'னு உக்காருவோம்" என்று சொல்லி இளைப்பாறினார்.

மாமனார் வீட்டுக்கு வந்திருக்கும் புதுமாப்பிள்ளையை கும்மி டீமுக்குள் இழுத்துவிட்டு மச்சினிகள் படு லந்து அடிப்பார்களாம். மாமன் பொண்ணு பூ பறிப்பதை பார்ப்பதற்காகவே 'ராசுக்குட்டி' படத்தில் ஜிலுஜிலுவென வரும் பாக்யராஜ் கணக்காக சிலுக்கு சட்டையும், ஜீன்ஸ் பேன்ட்டுமாக அந்த ஊருக்கு வரும் மைனர் முறைப் பையன்களின் அலம்பல்களும் இந்த நோன்பியின் ஹைலைட் காட்சிகள்!

நோன்பியின் செகன்ட் பார்ட்டை விவரிக்கும் 'சென்னிமலை' அருணாதேவி, "பறிச்சுட்டு வந்த பூ, இலையெல்லாம் வாசல்ல கொட்டி வெச்சு அதுகூடவே சாணிப்புள்ளையாரையும் எடுத்து வைப்போம். அதுக்குப் பக்கத்தாலேயே பொங்கல் விடுவோமுங்க. அப்புறம் பொங்கல்ல கொஞ்சம் எடுத்து தவக்காய்க்கு சாப்பாடு போடுவோம். அதை பூனையோ, காக்காவோ சாப்பிட்டுப் போகும்.

மறுநாள் காலையில குளிச்சுட்டு அந்த பூ, சாணிப்புள்ளையார், செங்கரும்பு, மஞ்சக்குலை எல்லாத்தையும் எடுத்துக்கிட்டு வாய்க்காலுக்கு நடப்போம். போற வழியெல்லாம் கும்மி அடிச்சுக்கிட்டு, குலவை விட்டுகிட்டே போவோம். அப்புறம் இதையெல்லாம் வாய்க்கால்ல வீசி எறிஞ்சுட்டு அந்த மஞ்சக்குலையில உள்ள மஞ்சளை எடுத்து அரைச்சு பூசிட்டு, கரும்பையெல்லாம் புள்ளைங்களோட உக்காந்து சாப்பிட்டுபோட்டு வீடு வந்து சேருவோம்.

குழாயடிச் சண்டை, வரப்புச் சண்டைனு சிறுசிறு உரசலால பிரிஞ்சு நிக்குற குடும்பங்ககூட இந்த நோம்பி சமயத்துல ஒண்ணா சேர்ந்துப்பாங்க. தெரிஞ்சவங்க, தெரியாதவங்க, உறமுறையெல்லா முகத்தையும் இந்த நோம்பியால பார்த்து பழகுன சந்தோஷம் அடுத்த நோம்பி வரைக்கும் மனசெல்லாம் நெறைஞ்சு நிக்கும். இதைவிட வேறென்னங்க வேணும் மனுஷனுக்கு?!" என்று ஆச்சர்ய கேள்வி கேட்கிறார்.

புதுத்துணி எடுக்க வழி செய்யும் சம்பிரதாய நிகழ்வாக மட்டும் இல்லாமல், பிரிந்து நிற்கும் நெஞ்சங்களை பிணைத்து வைக்கும் திருவிழாவாக இது பார்க்கப்படுவது எவ்வளவு பெரிய விஷயம்..! இந்த ஒரே காரணத்துக்காகவே நாடெல்லாம் பூ பறிக்கும் நோன்பி கொண்டாடலாம் என்று தோன்றுகிறதல்லவா!

வாங்க பூ பறிக்கலாம்!.