பனிக்காலம்... உடலுக்கும் உள்ளத்துக்கும் 'ஜில்'லென்று இருக்கும். ஆனால், கூந்தலின் ஆரோக்கியத்துக்கு 'செக்' வைக்கும் காலமும் இதுதான்! தலையில் படரும் பனி, குளிர்காற்று போன்றவை முடியைப் பாதிப்புள்ளாக்கும். எனவே, தலையின் மீது சீஸனுக்குத் தகுந்த கவனம் அவசியம். அதைச் செய்து வந்தால்... பனிக்காலத்திலும் உங்கள் கூந்தல் 'பளபள'தான்!

'இந்த ஷாம்பூவை போடக்கூடாது... அந்த எண்ணெயைத் தேய்க்கக்கூடாது...' என்பது போன்ற பியூட்டி பார்லர் கண்டிஷன்களில் சிக்கிக்கொள்வதைவிட, கைப்பக்குவம்தான் இந்த சீஸனில் கை கொடுக்கும்! கலரிங், ஸ்ட்ரெயிட்டனிங் என்றெல்லாம் மேலும் சிக்கலாக்கிக் கொள்ளாமல், கெமிக்கல்களை கூடுமானவரையில் தவிர்ப்பதுதான் கூந்தலைக் காப்பாற்றும்.

பொதுவாக குளிர்காலத்தில் முடி அதிகமாக வறண்டுபோகும் என்பதால், எப்போதும் சிறிது எண்ணெய்ப் பசை இருப்பதுபோல் பார்த்துக் கொள்ள வேண்டும். தினமும் 'ஷாம்பூ வாஷ்' செய்தீர்களென்றால்... கூந்தல் 'வாஷ் அவுட்' ஆகிவிடும்... ஜாக்கிரதை!

முடி வறட்சி காரணமாக, பொடுகுப் பிரச்னையும் அதிகமாகும். அந்தப் பொடுகானது தோள், கைகளில் எல்லாம் செதில் செதிலாக உதிர்ந்து பார்ப்பதற்கே அருவருப்பாக இருக்கும். இதைத் தவிர்க்க, வாரம் ஒரு முறை கற்றாழை ஜெல்லை எடுத்து, வெதுவெதுப்பான நீரில் கரைத்து தலையில் தடவி, ஐந்து நிமிடங்கள் ஊறவைத்து அலசினால்... வறட்டுத்தன்மை நீங்குவதுடன், பொடுகும் மட்டுப்படும்!

வறட்சி காரணமாக நரையும் அதிகரிக்கலாம். அதற்காக 'டை' அல்லது 'கலரிங்' பயன்படுத்தும்போது அது முடியின் வறட்சியை மேலும் கூட்டுவதற்கு வாய்ப்பிருக்கிறது. ஒரு கப் மருதாணி இலையுடன் கால் கப் டீத்தூள், எலுமிச்சைச் சாறு கால் கப், தேங்காய் எண்ணெய் 4 டீஸ்பூன் சேர்த்து மிக்ஸியில் விழுதாக அரைத்து, வாரம் ஒரு முறை இந்த விழுதை தலையில் தேய்த்து அலச, டை மற்றும் கலரிங் போன்றவை காரணமாக ஏற்படும் பாதிப்புகள் நீங்கும்.

குளிருக்காக உல்லன் குல்லாக்கள் அணிவதைத் தவிர்த்து, 'சிந்தடிக் சில்க்' தயாரிப்பு குல்லா மற்றும் ஸ்கார்ஃப்களை பயன்படுத்துவதன் மூலமும் பனிக்காலத்தில் முடியில் ஏற்படும் பிரச்னைகளைக் குறைக்கலாம்.

குளிர்காலம்தான் என்றில்லை.. . பொதுவாகவே கொத்துக்கொத்தாக முடி உதிரும். இதற்கு தூக்கமின்மையும் ஒரு காரணம். தூங்கப்போகும் முன் சிறிது கசகசாவை அரைத்து, பாலில் கலந்து குடித்தால் நிம்மதியான தூக்கம் வரும். தலையின் வறண்ட தன்மையும் குணமாகும். தினசரி இரவு உறங்கச் செல்லும்முன் 5 முதல் 6 சொட்டு ஆலிவ் ஆயிலைத் தலையில் தடவி வாரி, நுனிவரை பின்னல் போட்டு வந்தால்... முடி உதிர்வது நிற்கும். முடியின் வளர்ச்சியும் அதிகமாகும்.