"எங்க காலேஜுக்கு வர உங்களுக்கு இவ்வளவு நாள் ஆச்சா?!"னு உரிமையோட கோபப்பட்டு நம்மள வரவேற்றாங்க, கோவை, கிருஷ்ணா கலை மற்றும் அறிவியல் கல்லூரி தங்கங்கள். சும்மா சொல்லக் கூடாது... கோவையில இருந்து கேரளா போற வழியில, சூப்பர் லொக்கேஷன்ல இருக்கு காலேஜ். அன்னிக்கு கிளைமேட் வேற செம சூப்பரா அமைஞ்சுபோக, செலிப்ரேஷன் மூட்ல ஆடிட்டோரியமே அழகா இருந்துச்சு!

கல்லூரி நிர்வாக அறங்காவலர் மற்றும் தாளாளர் மலர்விழி மேம் குத்து விளக்கு ஏத்தி நிகழ்ச்சியை ஆரம்பிச்சு வைக்க, முதல் போட்டி குயில் பாட்டு! சித்ராக்கள், சுசீலாக்கள் எல்லாம் வசீகரிச்சு முடிக்க, அடுத்ததா நடனப் போட்டி ஆரம்பிக்கற நேரத்துல கூல் விசிட் தந்தாங்க சீஃப் கெஸ்ட், கோவை டெபுடி போலீஸ் கமிஷனர் காமினி மேம். "எங்க காலத்துல பொண்ணுங்களுக்கு இவ்வளவு எக்ஸ்போஷர் இல்ல. 'கல்ச்சுரல்னா என்ன?'னு கேட்போம். இன்னிக்கு உங்க திறமைகளை மதிச்சு கொண்டாட 'அவள் விகடன்' முயற்சி எடுத்திருக்கறது, கோடி பாராட்டுக்குரியது"னு மேம் சொல்ல, அதை ஆராதிச்சு எழும்பிச்சு அவ்வளவு க்ளாப்ஸ்!

மேம் பேசி முடிச்சதும் தனிநபர் நடனப் போட்டியில கேர்ள்ஸ் கலக்கலா ஆடி முடிக்க, ஒரு சின்ன பிரேக். அந்த பிரேக்லகூட ஆடியன்ஸை என்டர்டெய்ன் பண்ண, மேடையேறினாங்க மாணவி நர்மதா. 'மிமிக்ரி பண்ணப் போறேன்...'னு மைக் பிடிச்சவங்க, ஆக்டர்ஸ், பொலிட்டீஷியன்ஸ்னு அரைச்ச மாவை அரைக்காம, அவங்க காலேஜ் பிரின்ஸிபால்ல இருந்து வாட்ச்மேன் வரை எல்லார் மாதிரியும் பேசி, நடிச்சுக் காட்ட... அவ்ளோ ரசிச்சு சிரிச்சாங்க கேர்ள்ஸும், லெக்சரர்ஸும்!

இதுக்கு நடுவுல, "அநியாயம்! எங்கள மட்டும் இப்படி தீண்டத்தகாதவர்கள் ஆக்கி, எந்த ஆட்டைக்கும் சேர்த்துக்கற மாட்டேங்கறீங்களே"னு கோவிச்சுக்கிட்ட அந்த கோட் - எட் காலேஜ் கைஸ், "நாங்களும் ரங்கோலி போடுவோம்!"னு ட்ரை பண்ண, கலர்ஃபுல்லா களைகட்டிச்சு ஆஃப் ஸ்டேஜ் போட்டிகள்.

லஞ்ச் இன்டர்வெல் முடிஞ்ச கையோட, வெரைட்டி என்டர்டெய்ன்மென்ட். பிச்சை எடுக்கும் பெண் வேடம் தொடங்கி ஒபாமா வரைக்கும் அத்தனை பேரையும் மேடையில் 'கேட் வாக்'க வைத்தது ஜாலிலோ ஜிம்கானா. அடுத்து, குத்தாட்டம்... ஸாரி, குரூப் டான்ஸ் போட்டி! 'மன்னார்குடி கலகலகலக்க'னு ஆடுன ஆட்டத்துல கோயம்புத்தூரே கலங்கிருச்சுடா சாமீ. ஆடியன்ஸும் அருள் (!) வந்து ஸ்டேஜ்-க்கு கீழ 'சிக்குபுக்கு சிக்குபுக்கு' ரயில் ஓட்டி அலப்பறையக் கொடுத்தது ரொம்பவே அலம்பல்ஸ்!

கேர்ள்ஸுக்கான போட்டி முடிஞ்சதும், 'எங்க மேம்ஸுகளுக்கும் போட்டி வைங்களேன்...'னு கண்மணிகள் ரெக்வஸ்ட் வெக்க, சிக்கினாங்க லெக்சரர்ஸ். 'கவுண்டமணி பொண்ணு பார்க்க வந்தா, வெட்கப்படற மாதிரி நடிக்கணும்'னு ஒரே போடா போட, கலக்கிட்டாங்க கீதா மேம்! க்ளாப்... க்ளாப்... க்ளாப்!

"இது திருவிழா இல்ல, பெருவிழா! மாணவிகளோட உற்சாகத்துக்காக இதை நடத்தின அவள் விகடனுக்கு நன்றிகள். சொல்லப்போனா, மாணவிகளுக்கு இணையா பேராசிரியர்களும் இன்னிக்கு இந்த நிகழ்ச்சியை என்ஜாய் பண்ணினோம்!"னு கல்லூரி முதல்வர் சுந்தரராமன் வாழ்த்துரை வழங்க, வெற்றிபெற்ற மாணவிகளுக்கு பரிசுகள் வழங்கினதோட, 'சூப்பர் டிபார்ட்மென்ட்'டா தேர்வான இ.சி.எஸ். துறைக்கும் சூப்பர் பரிசு வழங்கி சிறப்பிச்சார். கோயம்புத்தூர், தலைமை பாஸ்போர்ட் அதிகாரி பாலமுருகன். காலையில் நிகழ்ச்சியை சிறப்பித்த சீஃப் கெஸ்ட் டெபுடி போலீஸ் கமிஷனர் காமினி மேம், பாலமுருகன் சாரோட மனைவிங்கறது... டெய்ல் பீஸ்!

" 'அவள்' குடும்ப பத்திரிகைங்கிறதுக்காக, சீஃப் கெஸ்ட் ஏற்பாட்டுலகூட இப்படி ஒரு சிம்பாலிஸமா?! கலக்கீட்டிங்க போங்க!"னு புரோக்ராம் கோ-ஆர்டினேட்டர்ஸ்கிட்ட கேர்ள்ஸ் கிண்டல் குலவை போட... ஊ ஊ ஊ ஊ!

- கேம்பஸ் டீம்

படங்கள் வி.ராஜேஷ், தி.விஜய், ஜா.ஜாக்சன்