ஹோம் வொர்க் மயக்கம்!

எங்கள் ஹெச்.ஓ.டி. ஹோம் வொர்க் கொடுத்து, மறுநாள் அதை முடிக்காதவர்களை வகுப்புக்கு வெளியே நிறுத்தும் வழக்கமுடையவர். அன்று நானும் என் தோழியும் ஹோம் வொர்க் முடித்திருந்தும், வகுப்புக்குச் செல்ல சிறிது தாமதமாகிவிட்டதால், 'அவுட்' என்று அவர் கர்ஜிக்க, விழித்துக்கொண்டே வெளியில் நின்றிருந்தோம். சில நொடிகளில் வகுப்புக்குள் எங்கள் தோழி மாலா மயக்கம் போட்டு விழுந்திருந்தாள். ஏற்பட்ட களேபரத்தில் சந்தடி சாக்கில் நாங்களும் உள்ளே நுழைய, மாலாவுக்கு தண்ணீர் அடித்து "என்னாச்சு?" என்று கேட்டால், "காலையில சாப்பிடல" என்றாள் பரிதாபமாக.

"அவள கேன்டீனுக்கு கூட்டிட்டுப் போங்க" என்று ஹெச்.ஓ.டி என்னையும் என் தோழியையும் பணிக்க, கேன்டீனுக்கு போகும் வழியில் 'கொல்' என சிரித்தாள் மாலா. நாங்கள் புரியாமல் பார்க்க, "நான் ஹோம் வொர்க் செய்யாததால, எக்ஸ்க்யூஸ் கேட்கலாம்னு எழுந்தப்போ, பென்ச்சுல ஸிலிப்பர் மாட்டி, தடுமாறி விழுந்துட்டேண்டி. எல்லாரும் கூடிட, அப்படியே மெயின்டெயின் பண்ணிட்டேன். எப்படியோ மூணு பேரும் தப்பிச்சுட்டோம்ல!" என்று அவள் சொல்ல, இப்போது மூவருமே 'கொல்'!

பின்குறிப்பு கேன்டீனில் ஐஸ்க்ரீம் சாப்பிட்டு அதைக் கொண்டாடினோம். இருபது வருடங்கள் ஆன பிறகும் ஐஸ்க்ரீமை பார்க்கும்போதெல்லாம் அந்த ஞாபகம்தான்!

- ஆர்.கலைச்செல்வி, கோவை

'மாட்டு'த் தோழிகள்!

குக்கிராமத்தில் இருக்கும் எங்கள் தோழியின் வீட்டுக்கு ஃப்ரெண்ட்ஸ் அனைவரும் சேர்ந்து சென்றிருந்தோம். மதிய சாப்பாடு தயாராகிக் கொண்டிருந்த இடத்துக்கு நானும் இன்னொரு தோழியும் சும்மா விசிட் அடித்தோம். அப்போது, "ஐயையோ... மோர் வாங்க மறந்துட்டோம்டி... கொஞ்சம்தான் இருக்கு" என்று பதறினாள் வீட்டுக்காரத் தோழி. உடனே, கூட வந்த தோழி, "உஷ்... கத்தாதே... ஐடியா இருக்கு!" என்று சொல்லி, அரிசி களைந்த நீரில் வீட்டில் இருந்த சிறிதளவு தயிரை ஊற்றிக் கடைந்து, உப்பு, கொத்தமல்லி, எலுமிச்சைச் சாறு பிழிந்து, தாளித்தும் விட்டாள். ஒரு அண்டா மோர் தயார். லஞ்ச் முடித்தபின், "எல்லாத்தையும்விட மோர்தாண்டி சூப்பர்" என்று தோழிகள் அனைவரும் புகழ, இறுதியில் சீக்ரெட்டை போட்டு உடைத்தோம் நாங்கள்!

"எங்களயெல்லாம் மாடாக்கிட்டீங்களேடி" என்று சிரித்த தோழிகள், இன்றும் அந்தத் தோழியின் வீட்டுக்குச் செல்லும்போது, "மோரைத் தவிர எதுனாலும் கொடு" என்ற கண்டிஷனோடுதான் பேச்சையே ஆரம்பிக்கிறார்கள்!

- எல்.எஸ்.சித்ரா கணேசன், கோவை

கால் உடைந்த பி.காம்!

அன்று கல்லூரி முதல் நாள் எனக்கு. வகுப்புக்கு வந்த மேம், முதல் வரிசையில் இருந்த என்னிடம், 'பி.காம்ல கால் எ கேர்ள்' என்று சொன்னார். மலையாளியான அவரின் பேச்சு சரியாக எனக்குப் புரியாததால், 'பி.காம்', 'கால்' என யூகித்துக்கொண்டு, நேராக பி.காம். வகுப்புக்குச் சென்று, "கால் உடைந்த கேர்ளை புள்ளியியல் மேம் கூப்பிடறாங்க" என்றேன். அவர்களும் என்னைப் போலவே தெளிவாக (!), "எங்க கிளாஸ்ல கை உடைஞ்சு கட்டுப்போட்ட கேர்ள் ஒருத்திதான் இருக்கா" என்று சொன்னார்கள். வகுப்புக்குத் திரும்பிய நான், "ஸாரி மேம்... அவங்க கிளாஸ்ல கால் உடைஞ்ச கேர்ள் இல்லையாம், கை உடைஞ்ச கேர்ள்தான் இருக்காளாம்" என்று சொல்ல, மேமுடன் சேர்ந்து வகுப்பே சிரித்தது காமெடியோ காமெடி!

- எம்.ஜெயலஷ்மி, மதுரை