"தன் கணவரின் திசைமாறிய போக்கு காரணமாக, அவர் மேல் சந்தேகம் கொண்டாள் என் மகள். பெரியவர்களின் சமரச முயற்சியின்போது, அந்தச் சந்தேகங்களில் சில உண்மையற்றவை என நிரூபிக்கப்பட்டு விட்டன. ஆனால், அதன் பிறகு, அவளை சந்தேக நோய் பீடித்தவளாக தனிமைப்படுத்தி விட்டார் மருமகன். தனது தவறுகளையும் இந்த சந்தர்ப்பத்தைப் பயன்படுத்தி தொடர்ந்து வருகிறார். 'பதற்றத்தில் சில சந்தேகங்கள் மட்டுமே தவறான கணிப்புகளாகிப் போனதே தவிர, மற்றதெல்லாம் உண்மையானவை' என்று குமுறுகிறாள் என் மகள். இந்தப் பிரச்னை காரணமாக அவளின் டீன் ஏஜ் பிள்ளைகள் உட்பட குடும்பத்தில் யாருமே அவளை மதிப்பதில்லை. கடும் மனஉளைச்சலில் இருக்கும் அவளையும், அவளுடைய குடும்ப நலனையும் எப்படி காப்பது?!"

டாக்டர் எஸ்.ஹர்ஷவர்தன், மனநல மருத்துவர், வேலூர்

"பொதுவாக, துணை மீதான அக்கறையில் தேய்வு, இல்லறத்தில் நாட்டம் குறைவு, வீடு திரும்புவதில் காரணமற்ற தாமதம், அதீத செலவுகள், செல்போன் குலாவல்கள் போன்றவை சந்தேகத்துக்கு பாதை தரும். இவற்றை களைய ஆரம்பத்திலேயே விட்டுக்கொடுத்தல், புரிந்து கொள்ளுதல், விஷயங்களை சரியாக பகிர்ந்துகொள்ளுதல் போன்றவற்றை மேற்கொள்ளலாம்.

பதிலாக, எடுத்த எடுப்பிலேயே வீட்டுப் பெரியவர்கள், உறவினர்கள், நண்பர்கள் என்று இருவரும் ஆள் சேர்த்துக்கொண்டு கோதாவில் குதித்து, அந்தரங்கத்தை அரங்கிலேற்ற அவசியமில்லை. இது மேலும் இடியாப்ப சிக்கலைத் தருமே ஒழிய, எந்த வகையிலும் தீர்வுக்கு வழியாகாது. பிற்பாடு, தம்பதியரே மனமொத்து வாழ முற்பட்டாலும், பழைய வடுக்கள் உறுத்தலாகி புதிய காயங்களுக்கு காரணமாகிவிடும்.

உதாரணத்துக்கு அலுவலகத் தோழியுடன் ஆரோக்கியமாக தொலைபேசும் கணவரை மனைவி சந்தேகிக்கும்போது, கடுப்பாகும் கணவர் அந்த அலுவலகத் தோழியிடமே அதையும் கொட்டி வடிகால் தேட முற்படுவார். இது மனைவியின் சந்தேகத்தை மேலும் ஊதிவிடும். எனவே, இம்மாதிரியான பிரச்னைகளின்போது பார்ட்னரின் தவறுக்கு தன் தரப்பில் ஏதேனும் காரணம் இருக்குமோ என்ற அக்கறையுடனான அலசல், தவறிழத்தவரையும் இறங்கி வரச்செய்யும். சுமூகமும் படிப்படியாக சாத்தியமாகும்.

தம்பதி என்பவர்கள்... கணவன் - மனைவியாக மட்டுமல்லாது பொறுப்பான தாய் - தந்தையாகவும், முதிர்ச்சியான புரிதலோடும் இதை எதிர்கொள்ள வேண்டும். சமரசத்தில் இறங்கும் மூன்றாம் நபர்களும், இரு தரப்பிலும் கரிசனம் கொண்டவர்களாகவும், குடும்பநலனில் அக்கறை கொண்டவர்களாகவும் இருக்க வேண்டும்.

இப்போது ரணகளமாகிக் கிடக்கும் உங்கள் மகளின் குடும்ப விவகாரத்தைப் பொறுத்தவரை, உடனடியாக மனநல மருத்துவரை நாடுவது அவசியம். அவர், தம்பதிக்கு பிரச்னையை யதார்த்தத்தோடு புரிய வைப்பார். தேவையெனில் சிகிச்சை முறைகளையும் மேற்கொள்வார். பின் அவரின் பரிந்துரையின் கீழ் 'மணவாழ் ஆலோசகர்', தம்பதியரின் அடுத்தகட்ட இணக்கத்துக்கு முயற்சிப்பார். மருமகன் மீதே தவறு இருப்பின், தம்பதியர் பரஸ்பரம் ஒருமித்து பிரச்னையை களைய ஆலோசனை வழங்கப்படும். மருமகன் தனது பிடிவாதத்தில் தீவிரமாக இருப்பின், தேவையைப் பொறுத்து உங்கள் மகளுக்கு அடுத்தக்கட்ட வாழ்க்கையை எதிர்கொள்ள பாஸிட்டிவ் ஆலோசனைகளும் வழங்கப்படும். உரிய மனநல ஆலோசனை பெறுவதே அவசியமும் அவசரமுமாகும்!"

"என் கணவர் 'மலச்சிக்கலுக்கு மட்டும்' என்று காரணங்காட்டி தினசரி காலை சிகரெட்டோடு டாய்லெட் ரூம் செல்கிறார். மற்ற நேரங்களில் புகைக்காமலிருக்கும் அவர், சமீப மாதங்களாக குளிருக்கு, மூக்கடைப்புக்கு என்று இரவிலும் இரண்டாவது சிகரெட் புகைப்பதை ஆரம்பித்துவிட்டார். இப்படி தினத்துக்கு ஒன்றோ, இரண்டோ புகைப்பதால் எதுவும் தீங்கு வந்துவிடாது என்பது அவர் வாதம். மருத்துவ ரீதியாக இது உண்மைதானா?"

டாக்டர் வெங்கடேஸ்வர பாபு, நுரையீரல் நோய் சிறப்பு மருத்துவர், புதுச்சேரி

"ஒரு துளி என்றாலும் விஷம், விஷம்தான். உங்கள் கணவரைப்போல, 'ஜஸ்ட் எப்பவாச்சும்' என்ற சால்ஜாப்புடன் புகைப்பவர்களை பல குடும்பங்களிலும் கண்டுகொள்ளாமல்தான் இருக்கிறார்கள். தினம் பாக்கெட் கணக்காக புகைப்பவருக்கு வரும் பிரச்னைகள், தினம் ஒன்றிரண்டு என பல ஆண்டுகள் தொடர்ந்து புகைப்பவருக்கும் பொருந்தும்.

மலச்சிக்கல் என்றால், உரிய மருத்துவ சிகிச்சை பெற வேண்டுமேயழிய, புகை எந்த வகையிலும் நிவாரணம் தராது. அதேபோல குளிர், சளி என்று ஏற்கெனவே திணறிக் கொண்டிருக்கும் நுரையீரலை, சிகரெட் புகை மேலும் பாதிக்கவே செய்யும்.

காலையில் எழுந்ததும் சிகெரெட் புகைக்க காரணம் தேடுவதால், உங்கள் கணவரும் புகை பாதிப்பின் பிடியில் இருக்கிறார் என்றே சொல்லவேண்டும். நிகோட்டின் மட்டுமல்ல, ஒரு சிகரெட்டை புகைக்கும்போது சுமார் நாலாயிரம் வேதிப்பொருட்களை புகையோடு நுரையீரல் எதிர்கொள்கிறது. கூடவே, சிகரெட்டால் கேன்சர்தான் வரும் என்பதில்லை. அதற்கு நிகரான பல்வேறு உடல் நல பாதிப்புகளும் ஏற்படலாம். முக்கியமாக 'சி.ஓ.பி.டி.'(COPD-Chronic Obstructive Pulmonary Disease) எனப்படும் 'நாள்பட்ட நுரையீரல் அடைப்பு நோய்' ஏற்படும். உலகளவில் மக்களை பலிகொள்ளும் காரணிகளில் இந்த நோயும் ஒன்றாக இருக்கிறது. இந்தப் பாதிப்பு கண்டவர்களுக்கு நுரையீரல் பாதிப்பால் மூச்சுத் திணறல், இருமல், சளி நீடித்து இருக்கும். உணவில் சுவையை இழப்பது, இருதய பாதிப்பு, சைனஸ் அறை மற்றும் குரல் நாண் பாதிப்பு, பாத ரத்தக் குழாய்கள் சேதம் என அடுத்தடுத்து அபாயகரங்கள் காத்திருக்கின்றன.

உங்கள் கணவரை பீடிக்கும் புகை பாதிப்புகள், நீங்கள் மற்றும் குழந்தைகள் என்று அருகில் இருப்பவர்களையும் தாக்கும் (passive smoking). எனவே, உடனடியாக உங்கள் மருத்துவரின் உதவியோடு தேவையான ஆலோசனைகளைப் பெறுங்கள்."