நம்ம வீட்டுத் தோட்டம் !

"வறட்டியைத் தூவினாலே சரசரனு வளரும் ரோஜா !"

" 'அஞ்சு ரூபாய்க்கு வாங்கின செடிதானே... போகுது, இன்னொண்ணு வாங்கிக்கலாம்'னு நம்மளோட சோம்பேறித்தனத்தால கண்ணுக்கு முன்னாலயே ஒரு செடியைக் கருகவிட்டா, என்னைப் பொறுத்தவரைக்கும் அதுவும் ஒரு கொலைதான்!"

தன் தாவரக் காதலை ஆரம்பத்திலேயே அழுத்தமாகப் பதிக்கிறார் வேலூர் மாவட்டம், வாலாஜாபேட்டையைச் சேர்ந்த அகிலா!

மூலிகைகள், காய்கறிச் செடி, கொடிகள், அலங்காரச் செடிகள் என்று... இதற்கே நாம் விழிகள் விரித்து நிற்க, அவர் வீட்டில் மீன்கள் விளையாடுவதற்காக அமைக்கப்பட்டுள்ள குட்டியான லில்லி குளம் நம்மை ஆச்சர்யத்துக்குள் மூழ்கடித் தது.

பத்து வகையான செம்பருத்தி மலர்கள், அந்திமல்லி, ஜாதிமல்லி, அரளி, ரோஜா என ஏறக்குறைய இருபது வகையான அழகுப் பூச்செடிகள் சிரிக்கும் தோட்டத்துக்குள் அழைத்துச் சென்ற அகிலா, "ரோஜா செடி வளர்க்க, தொட்டி முழுக்க மண்ணை நிரப்பாம, பாதி அளவு நிரப்பினா போதும். அதுலயும் பாதிக்கு பாதி செம்மண் கலந்து போட்டு, செடி துளிர் விடும்போது வறட்டியை உதிர்த்து தூவினா, செடி சர சரனு வளர்ந்து ரோஜா சீக்கிரமா 'ஹலோ' சொல்லும்" என்ற டிப்ஸ் தந்தவாறே நகர்ந்தவர், மூலிகை செடிகள் முன் நின்றார்.

வெற்றிலை, சித்தரத்தை, துளசி, திருநீற்றுப்பச்சிலை, ஓமவல்லி, காற்றாழை, கீழாநெல்லி, வேம்பு, இஞ்சி, வசம்பு, நெல்லி என்று அனைத்து மூலிகைகளையும் தொட்டியில் வளர்த்து அசத்துகிறார்.

"டாக்டருக்கே காய்ச்சல் வர்றமாதிரி, இந்த மூலிகை செடிகளுக்கும் பூச்சித் தாக்குதல் வரும்!" என்று சிரிக்கும் அகிலா, செடிகளை அதிலிருந்து மீட்பதற்கு அசத்தலாக ஒரு குறிப்பு வழங்கினார். அது

"கட்டப் புகையிலைய ஒரு இரவு தண்ணியில ஊற வச்சு, அந்தத் தண்ணிய செடிகள்ல தெளிச்சா, எப்படிப்பட்ட பூச்சியும் ஓடிடும்!"

அடுத்து, காய்கறி செக்ஷன்... பூசணி, பரங்கி, சௌசௌ, தக்காளி, வாழை, மிளகாய், முள்ளங்கி, மணத்தக்காளி, சுண்டைக்காய், வெங்காயத்தாள், புதினா, எலுமிச்சை, ஆரஞ்சு, பாகற்காய், கொத்தவரை என்று அது ஒரு 'மினி கோயம்பேடு'! இவற்றுக்கெல்லாம் அகிலா பயன்படுத்துவது... ஒன்லி 'ஹோம் மேட் உரம்'! தயாரிப்பு முறையை அவரே விளக்கினார்.

"மண்பாண்டங்கள்ல வீட்டுல சேர்ற மக்கும் குப்பையை சேகரிக்கணும். அது மக்கினவொடன, அதோட வேப்பம் இலை சேர்த்து காயவிட்டு, அதை உரமா

பயன்படுத்தலாம். கூடவே, எப்பவும் குளுகுளுனு இருக்கற எங்க தோட்டத்துல கிளி, புறா, தேன்சிட்டு, மைனா, குயில்னு அத்தனை பறவைகளும் வந்து அடையறதால, அதுகளோட எச்சமும் தோட்டத்துக்கு எருவாகுது!" என்ற அகிலா,

"என்னைப் போலவே, என் பொண்ணுங்களுக்கும் செடிகள் மேல அவ்வளவு ஆர்வம்! அவங்களோட அக்கறையாலயும்தான் இந்தத் தோட்டம் செழிச்சு நிக்குது" என்று பெருமையுடன் சொல்லும் அகிலாவுக்கு இரண்டு பெண்கள். மூத்தவர் எம்.பி.ஏ. முடித்துவிட்டு வேலைக்குச் செல்ல, இரண்டாவது பெண் பதினொன்றாம் வகுப்பு படிக்கிறார்.

"ஆரம்பத்துல நாங்க அடுக்குமாடி குடியிருப்புல இருந்தோம். என்னோட தோட்ட ஆசைக்காகவே என் கணவர் எனக்கு இந்த வீட்டையும் தோட்டத்தையும் கட்டித் தந்தார்! தேங்க்ஸ் டு மை ஹஸ்பண்ட்!" என்று முடித்தபோது அவர் முகமெல்லாம் பரவசமாக, அகிலாவும் ஒரு பூவாகிப்போனார் அந்தத் தோட்டத்தில்!