சுற்றுலாவின் மறுபக்கம்

மூன்றே எழுத்துக்களில் ஒரு குளு குளு கவிதை கேட்டால், 'ஊட்டி' என்று சொல்லி கூலாக கண் சிமிட்டலாம்!

சர்வதேச சுற்றுலாத் தலம் என்ற அந்தஸ்துடன் ஒவ்வொரு வருடமும் அதிகப்படியான பார்வையாளர்களை பெற்று, தனது முந்தைய சாதனையை தானே முறியடித்துக் கொண்டு இருக்கிறது ஊட்டி. ஆனால், இந்தப் பெருமையும் சந்தோஷமும் இன்னும் எவ்வளவு ஆண்டுகளுக்கு என்று தெரியவில்லை.

காரணம்..? 'சுற்றுலா' என்பதன் மறுபக்கத்தால் வந்த வினைதான்.

''சுற்றுலா வளர்ச்சி என்ற பெயரால் கணக்கு வழக்கில்லாமல் காடுகள் அழிக்கப்பட்டு, 'கான்கிரீட் காடுகள்' என்றாகிக் கொண்டிருக்கிறது ஊட்டி. அதன் இயல்பான பசுமை, குளிர்ச்சி, பொலிவு எல்லாம் மெள்ள மறைந்து கொண்டிருக்கிறது'' என்று சொல்லும் சுற்றுச்சூழல் ஆர்வலர்கள்...

''இப்போதாவது விழித்துக்கொள்ள வேண்டும். இல்லைஎன்றால், இன்னும் சில பல ஆண்டுகளில் சுற்றுலா டிக்ஷனரியில் 'ஊட்டி' என்ற வார்த்தைக்கு... 'இழந்த சொர்க்கம்' என்று அர்த்தம் கொடுக்க வேண்டியதாகிவிடும்'' என்றும் அபாய அலாரம் அடிக்க,

"ஆகா, இயற்கை அன்னை தாலாட்டும் ஊட்டிக்கு பிரச்னையா?" என்ற பதைபதைப்புடன் நீலகிரியை ஒரு ரவுண்ட் வந்தோம். பதில்களைப் பெறுவதற்கு முன்பாக, ராமநாதபுரம், வேலூரில் காணப்படும் வெயிலின் தாக்கத்தை ஊட்டியிலும் உணர முடிந்த நொடியில், 'ஊட்டி இப்போது ஊட்டியாக இல்லை' என்பது நமக்கும் புரிந்தது.

"சுமார் பதினைந்து வருஷத்துக்கு முன்ன இருந்துதான் இந்த மாற்றம்.." என்று அந்த 'மாற்றங்களை' பட்டியலிட்டுப் பேச ஆரம்பித்தார் பேராசிரியரும், கவிஞருமான மணிவண்ணன்...

"நானெல்லாம் பிறந்து வளர்ந்தது நீலகிரி மண்லதான். அப்போவெல்லாம் மதியம் பன்னிரண்டு மணிக்குகூட வெடவெடனு உடம்பு ஆடற அளவுக்கு குளிர் அடிக்கும். ராத்திரி எட்டு மணி ஆகிட்டாலே குன்னூர், ஊட்டியிலயெல்லாம் கதவை இழுத்து சாத்திட்டு தூங்க ஆரம்பிச்சிடுவாங்க. அதனாலதான் 'தூங்கும் நகரம்'னு சொல்வாங்க. இப்போ மிட் நைட்லகூட ஹோட்டலும், டீக்கடையும் திறந்திருக்க, மதுரை மாதிரி 'தூங்கா நகரம்' ஆகிடுச்சு. நைட்டு பத்து மணிக்குகூட வெத்துடம்போட ஆளுங்க நடமாடறாங்கனா பார்த்துக்கோங்க.

சில வருஷங்களுக்கு முன்ன வரைக்கும் வீடுகள்லயோ, லாட்ஜ்கள்லயோ ஃபேன், ஏ.சி. எல்லாம் கிடையாது. அதுக்கு அவசியமும் இருக்காது. இன்னிக்கு எங்க வீடு உட்பட பல வீடுகள்ல ஃபேன் வந்துடுச்சு, ஏ.சி. வந்துடுச்சு. காரணம், அந்தளவுக்கு ஊட்டி 'ஹாட்' ஆகிடுச்சு!" என்ற மணிவண்ணன்,

"கணக்கு வழக்கில்லாம இங்க காட்டை அழிக்கறாங்க. ராட்சஸ லாரிகள்ல, பெரிய பெரிய மரங்களையெல்லாம் குட்டி குட்டியா வெட்டி, கட்டி கொண்டுட்டு போறதை கண் கலங்க பார்த்திருக்கேன். இங்க பல வன கிராமங்களுக்கு இன்னும் பஸ் ரூட்டே கிடையாது. ஆனா, அந்தப் பகுதிகளை தாண்டியும் மரக் கடத்தல் லாரிகள் கர்மசிரத்தையா போய் வர கடத்தலுக்காகவே 'தனி ரூட்' போட்டிருக்காங்க. மொத்தத்துல, ஊட்டியோட உயிரை கொஞ்சம் கொஞ்சமா உறிஞ்சுறாங்க!" என்றார் வருத்தத்துடன்.

"நீலகிரியோட நிலைமை மோசமாகிட்டே போறதுக்கு முக்கியமான காரணம் அசுரத்தனமான கட்டட ஆக்கிரமிப்புகளும்தான்..." என்று அடுத்த அதிர்ச்சியை ஆரம்பித்த 'ஊட்டி' முகமது ரஃபீக்,

"ஒரு காலத்துல குன்னூர் மற்றும் ஊட்டி டவுன் பகுதிகளை கொஞ்சம் உயரமான இடத்துல இருந்து பார்த்தீங்கனா... காடா தெரியும். இப்ப, காலி இடமே கண்ணுல தெரியாது. ஷாப்பிங் ஏரியாக்களும், லாட்ஜுங்களும் புதுசுபுதுசா முளைச்சு ஜன நெருக்கடியில திக்கித் திணறுது.

டவுன் நிலைமை இப்படினா, கொஞ்சம் தள்ளி விவசாய நிலங்கள், வனப்பகுதிகள் முழுக்க காட்டேஜு களோட ஆதிக்கம்தான். பூர்விக பழங்குடிகளா இருந்த இருளர், குரும்பர் எல்லாம் தங்களோட விவசாய நிலங்களை நல்ல ரேட்டுக்கு வித்துட்டு வேறே எங்கெங்கோ கூலி வேலைக்கு போக ஆரம்பிச்சுட்டாங்க. அந்த நிலமெல்லாம் டூரிஸ்ட்களுக்காக காட்டேஜ் ஆயிட்டிருக்கு. சம்மர்ல குடிநீர் பஞ்சமே வந்துடுசுன்னா பார்த்துக்குங்க.

இதுமட்டுமில்லாம, தமிழ்நாடு முழுக்க இருக்கற 'பசையுள்ள' பார்ட்டிங்க... 'ஊட்டியில ஒரு சொந்த வீடு கட்டணும்'னு அடம் பிடிக்கறாங்க. அவங்களோட கனவை நனவாக்க, காடு அழிஞ்சு காட்டேஜ்கள் பெருகுது. நீலகிரியில வெளியாட்கள் குடியேறவோ, சொந்தமா வீடு, காட்டேஜ் கட்டிக்கவோ பல கட்டுப்பாடுகளை அரசு கொண்டுவந்தே ஆகணும்" என்று பதறினார் உண்மையான அக்கறையோடு.

இதுபோன்ற இயற்கை விதி மீறல்கள் நீலகிரியின் வனப்புக்கு மட்டும் தீ வைக்கவில்லை, அங்கே வசிப்பவர்களின் உயிருக்கும்தான். கடந்த நவம்பரில் நீலகிரியில் பெய்த கடும் மழையை தொடர்ந்து ஏற்பட்ட நிலச்சரிவில், கட்டடங்கள் எல்லாம் தீப்பெட்டிகளாக சரிய, சுமார் நாற்பத்து மூன்று பேர் பலியான சோகத்தை யாரும் எளிதில் மறந்துவிட முடியாது.

மலையின் மீது விழும் மழை நீர், சரிவை நோக்கி எந்த தங்குதடையும் இல்லாமல் இறங்கி வரவேண்டும். ஆனால், வடிகால் ஏரியாக்கள் எல்லாம் கட்டடங்களை எழுப்பி விட்டதால் உள்ளேயே நீர் தேங்கி, மண்ணின் பிடிமானம் அற்றுப்போனதும் இந்தச் சோகத்துக்கு ஒரு காரணம்.

''இன்டர்நேஷனல் டூரிஸ்ட் ஸ்பாட்டான இந்த நீலகிரியில பொறந்து வளர்ந்ததை நினைச்சு நான் பல நாள் பெருமைப்பட்டிருக்கேன். ஆனா, இப்போல்லாம் லேசா மழை துளிக்க ஆரம்பிச்சாலே மனசுல நடுக்கம் வந்துடுது" என்று அந்த குரூர நிலச்சரிவு தந்த அச்சத்தில் இருந்து மீளாமல் பேசுகிறார் குன்னூரை சேர்ந்த ஷர்மிளா.

அளவுக்கு மிஞ்சினால், அமிர்தமே நஞ்சு எனும்போது... சுற்றுலா எந்த மூலை?! நிலைமை இப்படியே நீடித்தால்... நம் பேரன், பேத்திகள் டூர் செல்வதற்கு ஊட்டி இருக்குமா என்பது சந்தேகமே!