Published:Updated:

கனவுகளை நனவாக்கும் கடவுள் தரிசனம்!

கனவுகளை நனவாக்கும் கடவுள் தரிசனம்!

கனவுகளை நனவாக்கும் கடவுள் தரிசனம்!

கனவுகளை நனவாக்கும் கடவுள் தரிசனம்!

Published:Updated:

26-03-2010
கரு.முத்து
கனவுகளை நனவாக்கும் கடவுள் தரிசனம் !
கனவுகளை நனவாக்கும் கடவுள் தரிசனம்!
கனவுகளை நனவாக்கும் கடவுள் தரிசனம்!

ஒட்டுமொத்த விகடனுக்கும் ஒரே ஷார்ட்கட்!

அரச வாழ்க்கைக்கு அச்சாரம் போடும் தீர்த்த யாத்திரை !

இப்போது, 'இன்பச் சுற்றுலா’ என்ற பெயரில் ஊட்டி, கொடைக்கானல், சிம்லா என்று மலைப் பிரதேசங்களுக்கும், ஜப்பான், லண்டன், சிங்கப்பூர் என்று அயல்நாடுகளுக்கும் செல்கிறோம். அதற்கான பொருளாதார வசதி, போக்குவரத்து வசதி, தகவல் தொடர்பு வசதி ஆகியவை அதை எளிதாக்கியிருக்கிறது.

கனவுகளை நனவாக்கும் கடவுள் தரிசனம்!

ஆனால், இந்த வசதிகள் குறைவாக இருந்த ஆரம்பக் காலங்களில், சுமார் ஐம்பது ஆண்டுகளுக்கு முன்பு வரை சுற்றுலா என்றால்... அது ஆன்மிக யாத்திரையாகத்தான் இருக்கும்.

தெற்கே இருப்பவர்கள் வடக்கே காசிக்கும், வடக்கே இருப்பவர்கள் இங்கே ராமேஸ்வரம் வந்து வழிபடுவதும்தான் அப்போதைய பெரிய யாத்திரை. இந்தியர்களின் இந்த மத நம்பிக்கையை மதிக்கிற வகையில், கடலுக்குள் தீவாக இருக்கும் ரமேஸ்வரத்துக்கு அந்தக் காலத்திலேயே இருப்புப் பாதை அமைத்து புகைவண்டியை அனுப்பினார்கள் ஆங்கிலேயர்கள்.

இப்படி புகழ்பெற்ற ஆன்மிக தலமாகவும் சுற்றுலாத் தலமாகவும் விளங்கும் ராமேஸ்வரத்தில் இருக்கும், ஸ்ரீராமர் வழிபட்ட ராமநாதசுவாமியைத்தான் 'கனவுகளை நனவாக்கும் கடவுள் தரிசன’த்தில் தரிசிக்கப் போகிறோம்.

ராமேஸ்வரம்... வங்கக் கடலில் அமைந்திருக்கும் இந்த அழகிய தீவு அரிய ஆன்மிக பொக்கிஷங்களை உள்ளடக்கியது; புராணத்தோடும், வரலாற்றோடும் மிக நெருங்கிய தொடர்பினைக் கொண்டது. ராமர், இலங்கை செல்ல கட்டிய கடல்பாலமான 'ராமசேது’, ராமர் அமைத்து வழிபட்ட கடல் நவக்கிரக கற்கள், சீதாதேவி மணலில் அமைத்த சிவலிங்கம், அனுமன் கைலாயத்தில் இருந்து கொண்டு வந்த சிவலிங்கம், விபீஷணன் சரணடைந்த இடம், அவனுக்கு லட்சுமணன் பட்டாபிஷேகம் செய்த இடம், ராமர் உயரமான இடத்தில் நின்று இலங்கையைப் பார்த்த இடத்தில் இருக்கும் ராமரின் பாதங்கள், 'பித்ரு தர்ப்பணம்’ எனும் முன்னோர்களுக்கு செய்யப்படும் சடங்குகளை செய்ய உகந்ததும், ராமனின் தனுஷினால் (வில்) ராமசேது உடைக்கப்பட்ட இடமுமான தனுஷ்கோடி என்று... அடுக்கடுக்காக புராணப் பெருமைகள் பெற்றது இந்தத் தீவு.

கனவுகளை நனவாக்கும் கடவுள் தரிசனம்!

கடலைப் பார்த்தபடி பிரமாண்டமாக அமைந்திருக்கிறது ராமநாதசாமி திருக்கோயில். பேருந்துநிலையம், ரயில்நிலையம், கோயில், கடற்கரை என்று எந்தத் திசையில் பார்த்தாலும் வடநாட்டு பக்தர்களின் கூட்டம்தான் களை கட்டுகிறது. அவர்களின் வருகையால் ஆட்டோ ஓட்டுனரிலிருந்து டீக்கடைக்காரர் வரை எல்லோருக்கும் இந்தி முதல் பல்வேறு இந்திய மொழிகளும் பரிச்சயமாகியிருக்கிறது.

ராஜஸ்தான் மக்களின் ராமேஸ்வர ஆர்வம்!

கோயிலில் கங்கா பூஜை செய்து கொண்டிருந்தார் ராஜஸ்தான் மாநிலத்தில் இருந்து கணவர் மொபசிங்கோடு வந்திருந்த சுசீலா. ''கங்கையில் இருந்து நீர் கொண்டு வந்து இங்கு சுவாமிக்கு அபிஷேகம் செய்தால், 16 தலைமுறையாக வாழ்ந்த நம் முன்னோர்களின் பாவங்கள் போய், அவர்கள் மோட்சம் பெறுவார்கள் என்பது ஐதீகம். அதற்காகத்தான் இங்கே கங்கை நீரோடு வந்திருக்கிறோம். எங்கள் மாநிலத்தில் ராமேஸ்வரத்துக்கு போவதைத்தான் புனிதமாக கருதுகிறார்கள். எங்களுக்கும் இது நீண்ட நாள் ஆசை. இப்போதுதான் இது நிறைவேறி இருக்கிறது!’’ என்று முகத்தில் பரவசம் பொங்கச் சொன்னார் சுசீலா.

கனவுகளை நனவாக்கும் கடவுள் தரிசனம்!

மகாராஷ்டிர மாநிலத்தில் இருந்து கணவர் சப்தயேபில் பஞ்சால் சகிதமாக வந்திருந்தார் கமலாதேவி. ''இது இந்துக்களின் முக்கியமான கடமை. இஸ்லாமியர்கள் ஹஜ் போவதைப்போல், கிறிஸ்தவர்கள் ஜெருசலேம் போவதைப்போல் இந்துக்கள் இந்த காசி, ராமேஸ்வர யாத்திரை போக வேண்டும் என்று நம் சாஸ்திரங்கள் சொல்கின்றன. ராமனின் பாவம் போக்கியவர், இந்த ஈசன். அப்படிப்பட்டவரை வந்து தரிசித்தால் நம்முடைய அத்தனை பாவங்களும் போய் வாழ்வில் ஒரு உன்னத நிலையை அடையலாம்!’’ என்று பரவசத்துடன் பேசினார் கமலாதேவி.

'பக்தர்கள் முதலில் சேதுவில் (வங்கக் கடல்) குளித்துவிட்டு, பின் மகாலஷ்மி தீர்த்தத்தில் ஆரம்பித்து, கோடி தீர்த்தம் வரை 22 புண்ணிய தீர்த்தங்களிலும் நீராடி முடித்து, உடைமாற்றிய பின்னர்தான் இறைவனைத் தரிசிக்க வேண்டும்’ என்று வழிபாட்டு முறை சொல்லும் இந்த ஆலயத்தின் தலவரலாறு பார்ப்போமா?!

இரண்டு சந்நிதிகளிலும் ஈசன்!

சீதாதேவியை சிவபூஜை செய்யும்படி மகரிஷிகள் சொன்னதால், சிவலிங்கம் கொண்டு வரும்படி அனுமனை பணித்தார் ராமர். அதற்காக கைலாயம் சென்ற அனுமன், திரும்பிவர காலதாமதம் ஆனதால்... பொறுமையிழந்த சீதாதேவி, கடற்கரை மணலாலேயே ஒரு லிங்கத்தை செய்ய, அதை புனிதமாக்கினார் ராமர். ஆனால், சிவலிங்கத்துடன் திரும்பிய அனுமன் இதைக் கண்டு வருத்தமுற்றார். அதனால் அவரைச் சமாதானப்படுத்த அந்த லிங்கத்தையும் அருகே வைத்து பூஜைகள் செய்ய உத்தரவிட்டார் ராமர்.

அப்படி அவரால் புனிதமாக்கப்பட்ட லிங்கம்... ராமநாதசுவாமியாகவும், ஹனுமன் கொண்டுவந்த லிங்கம்... விசுவநாதசுவாமியாகவும் அடுத்தடுத்த சந்நிதிகளில் அமர்ந்துதான் அருள் பாலித்துக் கொண்டுஇருக்கிறார்கள் ஆலயத்தில். பூஜைகள் முதலில் நடத்தப்படுவது அனுமனின் விசுவநாதருக்குத்தான். இங்கே விசுவநாதருக்கு விசாலாட்சி, ராமநாதருக்கு பர்வதவர்த்தினி என இரு அம்பிகைகள் தனி சந்நிதிகளில் வீற்றிருக்கிறார்கள். அதிலும், பர்வதவர்த்தினி, சுவாமிக்கு வலப்புறமாக அமைந்திருப்பது விசேஷமானதாக கருதப்படுகிறது. அம்பாள் சந்நிதிக்கு வடமேற்கே பள்ளிகொண்ட பெருமாள் சந்நிதி. இதுதவிர சந்தான சௌபாக்கிய கணபதி, மகாகணபதி, சுப்ரமணியர், சேதுமாதவர், நடராஜர், ஆஞ்சநேயர், மகாலஷ்மி ஆகியோருக்கும் தனித்தனி சந்நிதிகள் இருக்கின்றன.

கனவுகளை நனவாக்கும் கடவுள் தரிசனம்!

இவற்றையெல்லாம் வழிபட்ட பின்னர் நேரமிருந்தால் ஆர்வமுள்ளவர்கள் கோயிலைச் சுற்றி பல்வேறு இடங்களில் அமைந்திருக்கும் ராமதீர்த்தம், சீதாதீர்த்தம், கோதண்டராமர்கோயில், கந்தமானபர்வதம், ஜடாதீர்த்தம், தனுஷ்கோடி ஆகிய இடங்களுக்குச் செல்லலாம். 'கந்தமானபர்வதம்’ என்பது ராமர் உயரமான மணல்மேட்டில் நின்று இலங்கையை பார்த்ததாக சொல்லப்படும் இடம். அங்கு ராமரின் பாதங்கள் இருக்கின்றன. 'ஜடாதீர்த்தம்’ என்பது ராமன் தன் ஜடையை சுத்தம் செய்து கொண்ட இடம்.

தனுஷ்கோடி மணலும்கூட சாமிதான்!

ராமேஸ்வரத்திலிருந்து 18 கிலோ மீட்டர் தொலைவில் இருக்கிற தனுஷ்கோடியில்தான் ராமர் சம்பந்தப்பட்ட அனைத்தும் நடந்ததாக புராணம் சொல்கிறது. 1964-ம் ஆண்டு வரை புனித யாத்திரையாக வருபவர்கள், அதை நிறைவு செய்தது இங்கேதான். அந்த ஆண்டு அடித்த பெரும்புயலின்போது தனுஷ்கோடி நகரம் முற்றிலுமாக அழிந்து விட்டது. அங்கிருந்த சர்ச், பிள்ளையார் கோயில், ரயில்வே ஸ்டேஷன், ஊழியர் குடியிருப்பு, பொதுமக்கள் வசிப்பிடம் என எல்லாவற்றையும் கடல் கொண்டு போய்விட்டது. தனுஷ்கோடிக்கு சென்று கொண்டிருந்த ஒரு ரயிலும்கூட பயணிகளோடு கடலுக்குள் போய்விட்டது. அதிலிருந்தே யாத்திரை என்பது ராமேஸ்வரத்தோடு நின்றுபோய்விட்டது.

ராமேஸ்வரத்திலிருந்து பதினோரு கிலோ மீட்டர் தூரம் வரை பேருந்தில் வந்து, அங்கிருந்து 7 கிலோ மீட்டர் தூரம் பாரம் ஏற்றும் வேன் மூலமாக ஆளுக்கு 60 ரூபாய் கொடுத்து மூட்டை கணக்காக அடைபட்டு மாமனார், மாமியார் சகிதம் தனுஷ்கோடிக்கு வந்திருந்தார் சிங்கம்புணரியைச் சேர்ந்த சாந்தி சேகர். ''இங்கயிருந்த தெய்வங்களைத்தான், பிறகு ராமேஸ்வரத்துல பிரதிஷ்டை பண்ணினதா சொல்றாங்க. அதனாலதான் இவ்வளவு செரமப்பட்டு இங்க வந்திருக்கோம். கோயில், சிலைனு இங்க எதுவும் இல்லைனாலும், சீதாதேவி மணல்ல சிவலிங்கம் எழுப்பின இந்த தனுஷ்கோடி மணலையே சாமியா நெனச்சு கும்பிட்டுக்கறாங்க மக்கள்’’ என்றார் பயணம் தந்த களைப்பு மறந்து பக்தி பரவசத்தில்!

மீண்டும் கிடைத்த அரச வாழ்க்கை!

ராமேஸ்வரம் கோயிலின் ஆலய கைங்கர்யம் என்ற பொறுப்பில் இருக்கும் நம்புவைத்யா, ''ராவணனை வதம் செய்ததால தன்னை பீடிச்ச பிரம்மஹத்தி தோஷம் நீங்க (பிராமணரைக் கொன்றால், பிடிப்பதுதான் பிரம்மஹத்திதோஷம். ராவணன், பிரம்மனின் பேரனுடைய மகன் என்பதால், அவனும் பிராமணனே என்கிறார்கள்) இங்கே சிவபூஜை செய்தார் ராமர். அதனால அவரோட தோஷம் நீங்குச்சு. அதோட விபீஷணனுக்கு அரசப் பட்டம் கட்டப்பட்டதும் இங்கதாங்கறதால, இங்க வந்து வழிபடறவங்களோட பாவங்களும், தோஷங்களும் நீங்கி, அரச வாழ்க்கை அமையும்ங்கறது காலங்காலமா இருக்கற நம்பிக்கை.

சீதாதேவி சிவலிங்கம் செஞ்ச இந்த கடற்கரை மணலை எடுத்துப்போய் காசியில கங்கை நதியில கரைச்சுட்டு, அங்கயிருந்து கங்கை நீர் எடுத்து வந்து ராமநாதருக்கு அபிஷேகம் செய்றதுங்கறது இந்துக்களோட மிகப்பெரிய ஐதீகம். சேதுக்கரையில முன்னோர்களுக்கு தர்ப்பணம் செஞ்சா, அது அவங்களை மோட்சத்துக்கு அனுப்பி வைக்கும். சிவம், வைணவம்னு ரெண்டு பிரிவுக்கும் பொதுவான தலமாவும், தேசிய ஒருமைப்பாட்டுக்கு எடுத்துக்காட்டவும் விளங்கற இந்தப் புனித மண்ணுக்கு, நாள்தோறும் மக்கள் வெள்ளம் வந்துட்டே இருக்கு. இறைவன் அருள் தந்துட்டே இருக்கார்!’’ என்று கடவுளின் பெருமை சொன்னார்.

இடைத்தரகர்கள் உஷார்!

அபிஷேகங்களைச் செய்ய விரும்பும் பக்தர்கள், அவற்றுக்கான கட்டணங்களை முன்கூட்டியே செலுத்தி, நேரத்தை நிச்சயம் செய்து கொள்ளலாம். தேவையான அனைத்துப் பொருட்களும் ஆலயத்தின் உள்ளேயே கிடைக்கும். இடைத்தரகர்களிடம் ஏமாற வேண்டாம். இங்கிருக்கும் தீர்த்தங்கள் மற்றும் புனித இடங்களையெல்லாம் சுற்றுலா துறை அல்லது கோயில் மூலமாக முன்கூட்டியே தெரிந்து கொண்டு சுற்றிப் பார்ப்பது நல்லது. அதற்காக யாரையாவது நம்பினால், உங்களுடைய பர்ஸிலிருந்து அளவுக்கு அதிகமாக காசு கரைய வாய்ப்பிருக்கிறது... ஜாக்கிரதை!

எப்படிச் செல்வது?

தமிழ்நாட்டின் அனைத்துப் பகுதியியிலிருந்தும் நேரடி பேருந்துகள் உள்ளன. பேருந்து நிலையத்தில்இருந்து பத்து நிமிடத்துக்கு ஒருமுறை கோயிலுக்கு நகரப் பேருந்து செல்கின்றது. சென்னை, திருச்சி, மதுரை போன்ற முக்கிய நகரங்களில் இருந்து ரயில் வசதி உண்டு. ரயில் நிலையத்திலிருந்து, கோயிலுக்கு பேருந்து வசதிகள் குறைவு. ஆட்டோக்கள் உண்டு.

தங்குவதற்கு, கோயிலுக்குச் சொந்தமான அறைகள் நிரம்ப உண்டு. கூடவே, ஒவ்வொரு சமூகத்தாரும், ஒவ்வொரு மாநிலத்தாரும் அவரவர் சார்பில் மடங்களைக் கட்டியுள்ளார்கள். யாத்திரை வருகிறவர்கள் முன்கூட்டியே பதிவு செய்து அறை பெற்று வருவது நல்லது. தெரிந்தவர்கள், நண்பர்கள் மூலமாக 'அது நல்ல விடுதியா' என்று கேட்டுப் பதிவு செய்வது முக்கியம்.

கோயில் திறந்திருக்கும் நேரம் காலை ஐந்து முதல் பகல் ஒரு மணி வரை. மாலை மூன்று முதல் ஒன்பது மணி வரை. கோயில் அலுவலக தொலைபேசி எண்கள் 04573-221223, 221224.

கனவுகளை நனவாக்கும் கடவுள் தரிசனம்!
 
கனவுகளை நனவாக்கும் கடவுள் தரிசனம்!
கனவுகளை நனவாக்கும் கடவுள் தரிசனம்!
   
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism