பள்ளி, கல்லூரி, அலுவலகம், தொழில் என எல்லா வயதினருமே அவரவர்களின் தினசரி வாழ்க்கையின் வாழ்வியல் தேவைகளுக்காக ஓடிக்கொண்டே இருக்கிறார்கள். இந்தத் தொடர் ஓட்டம் ஒரு கட்டத்தில் அவர்களுக்குத் தீர்க்க முடியாத அலுப்பையும் அயர்ச்சியையும் தந்துவிடுகிறது. அத்தகைய சூழலில், அவர்களின் மனது தினசரி இயல்பிலிருந்து ஒரு மாறுதலைத் தேடுகிறது. அங்கேதான் அனைவருக்கும் அவசியமாகிறது ஒரு சுற்றுலா. அதனால்தான் அதனை 'எனர்ஜி கெய்னர் - பூஸ்டர்' என்கிறார்கள் மனவியல் நிபுணர்கள்.

சுற்றுலா பலவிதமான மனிதர்களையும் இடங்களையும் பார்க்க வைத்து, நம் மனதை லகுவாக்கி, சுறுசுறுப்படைய வைத்து, அடுத்து சில மாதங்களுக்கு உற்சாகத்துடன் ஓட வைக்கும், அதிகம் உழைக்க வைக்கும். அந்தச் சுற்றுலாவை சுகானுபவமாக்க சூப்பர் டிப்ஸ்கள் இங்கே...

டூருக்குப் போடுங்க பிளான்!

டூர் செல்வது என்று முடிவு பண்ணிய அடுத்த நிமிடமே வீடு முழுவதும் உற்சாகம் தொற்றிக் கொள்ளும். அந்த டூருக்கான முன் நடவடிக்கைகளை நேர்த்தியாக செய்துவிட்டால், அது சுற்றுலாவின் பதற்றங்களைக் குறைக்கும். உற்சாகத்தை கூட்டும்.

சரி, எப்படி பிளான் செய்வது?!

1. டூரில் நம் வீட்டு உறுப்பினர்கள் மட்டும்தான் போகிறோமா அல்லது யாருடன் இணைந்து போகிறோம் என்பதை முடிவு செய்தால்தான், அடுத்து வரும் விஷயங்களை பிளான் செய்வது சுலபமாகும்.

2. 'யார் யார் போகிறோம்' என்பதை முடிவு செய்த பிறகு, 'எங்கு போகிறோம்' என்பதை எல்லோரும் சேர்ந்து முடிவு செய்வது நல்லது. 'வருஷா வருஷம் அதே ஊட்டி, கொடைக்கானல்தானா..?' என்று பிள்ளைகளோ வீட்டுப் பெரியவர்களோ முனகினால்... கண்டிப்பாக மாற்றுத் திட்டம் அவசியம்.

3. வீட்டுக் குழந்தைகளுக்கும், பெரியவர்களுக்கும், உங்களுக்கும் பிடித்த இடங்களைத் தேர்வு செய்யுங்கள். அவை பட்ஜெட்டுக்குள் வருகிறதா என்பதையும் கணக்கில் எடுத்துக் கொண்டால், டூர் முடிந்து வந்ததும் மற்ற செலவுகளைக் கட்டுப்படுத்தும் 'நிதி நெருக்கடி சமாளிப்பு வேலைகளை' செய்ய வேண்டிய அவசியம் இருக்காது.

4. டூர் ஸ்பாட் முடிவாகிவிட்டதா? அடுத்தாக டூர் தேதியை முடிவு செய்யும் முன் வீட்டுப் பெண்களின் மாதவிலக்குத் தேதியையும் அறிந்து கொண்டு, அதற்கேற்றாற்போல் அட்ஜெஸ்ட் செய்து புரோக்ராமை பிளான் செய்தால், சிரமங்களைத் தவிர்க்கலாம்.

5. பஸ், ரயில் அல்லது டூரிஸ்ட் வேன்/கார் என பயணத்தை எதில் செய்யப் போகிறோம் என்பதை முடிவு செய்யவேண்டும். நிதி நிலைமை, வசதி, வீட்டில் உள்ளவர்களின் விருப்பம் என்று அனைத்தையும் அனுசரித்து இதில் முடிவு எடுப்பது நல்லது.

6. முடிவு செய்த பிறகு உடனடியாக பயண ஏற்பாட்டுக்கான வேலைகளில் இறங்கிவிட வேண்டும். பஸ், ரயில் எனில் அதற்கான டிக்கெட்டை முன்கூட்டியே பதிவு செய்வது அவசியம். டிக்கெட்டுகளை ஆன்லைனில் 'புக்' செய்வது சாத்தியம் என்றால் செய்யுங்கள். டிக்கெட்டோடு ஒரு நகலையும் தனித்தனியே பத்திரப்படுத்துங்கள்.

7. எந்த ஊரில் தங்கப் போகிறீர்களோ, அங்கு இருக்கும் தங்கும் வசதிகளைப் பற்றி முன்கூட்டியே தெரிந்து வைத்துக் கொள்வது நல்லது. 'போனதுக்கு அப்புறம் ரூம் பார்த்துக்கலாம்' என்றால்... பிரபலமான டூரிஸ்ட் ஸ்பாட்களில் ரூம் கிடைக்காமல் நடுரோட்டில் நிற்க வேண்டிய சூழ்நிலையும் வரலாம். எனவே, முடியும்பட்சத்தில் முன்கூட்டியே அறைகளையும் பதிவு செய்வதுதான் புத்திசாலித்தனம்!

8. 'என்னென்ன லக்கேஜ் எடுத்துப் போகிறோம்; எத்தனை செட் டிரெஸ் எடுத்துப் போகிறோம்' என்பதை முடிவு செய்து, முடிந்த வரை லக்கேஜை குறைப்பது பயணத்துக்கு மட்டுமல்ல... நமக்கும் நல்லது.

9. குடை, சன் கிளாஸ், தொப்பி, எமெர்ஜென்ஸி லைட், ஃபர்ஸ்ட் எய்டு கிட் என சில அத்தியாவசியப் பொருட்களை மறக்காதீர்கள். தேவைப்படுகிறதோ இல்லையோ... ஒரு நாப்கின் பாக்கெட் எடுத்துச் செல்வது பெண்களுக்கான நல்ல முன்யோசனைதான்.

10. வண்டியில் ஏறும்போதும், இறங்கும்போதும் கொண்டு வந்த லக்கேஜ் சரியாக இருக்கிறதா என்பதை ஒருவர் பொறுப்பாகக் கவனித்து வந்தால், 'ஐயோ, அந்த பேக்கை அங்கயே வச்சுட்டேனே' என்கிற பதைபதைப்பு இருக்காது. ஒரு இடத்துக்கு செல்வதாக ஒரு நேரத்தை தேர்ந்தெடுத்துவிட்டால், சரியாக அனைவரும் அந்த நேரத்துக்குத் தயாராகிவிட வேண்டும். இல்லையேல், மற்றவர்களைக் காத்திருக்க வைப்பதால், நாம் எரிச்சலூட்டும் நபராக பாவிக்கப்படுவோம்.

11. நெருங்கிய உறவுகளுடன் குழுவாக செல்வதாக இருந்தால், செலவு விஷயத்தில் எல்லோரும் பகிர்ந்து கொள்ள வேண்டியது முக்கியம். ஒருவரே செலவு செய்யும் வகையில் மற்றவர்கள் நடந்து கொண்டால், அடுத்த தடவை அப்படியரு பயணத்தை நீங்கள் நினைத்துப் பார்க்க முடியாமல் போகக்கூடும்.

12. சொந்தக்காரர்கள், நண்பர்கள் என்று யாராக இருந்தாலும்... முதலிலேயே மொத்தமாகத் தொகையை வசூலித்து, கடைசியில் கணக்குப் பார்த்து மீதியை திருப்பித் தருவதுபோல் ஏற்பாடு செய்து கொண்டால், பிரச்னைகளைத் தவிர்க்கலாம்.

டூர் லோன் வாங்குகிறீர்களா?!

வீடு கட்ட லோன், வண்டி வாங்க லோன், கல்யாணத்துக்கு லோன் என எல்லாவற்றுக்கும் லோன் தருபவர்கள் நம் டூருக்கும் லோன் தருகிறார்கள் தெரியுமோ?!

13. பர்சனல் லோன்கள்தான் டூர் லோன், டிராவல் லோன் என்ற பெயரில் வழங்கப்படுகிறது. கூடுமான வரையில் இதுபோன்ற லோன்களைத் தவிர்ப்பது நல்லது. இது அதிக கடன் சுமையை ஏற்றும் என்பதால் ஜாக்கிரதை.

14. எதிர்பாராமல் ஒரு இடத்துக்கு செல்ல வேண்டிய கட்டாயம் உருவாகிறது. அங்கே செல்ல அதிக பணம் தேவைப்படுகிறது. ஆனால், பணம் இல்லை என்கிற பட்சத்தில் மட்டும் கிரெடிட் கார்டில் லோன் எடுப்பதைவிட, பர்சனல் லோனை அவசரத்துக்கு எடுத்து பயன்படுத்திக் கொள்ளலாம். காரணம்... கிரெடிட் கார்ட் லோனைவிட, பர்சனல் லோனுக்கான வட்டி விகிதம் குறைவு. கிரெடிட் கார்டு லோனுக்கு 24 சதவிகிதத்துக்கும் அதிகமான வட்டி என்பதை நினைவில் கொள்ளுங்கள்.

15. உள்நாட்டு டூரோ, வெளிநாட்டு டூரோ... டிராவல் இன்ஷ¨ரன்ஸ் எடுத்துக் கொள்வது நல்லது. சில நாடுகளில் டிராவல் இன்ஷ¨ரன்ஸ் இருந்தால்தான் உள்ளே அனுமதிப்பார்கள். அது நமக்கும் நல்ல பாதுகாப்புதான். பெரும்பாலும் அனைத்து இன்ஷ¨ரன்ஸ் நிறுவனங்களும் டிராவல் இன்ஷ¨ரன்ஸ் தருகின்றன.

16. வேலை சம்பந்தமாகவோ அல்லது டூர் ஆசைக்காகவோ அதிகமாக ஊர் சுற்றுபவர்கள், மெடிக்கல் இன்ஷ¨ரன்ஸ் எடுத்துக் கொள்வது, எதிர்பாராத மருத்துவச் செலவைக் குறைத்து, கை கொடுக்க வேண்டிய நேரத்தில் கை கொடுக்கும்.

17. எப்போதும் அங்கீகரிக்கப்பட்ட டூர் ஆபரேட்டர்களைத் தேர்ந்தெடுப்பதே நல்லது.

18. டூர் பேக்கேஜை தேர்ந்தெடுக்கும்போது கேன்சல் சார்ஜையும் மனதில் வைத்து தீர்மானிக்க வேண்டும். காரணம், வெளிநாடுகளுக்குச் செல்ல கிட்டத்தட்ட 2 மாதத்துக்கு மேல் திட்டமிட்டுக் கொண்டிருப்போம். எதிர்பாராதவிதமாக கேன்சல் செய்ய வேண்டி வந்தால், கேன்சல் சார்ஜ் என்று அதிகமாக பணம் பிடிப்பார்கள். அதனை மனதில் வைத்து நல்ல டூர் ஆபரேட்டரைத் தேர்ந்தெடுக்க வேண்டும்.

19. சுற்றுலா சீஸன் நேரங்களில் டூர் பேக்கேஜுக்கு தரப்படும் தள்ளுபடிகளையும் பயன்படுத்திக் கொண்டால் பணம் மிச்சமாகும்.

20. சுற்றுலாத் தலங்களில் கூடுமான வரைக்கும் பணத்தை அதிகமாகக் கையில் வைத்திருக்காமல் டெபிட் கார்ட் மற்றும் கிரெடிட் கார்டில் பர்ச்சேஸ் செய்யும் வழக்கத்தை வைத்துக் கொள்ள வேண்டும். காரணம், எதிர்பாராமல் டெபிட் அல்லது கிரெடிட் கார்ட் தொலைந்தால் அடுத்த நொடியே கஸ்டமர்கேர் மூலமாக கார்டின் செயல்பாட்டை நிறுத்திவிடலாம். இதுவே பணம் தொலைந்தால், தேவையில்லாத அலைச்சலையும், பிரச்னையையும் எதிர்கொள்ள வேண்டியிருக்குமே!

21. இப்போது சுற்றுலா செல்வது எல்லோருக்கும் அத்தியாவசியம் என்பதால் மாதந்தோறும் அதற்கு என்று சேமித்து வைப்பது, நமது குடும்பத்தின் சந்தோஷத்துக்கு உதவியாக இருக்கும். எதிர்பாராத கடன் சுமையைத் தவிர்க்கலாம்.

நாம் டூரில்... நம் வீடு பாதுகாப்பில்!

சுற்றுலா செல்லும்போது பூட்டிச் செல்லும் நம் வீட்டுக்கான பாதுகாப்பை உறுதிப்படுத்திவிடுவது நலம். இப்படி...

22. டூருக்குச் செல்லும்போது நகைகள், விலை உயர்ந்த பொருட்கள், பத்திரங்கள் போன்றவற்றை பேங்க் லாக்கரில் வைத்துவிட்டுச் செல்லுங்கள். பட்டுப் புடவை, வெள்ளிப் பாத்திரம் போன்ற முக்கியமான பொருட்களாக இருந்தால், நெருங்கிய உறவினர் வீட்டில் கொடுத்துவிட்டுச் செல்லுங்கள்.

23. விலை உயர்ந்த பொருட்களை பேங்க் லாக்கரில் வைத்துவிட்டாலும், உங்கள் ஏரியா கூர்க்காவுடம் 'எக்ஸ்ட்ரா செக்யூரிட்டி ஃபேர்' கொடுத்து, உங்கள் வீட்டை அடிக்கடி நோட்டம் விட்டுக்கொள்ளச் சொல்லுங்கள்.

24. இன்னுமொரு அருமையான வழியும் இருக்கிறது. வெளியூருக்கு நீண்ட நாள் பயணமாக செல்வதென்றால், குடியிருக்கும் ஏரியாவுக்கு உட்பட்ட காவல் நிலையத்துக்குச் சென்று... எதற்காக, எத்தனை நாட்கள், எந்த ஊருக்குச் செல்லவிருக்கிறீர்கள் போன்ற விவரங்களை பெட்டிஷனாக எழுதிக் கொடுத்துவிட்டு, 'லாக்டு அவுட்' எனப்படும் ரெஜிஸ்தரில் கையெழுத்திட்டு, அங்கு இருக்கும் இன்ஸ்பெக்டரிடம் கொடுத்துவிடுங்கள். மறக்காமல் உங்கள் மொபைல் எண்ணையும் கொடுத்துவிட்டுக் கிளம்புங்கள்.

25. நீங்கள் சென்ற பிறகு, பூட்டிய உங்கள் வீட்டின் கதவில் 'பட்டா புக்' என்கிற நோட்புக்கை போலீஸார் வைத்து விடுவார்கள். தினமும் இரவு ரோந்து பணியில் ஈடுபடும் போலீஸார், உங்கள் வீட்டின் பாதுகாப்பை உறுதிசெய்து விட்டு, அந்த புக்கில் கையெழுத்திட்டுச் செல்வார்கள்.

சரியான சாப்பாடு... சந்தோஷமான டூர்!

பஸ், ரயில் நிறுத்தங்களில், செல்லும் இடங்களில் என்று கண்ணில் பட்டதை எல்லாம் வாங்கிச் சாப்பிட்டால், வயிற்றுக் கோளாறு ஏற்படலாம். இன்ஃபெக்ஷனால் சளி, ஜுரம் வரலாம். அது, டூரின் சந்தோஷத்தையே குலைத்துவிடும். எனவே, சாப்பாட்டு விஷயத்தில் கவனமும் கடிவாளமும் தேவை!

26. எல்லா வயதினரும் எண்ணெய்ப் பதார்த்தங்களை பயணத்துக்கு முன்பும், பயணத்திலும் தவிர்த்தால் 'தர்மசங்கடங்களை'த் தவிர்க்கலாம்.

27. காரில் நீண்டதூரம் பயணம் செய்யும்போது வண்டி ஓட்டுபவர் களைப்பாக இருப்பதாக உணர்ந்தால், உடனே காரை நிறுத்திவிட்டு சிறிது தூரம் வாக் சென்று, சூடாக டீ சாப்பிட்டுவிட்டுத் திரும்ப... புத்துணர்ச்சி கிடைக்கும்.

28. பயணத்தின்போது சாப்பிடும் அயிட்டங்களை, அது சூடாக இருக்கும்போதே சாப்பிட்டால், நோ ஜெர்ம்ஸ் தொல்லை.

29. தண்ணீர் மூலம் நிறைய வியாதிகள் பரவ வாய்ப்புள்ளது. எனவே, கொதிக்க வைத்து ஆறிய தண்ணீரை எடுத்துச் செல்வது நல்லது. லாங்க் டூரில் அது முடியாதபட்சத்தில், காரில் செல்பவர்கள் வீட்டிலிருந்தே சில 'பேக்கேஜ்டு வாட்டர் கேன்'களை எடுத்துச் செல்லலாம். மற்றவர்கள் தாங்கள் தங்கியிருக்கும் லாட்ஜ்களில் இருந்து வெளியே கிளம்பும்போதே, பாட்டில்களில் ப்யூரிஃபைடு தண்ணீர் பிடித்துச் செல்லலாம்.

30. உணவைப் பொறுத்தமட்டில் கூடுமானவரை காய்கறி உணவையே எடுத்துக் கொள்ளுங்கள். இறைச்சியைத் தவிர்ப்பது நல்லது. காரமான, மசாலாக்கள் கலந்த உணவுகளும் வேண்டாம்.

31. தேங்காய் சேர்த்த சட்னி வகையறாக்களைத் கொஞ்சம் தள்ளி வைப்பது நல்லது. கூடவே, ஹோட்டல்களில் சாப்பிடும்போது 'காசு கொடுத்துட்டோமே... வேஸ்டாயிடுமே...' என்று எல்லாவற்றையும் சாப்பிட வேண்டும் என்ற கட்டாயத்தை நீங்களே உருவாக்கிக் கொள்ளாதீர்கள்.

32. சாப்பிட்ட கொஞ்ச நேரத்தில், 'லேசா வயிறு சரியில்ல... ஒரு சோடா சாப்பிடலாம்' என்று சாப்பிட்டால்... அது தற்காலிக நிவாரணமே. பதிலாக வெதுவெதுப்பான நீர் அல்லது பால் அருந்துங்கள். பிரச்னை தலை காட்டாது.

33. வெளிமாநிலம் அல்லது வெளிநாட்டுக்குச் சென்று அங்குள்ள உணவு முறையையும் அப்படியே கடைபிடிப்பவர்கள், அந்த உணவு ஓவர் டோஸானால் என்ன செய்வதென்பதையும் அவர்களிடம் கேட்டுத் தெரிந்துகொள்ள வேண்டும். நிறைய கடலை சாப்பிட்டால் வெல்லம் சாப்பிட வேண்டும் என்பதில் தொடங்கி, சில வகை அசைவ வகைகளை சாப்பிடுவோர் 4 மாதங்களுக்கு ஒருமுறை கட்டாயம் எடுத்துக்கொள்ள வேண்டிய மருந்துகள் வரை பலவும் இதில் அடங்கி உள்ளன.

பெரியவர்களுக்கும் குழந்தைகளுக்கும்

சுற்றுலா சுகமாக..!

மருந்து, மாத்திரை சாப்பிட்டுக் கொண்டிருக்கும் பெரியவர்களுக்காகவும், சின்ன குழந்தைகளுக்காகவும் இவை...

34. நீண்டகால வியாதிகளான சர்க்கரை குறைபாடு, உயர் ரத்த அழுத்தம், இதய நோய், அலர்ஜி மற்றும் ஆஸ்துமா உள்ளவர்கள் தினமும் நேரத்துக்கு நேரம் உட்கொள்ள வேண்டிய மாத்திரைகளை முதலில் எடுத்து வைத்துக் கொள்ள வேண்டும். துணிமணிகளை எடுத்து வைப்பதற்கு முன்பே மாத்திரைகள் அடங்கிய பெட்டியை எடுத்து வைக்க வேண்டியது அவசியம்.

35. நான்கு நாட்கள் டூர் செல்வதாக இருந்தால் கூடுதலாக... அதாவது, டபுள் டோஸ் எடுத்துச் செல்வது நல்லது. இது ஒரு முன்னெச்சரிக்கை நடவடிக்கையே. டூர் போன இடத்தில் இரண்டு நாட்கள் அதிகமாகிவிட்டால்... இந்த மருந்து, மாத்திரை கை கொடுக்கும். நீங்கள் போகும் ஊரில் உங்களுக்குத் தேவைப்படும் மருந்து எப்போதும் கிடைக்கும் என்பதற்கு எந்த உத்தரவாதமும் கிடையாதுதானே?!

36. பெரும்பாலான வியாதிகள் உணவு, நீர், காற்று மூலமே பரவுகின்றன. எனவே, இவற்றின் மூலம் நோய் பரவாதவாறு பார்த்துக்கொள்ள வேண்டியது அவசியம்.

37. சர்க்கரை குறைபாடு உடைவர்கள், இதய நோயாளிகள் போன்றவர்கள்... தாங்கள் எந்த அளவு, எத்தனை வேளை மருந்து, மாத்திரை சாப்பிட வேண்டும் என்ற குறிப்புகளை ஒரு கார்டில் எழுதி, ஐ.டி. கார்டு போல கழுத்தில் மாட்டிக் கொள்ளலாம். ஒருவேளை அவர்கள் தனித்துவிடப்படும் சூழலில் அவர்களுக்கு முதலுதவி அளிக்க இந்த கார்டு உதவும்.

38. மேலும் உங்களைப் பற்றிய விவரங்கள் அடங்கிய ஏதாவது ஒரு ஐ.டி. கார்டு, விசிடிங் கார்டு அல்லது நெருங்கிய உறவினரின் தொலைபேசி எண்ணையும் ஒரு அட்டையில் எழுதி பாக்கெட்டில் வைத்துக் கொள்ளலாம்.

39. ஆஸ்துமா நோயாளிகள் கைவசம் இன்ஹேலர், சிரிஞ்ச் மற்றும் லைஃப் சேவிங் டிரக்ஸ் எடுத்துச்செல்வது நல்லது. இது டூர் செல்லும் நேரங்களில் அவர்களுக்கு அவசர சிகிச்சை அளிக்க உதவும்.

40. சர்க்கரை குறைபாடு உள்ளவர்கள் (லோ சுகர்) பேருந்திலோ அல்லது ரயிலிலோ பயணம் மேற்கொள்ளும்போது கொஞ்சம் சர்க்கரையையோ அல்லது சில சாக்லேட்களையோ எடுத்துச் செல்லலாம். சுகர் குறைவது போல் தெரிந்தால்... அதைச் சாப்பிட்டு சரிப்படுத்தலாம்.

41. நீண்ட தூர டூரில் பயண வழிகளில் உள்ள மருத்துவமனைகளைப் பற்றிய விவரங்களைத் தெரிந்து கொண்டால், அவசரத்துக்கு யாருக்கு வேண்டுமானாலும் கை கொடுக்குமே!

42. மெடிக்கல் இன்ஷ¨ரன்ஸ் எடுத்திருந்தால் அதற்கான கார்டை மறக்காமல் எடுத்துச் செல்லுங்களேன்.

43. கர்ப்பக் காலத்தில் பெண்கள், முதல் மூன்று மாதங்களிலும், இறுதி மூன்று மாதங்களிலும் பயணத்தைத் தவிர்ப்பது நல்லது. சின்னதாக ஒரே ஒரு நாள் டூர்தான் என்றால், ரயில் வசதி இருந்தால் ஓகே! பேருந்தை விட்டால் வழியே இல்லை என்றால்... முன்புறம் அமர்ந்து செல்லலாம்.

44. வெளியூர் பயணங்களின்போது குழந்தைகளுக்கு நீர்ச்சத்து இழப்பு (டிஹைட்ரேஷன்) ஏற்பட வாய்ப்புள்ளது என்பதால், அடிக்கடி தண்ணீர் குடிக்கவைக்க வேண்டும். சாதாரணமாகவே ஒரு நாளைக்கு இரண்டிலிருந்து மூன்று லிட்டர் தண்ணீர் அருந்த வேண்டியது அவசியம். அப்படியிருக்க பயணங்களின்போது கூடுதலாக தண்ணீர் அருந்துவது நல்லது. சுற்றுலாவின்போது நீண்டதூரம் நடக்கவோ, ஓடி ஆடி விளையாடவோ அல்லது மலைப்பகுதியில் ஏறி இறங்க வேண்டியிருந்தால்... கூடுதலாக அருந்தும் தண்ணீர், 'டிஹைட்ரேஷன்' ஏற்படாமல் கைகொடுக்கும். மேலும் பிஸ்கட், குளுக்கோஸ் போன்றவற்றையும் சாப்பிடக் கொடுக்க வேண்டும்.

45. சிறிய டெட்டால் பாட்டில், கொஞ்சம் காட்டன், சில பேண்ட்- எய்டுகள், ஆயின்ட்மென்ட், அவசரத்துக்கு உதவும் பாரசிட்டமால் மாத்திரைகள், இருமல் சிரப் என்று சின்னதாக ஒரு ஃபர்ஸ் எய்ட் பாக்ஸ் கட்டாயம் எடுத்துச் செல்வது ஆபத்துக்கு கைகொடுக்கும்.

பட்ஜெட்டுக்கு கைகொடுக்கும் மடங்கள், அரசு மாளிகைகள்!

ஹோட்டல்கள், லாட்ஜ்கள் மட்டுமல்ல, சுற்றுலாத் தலங்களில் மடங்களும் அரசு மாளிகைகளும்கூட நமக்காகத்தான் காத்திருக்கின்றன. அவற்றை வசப்படுத்தி தங்குமிடத்துக்கான செலவுகளைக் குறைப்பதற்கான சில வழிகாட்டல்கள் இங்கே...

46. ஊட்டி, கொடைக்கானல் போன்ற மக்கள் மிகவும் விரும்பும் சுற்றுலாத் தலங்களுக்கு சீஸன் சமயங்களில் இருப்பிடம் பெரிய பிரச்னையாகவும், பெரிய செலவாகவும் இருக்கும். ஆனால், அங்கே உள்ள 'அரசு மாளிகைகள்' செலவு குறைந்த, பாதுகாப்புமிக்க தங்குமிடங்கள் என்பது உங்களுக்குத் தெரியுமா? அவற்றில் முன்பதிவு செய்ய முயற்சி செய்யுங்கள்.

47. சில மலைப்பிரதேச சுற்றுலாத் தலங்களின் மாளிகைகளில் முன்பதிவு முறை இருக்காது. வனத்துறையினரின் அனுமதி கடிதம் இருந்தால் தங்க முடியும். மாவட்ட அல்லது மாநில வனத்துறை அலுவலகம் மூலமாக இத்தகைய அனுமதியைப் பெறமுடியும்.

48. முதுமலை போன்ற சில சுற்றுலாத் தலங்களில் அரசு மாளிகைகள் மட்டுமே வசதியும் பாதுகாப்பும் மிக்கவை. இதுபோன்ற இடங்களில் தங்குமிடம் உறுதியான பின்பே பயணத்தைத் தொடங்குங்கள்.

49. கோயில்களைச் சுற்றிப் பார்க்க ஆன்மிக சுற்றுலா செல்வோர், கோயிலின் தேவஸ்தானத்தை அணுகினால், பொருத்தமான தங்குமிடத்தை ஏற்பாடு செய்து தருவார்கள்.

50. தமிழ்நாடு முழுவதும் அரசுக்குச் சொந்தமான பயணியர் மாளிகைகள் உள்ளன. முறைப்படி அனுமதி பெற்று இவற்றில் தங்க முடியும். இதற்கு, மக்கள் பிரநிதிகள் மற்றும் அதிகாரிகள் மூலம் சிபாரிசு கடிதம் வாங்கி வைத்துக்கொள்வது நலம். தங்கும்போது பிரச்னைகள் ஏற்படுவதையும் இது தடுக்கும்.

51. கேரளா போன்ற இடங்களில் சிபாரிசு கடிதம் உதவாது. இடம் வேண்டுமானால் முறைப்படி வரிசையில்தான் நின்றாக வேண்டும். அங்கே அமைச்சரின் சிபாரிசு கடிதத்தைவிட, தேவசம் போர்டின் விதிமுறைகளையே அதிகம் மதிப்பார்கள்.

52. பல சுற்றுலாத் தலங்களில் பண்ணை வீடுகளைக் கட்டிவிட்டு, உரிமையாளர்கள் எங்கோ வெளியூரில் இருப்பதே நடக்கிறது. உரிமையாளரிடம் பேசி அனுமதி வாங்கிவிட்டால், பண்ணை வீடுகளில் வசிக்கும் அருமையான அனுபவம் உங்களுக்குக் கிடைக்கலாம்.

53. காசி, ராமேஸ்வரம், கன்னியாகுமரி, பழநி போன்ற தலங்களில், சில அமைப்புகளின் மடங்கள் இருக்கும். 'மடம்' என்றதும் யோசனை வேண்டாம். இவற்றில் மூன்று நட்சத்திர ஹோட்டல்களின் வசதி கொண்ட மடங்களும் உள்ளன. தகுதிக்கேற்ப தேர்ந்தெடுத்து தங்கிக் கொள்ளலாம்.

54. மடங்களில் தங்குவதற்கு, அதனை நடத்தும் அமைப்பின் அனுமதியே போதும். அதில் அதிக வசதியான ரூம்களைத் தேர்ந்தெடுக்க, முன்பணமும், முன்பதிவும் தேவைப்படலாம்.

55. செட்டிநாட்டுக்குச் சென்றால் பெரிய காரை வீடுகளிலும், தஞ்சை, மதுரை போன்ற பகுதிகளுக்குச் சென்றால் பாரம்பரிய அரண்மனை வீடுகளிலும் தங்க இடம் பாருங்கள். அவை வசதியானவை என்பதோடு சுற்றுலா அனுபவத்தையும் இனிமையாக்கும்.

ஹோட்டல், லாட்ஜ்... உஷார்!

சந்தோஷத்துக்காக டூர் போய்விட்டு பிரச்னைகளோடு திரும்பக்கூடாது அல்லவா? கூடவே, இப்போது உங்களின் ஒவ்வொரு அசைவையும் உங்களின் அனுமதி இல்லாமலேயே உலகம் பார்க்குமளவுக்கு வளர்ந்து கிடக்கின்றன தொழில்நுட்ப வளர்ச்சிகள். எனவே, ஹோட்டல், லாட்ஜ் என்று நீங்கள் தங்கும் இடங்களில் 'முன்ஜாக்கிரதை முத்தண்ணா'வாக இருக்க, பிடியுங்கள் இந்த டிப்ஸ்களை...

56. வெளி மாநிலங்களுக்கு குடும்ப சுற்றுலா செல்லும்போது அனைவரும் ஒன்றாக செல்வதைவிட, வீட்டு ஆண்களில் யாராவது ஒருவர் முன்பாகவே சென்று இருப்பிடத்தையும் அதன் வசதிகளையும் உறுதி செய்து கொண்டு பிறரை அழைப்பது நலம்.

57. பல சுற்றுலாத் தலங்களில்... ஹோட்டல், லாட்ஜ்களில் உள்ளூர்வாசிகளுக்கும் வெளியூர்வாசிகளுக்கும் தனித்தனி விகிதங்களில் கட்டணங்கள் வசூலிக்கப்படுகின்றன என்பதால் ஜாக்கிரதை. உள்ளூரில் யாராவது தெரிந்தவர் இருந்தால், ரூம் வாடகை பற்றி ஒருமுறை விசாரித்துக் கொள்ளலாம்.

58. நீங்கள் எப்போது வெளியே செல்வீர்கள், எப்போது திரும்பி வருவீர்கள் என்ற நேரக் கணக்கு நீங்கள் தங்கியிருக்கும் லாட்ஜின் மேனேஜர், ரூம் சர்வீஸ் பணியாட்களுக்கு அப்பட்டமாகத் தெரியாமல் பார்த்துக் கொள்ளுங்கள்.

59. உள்ளூர்வாசி, கைடு, ஆட்டோக்காரர்கள் சொல்லும் இடங்களில் தங்குவதும், அவர்களோடு வெளியே சுற்றிப் பார்க்க கிளம்பும்போது, ஏதாவது இடறலாகத் தோன்றினால்... ஸ்டாப் கோயிங்.

60. ரூம் எடுத்த உடனேயே தூங்காமல், அந்த இடம் எவ்வளவு பாதுகாப்பானது என்பதை சோதித்து, அங்கே ஏதாவது சட்டத்துக்குப் புறம்பான பொருட்கள் இருக்கின்றனவா என்று ஒரு பார்வை பாருங்கள்.

61. காம்பவுண்ட் சுவரை ஒட்டியும், மரத்தை ஒட்டிய ஜன்னல் உள்ள அறைகளையும் தேர்ந்தெடுப்பது ஆபத்துக்கு நாமே வாசல் வைப்பது மாதிரி. அங்குதான் தங்கியாக வேண்டும் எனும்பட்சத்தில் அந்த ஜன்னலைத் திறக்காமல் இருப்பது நல்லது.

62. உங்கள் அறைக்கும் அடுத்த அறைக்குமிடையே பொதுவான கதவு இருந்தால், அதை அடைத்து தாழ்ப்பாள் போட்டுக் கொண்டால் எல்லாருக்குமே நல்லது.

63. கதவு, ஜன்னல் ஆகியவற்றில் உள்ள தாழிடும் வசதிகள் சரியாக இருக்கின்றனவா என்பதைப் பரிசோதித்துக் கொண்டால், நமக்குச் சோதனைகள் ஏற்படாது. சாதாரண லாட்ஜ்களாக இருந்தால்... உங்கள் அறைக்கு தனி பூட்டை பயன்படுத்துங்கள்.

64. நீங்கள் சத்தம் போட்டுக் கத்தினால்கூட வெளியே கேட்காத 'பெட்டி' போன்ற அறைகளைத் தவிர்த்துவிடுங்கள். இரண்டு, மூன்று வழிகளில் காற்றோட்டம் கிடைக்கக்கூடிய அறைகளாகப் பார்த்துத் தேர்ந்தெடுங்களேன்.

65. உங்களிடம் எவ்வளவு பணம், கேமரா போன்ற விலைமதிப்பான பொருட்கள் உள்ளன என்பதையெல்லாம் ஹோட்டல் டாக்ஸி டிரைவர் தொடங்கி, ரூம் சர்வீஸ் பாய் வரை தெரியுமாறு கடை விரிக்காதீர்கள்.

66. ரூம் சர்வீஸ் ஆட்கள் உள்ளே வரும்போது, உங்கள் அறையை நன்கு திறந்து வைத்துக் கொள்ளுங்கள். அவர்கள் முன்பாக உங்கள் சொந்த விஷயங்களை விவாதிப்பதையும் பண விஷயங்களை விலாவாரியாகப் பேசுவதையும் தவிருங்கள்.

67. சூப்பர் ஐடியாவாக, அந்த ஊர் லோக்கல் போலீஸ் ஸ்டேஷன் எண்ணை வாங்கி வைத்துக் கொண்டால் ஆபத்து நேரத்தில் கைகொடுக்கும்.

68. ஒரு சில சுற்றுலாத் தலங்களில் சமூக, அரசியல் பிரச்னைகள் காரணமாக அடிக்கடி கலகம் வெடிக்கும். அத்தகைய இடங்கள் பற்றி செய்திகளில் நீங்கள் படித்தறிந்திருந்தால்... அவற்றைத் தவிர்த்துவிடலாம். அல்லது, காவல் நிலையம் அருகே உள்ள தங்கும் இடங்களையோ அல்லது பாதுகாக்கப்பட்ட தங்குமிடங்களையோ தேர்ந்தெடுத்து தங்கலாம்.

69. சமீபத்திய ஆய்வுகள், நட்சத்திர அந்தஸ்து ஹோட்டல் அறைகள்தான் பாதுகாப்பு குறைந்தவை என்கின்றன! இருட்டிலும் படம் பிடிக்கும் தொழில்நுட்பம் உள்ள கேமராக்கள் புழக்கத்தில் உள்ளன என்பதை மறக்க வேண்டாம்.

70. குறிப்பாக, அந்த ஆபாச ஆபத்திலிருந்து தப்ப, அறைகளில் இருக்கும் கண்ணாடிகளில் கவனம் தேவை. பாதரசம் பூசப்படாத கண்ணாடிகள் என்றால் மிகமிக எச்சரிக்கையாக இருக்க வேண்டும். அவற்றின் முன்பாக உடை மாற்றுவதைத் தவிர்க்கவும். ஸ்கிரீன் அல்லது துணியால் அந்தக் கண்ணாடியை மூடி விட்டால் ஆபத்தில்லை.

71. குளிக்கும்போது, ஷவரில் குளிக்காமல் அதைத் துணியால் மூடிவிட்டு, வாளியில் நீர் பிடித்துக் குளிக்கலாம். ஷவரில் கேமராக்கள் பொருத்தப்படுகின்றன என்பதால் ஜாக்கிரதை! கூடவே, வீட்டில் உள்ளது போல 'சுதந்திரமாக' குளிக்காமல், உடை மாற்றும்போதும் ஜாக்கிரதையாக இருப்பது நல்லது.

72. கூரையில் இருந்து தொங்கும் அலங்கார விளக்குகள், சுவரில் பொருத்தியுள்ள அலங்கார விளக்குகள், பொருட்கள் மீதும் ஒரு கண் இருக்கட்டும். அவை, உங்கள் முன்பு திறந்து கிடக்கும் ஒரு பாதுகாப்பற்ற ஜன்னல் என்பதை மறக்க வேண்டாம்.

ஷாப்பிங்கில் ஏமாறாதீர்கள்!

ஏமாற்றுபவர்கள் எல்லா இடங்களிலும் இருப்பார்கள். சுற்றுலாத் தலங்களில் கொஞ்சம் கூடுதலாக. ஆம்... டூர் சென்ற இடத்தில் நம்மிடம் பெருகும் ஆர்வத்தையும் அவசரத்தையும் பயன்படுத்திக் கொண்டு, சில வியாபாரிகள் போலி பொருட்களையும், பொருட்களின் விலையை ஏற்றியும் நம் தலையில் கட்டலாம். எனவே, முடிந்தவரை ஜாக்கிரதையாக இருக்கலாமே... இப்படி...

73. சுற்றுலாத் தலங்களில் ஷாப்பிங் செல்லும்போது, பார்ப்பதையெல்லாம் வாங்கிவிட நினைக்காமல், அந்த தலங்களில் மட்டுமே கிடைக்கக்கூடிய அரிய பொருட்களை வாங்குங்கள். அதுவும் நமக்கு அவையெல்லாம் எந்த அளவுக்குப் பயன்படும் என்பதை உறுதிப்படுத்திக் கொண்டு வாங்குங்கள். அவை தரமானவைதானா போன்ற அலசல்களுக்குப் பின் வாங்குங்கள்.

74. நீங்கள் லாபமான விலைக்கு பொருளை வாங்கி வர விரும்பினால், தலங்களை சுற்றிப் பார்க்க ஒதுக்கும் நேரத்தைப் போலவே, அந்த ஊர் ஃபேமஸ் பொருட்களையும் சுற்றி பார்த்து வாங்க நேரம் ஒதுக்க வேண்டியது அவசியம்.

75. பொருளின் விலை அதிகம் என்றால், 'ஏன் அதிகம்?' என்று கேளுங்கள். விலை குறைவு என்றால், 'ஏன் குறைவு?' என்று கேளுங்கள். 'ஏன்' என்ற கேள்வியில்தானே எல்லாம் இருக்கிறது..!

76. பழங்கள், காய்கறிகள் போன்றவற்றை பெரும்பாலும் விளையும் இடத்தில் வாங்குங்கள். 'சேலத்து மாம்பழம் தித்திக்கும் மாம்பழம்' சேலத்தில் விளைவது அல்ல... தர்மபுரி மாவட்டத்தில்தான் என்பது தெரியுமா! அதன் சுற்றுப்புற தலங்களில், சேலம் விலையைவிட குறைவான விலைக்குக் கிடைக்கக் கூடியவை.

77. துணி, பாத்திரங்களை டூரிஸ்ட் ஷாப்பிங் ஏரியாக்களைவிட, அந்த பிரபல ஊரின் உள்ளூர் சந்தையில் வாங்கினால் காசு மிச்சமாகும்.

78. பெருநகரங்களில் சந்தைக்கு என்றே தனி இடங்கள் இருக்கும், உதாரணமாக, டெல்லியை எடுத்துக் கொண்டால் இந்தியாவிலேயே மிகக் குறைந்த விலைக்கு காலணிகளை விற்கும் 'கரோல் பாக்' பகுதியும், வேலைப்பாடு மிக்க வெள்ளிப் பொருட்களுக்கு என்றே 'சாந்தினி சவுக்' பகுதியும் அங்கு உண்டு. ஆனால், இங்கு விலையைக் குறைத்துக் கேட்கும் கலை தெரிந்தவராக இருக்க வேண்டும்.

79. செய்யும் இடத்திலேயே வைத்து கலைப் பொருட்களை வாங்க சந்தர்ப்பம் கிடைத்தால், பேக்கிங் பற்றிக் கவலைப்படாதீர்கள். அவர்களே பார்த்துக் கொள்வார்கள். கைவினைஞரிடமே அந்தப் பொருளின் முழுச் சிறப்பையும் கேட்டுத் தெரிந்து கொள்ளுங்கள். அவரின் முகவரி மற்றும் தொலைபேசி எண்ணையும் வாங்கி வைத்துக் கொள்ளுங்கள்.

80. ருத்திராட்சம், பான லிங்கம், ஸ்படிகம் போன்ற ஆன்மிகப் பொருட்களை சோதித்து தேர்ந்தெடுப்பது கடினம். அதனைப் பற்றிய விவரம் அறிந்தவர்களை உடன் வைத்துக் கொள்வது ஏமாறுவதைத் தடுக்கும்.

81. எலெக்ட்ரானிக்ஸ் பொருட்களை சுற்றுலா தலங்களில் வாங்குவதை தவிர்க்கலாம். பின் அதில் ஏதாவது பிரச்னை என்றால், மீண்டும் நாம் அங்கு செல்வது என்பது இயலாத காரியம்.

82. சுற்றுலாத் தலங்களில் உணவுப் பொருட்களை வாங்கி, நம் ஊருக்கு வந்து சாப்பிடுவதைவிட அங்கேயே சாப்பிட்டு விடுவது நல்லது. ஊட்டியின் 'ஹோம் மேட் சாக்லேட்டுகள்', ஏற்காட்டின் 'தேன் கலந்த அன்னாசி கலவை' ஆகியவற்றை அப்போதே சாப்பிட்டால்தான் நல்ல சுவையோடு இருக்கும்.

83. அரிய வகை தாவரம், மரப்பட்டை, மான் கொம்பு போன்ற எதையும் ஆர்வக்கோளாறில் வாங்கினால், வனத்துறையினருக்கு பதில் சொல்ல வேண்டி வரும் என்பது நினைவில் இருக்கட்டும்.

84. சுற்றுலா தலங்களில் 'இது இப்படி...' என்று பிறர் சொல்வதை அப்படியே நம்பி விடக்கூடாது. கொல்லிமலைப் பகுதிகளில் பாறை மீது படர்ந்து வளரும் 'முடவன் ஆட்டுக் கிழங்கு' என்ற கிழங்கை, உள்ளூர்வாசிகள் உடல்வலிக்கு காய்ச்சிக் குடிப்பார்கள். இப்போது வனத்துறை, கிழங்கை அழிக்கக் கூடாதென தடைவிதித்து உள்ளது. இந்நிலையில், 'தாம்பத்யத்துக்கு உகந்த கிழங்கு' என யாரோ கொளுத்திப்போட, அதிக விலை கொடுத்து அதை வாங்கி பலரும் ஏமாறுகிறார்கள். இது சட்டவிரோத செயலும்கூட!

85. ஓவியங்கள், சுவர் ஃபிரேம்கள், தரை விரிப்பு போன்றவற்றை வாங்கும் எண்ணம் இருந்தால் கிளம்பும்போதே வீட்டின் சுவரையும் தரையையும் அளவெடுத்து வைத்துக் கொண்டால், 'ஆஹா... காசு போட்டு வாங்கிட்டு வந்தது வீணாபோச்சே...' என்ற புலம்பல் இருக்காது.

86. நம் ஊரில் முந்நூறு ரூபாய்க்கு கிடைக்கும் சுடிதாரை, சுற்றுலா செல்லும் இடத்தில் நானூறு ரூபாய் கொடுத்து வாங்கத் தேவையே இல்லை. 'கோவாவில் வாங்கினோனக்கும்' என்று பெருமையடிக்க... நூறு ரூபாயை வெட்டியாக எதற்காக இழக்க வேண்டும்?

ஜாலி ஓகே... ஓவர் ஜாலி..?!

டூர் என்றாலே ஒரு ஜாலி மூட் நம்மை சுற்றுக்கொள்ளும். ஆனால், அந்த உற்சாகம் எல்லை மீறினால், பிரச்னைகள்தான். கூடவே, நம் நடத்தை எல்லா இடங்களிலும் முக்கியம் எனும்போது, அங்கும் அப்படியேதானே?!

87. டூரில் உங்களுடன் வருபவர்களுக்கு உங்களைப் பற்றி ஒரு மதிப்பான இமேஜ் இருக்கலாம். சுற்றுலா முழுவதும் அந்த இமேஜுக்கு வண்ணம் பூசுவதாக இருக்கட்டும்... உங்கள் வார்த்தைகளும் செயல்களும். எனவே, 'ஜாலியா பேசறேன்' என்று வரம்பு மீறிய வார்த்தைகளைத் தெளிக்காதீர்கள்.

88. உங்கள் வீட்டு ஆண்கள் சுற்றுலா குஷியில் 'பானம்' சாப்பிடுவதை அனுமதிக்காதீர்கள். உடன் வந்திருக்கும் உறவினர்களோ நண்பர்களோ, 'அவருக்கா இந்த பழக்கம், எனக்குத் தெரியவே தெரியாதே...' என்று உங்கள் கணவரைக் குற்றவாளியாகவும், உங்களை பாவமாகவும் பார்க்கக் காரணமாகி விடாதீர்கள்.

89. மனசு ஜாலியாக இருக்கட்டும். ஆனால், உங்கள் உடை மரியாதை பெற்றுத் தருவதாக இருக்கட்டும். எனவே, 'எல்லா சூழ்நிலையிலும் கண்ணியமானவர்' என்ற எண்ணத்தை உறுதி செய்யுங்கள். 'டூர்தானே..?' என்று அதுவரை உங்களுக்குப் பழக்கப்படாத ஸ்லீவ்லெஸ், த்ரீ ஃபோர்த் பேன்ட்-ஐ எல்லாம் முயற்சிக்காதீர்கள்.

90. வீட்டு இளசுகள், சுற்றுலாவில் தன்னுடன் வந்திருக்கும் உறவினர், நண்பர் குடும்பத்துப் பெண்ணுக்கு தங்களின் காதலை சொல்லும் இடமாக டூரை உருவாக்கி, மொத்த சுற்றுலாவுக்கும், சந்தோஷத்துக்கும் குண்டு வைக்காதீர்கள்.

91. நாம் சுற்றுலா போகும் இடத்தை நாம் பாதுகாக்கா விட்டாலும் அதற்கு எந்தத் தீங்கும் நேராமல் பாதுகாப்பது அவசியமில்லையா..? அதற்கு அதிகமாக நாம் ஒன்றும் செய்ய வேண்டாம். அந்த அழகான சூழலை அசிங்கப்படுத்தாமல் இருந்தால் போதும்... குப்பைகளை, பிளாஸ்டிக் கவர், பாட்டில்களை கொட்டாமல்.

92. நாகரிகத்தின் அடையாளம், 'குப்பைகளை இங்கே போடாதீர்கள்' என்றால் அங்கு போடாமல் இருப்பதுதான். இதைப் பின்பற்றாமல் போனதால்தான் கொடைக்கானலில் உள்ள 'குணா குகை'யை மூடிவிட்டார்கள். இன்னொன்றையும் மூட நாமும் காரணமாக வேண்டுமா..?!

93. தங்கியிருக்கும் அறையிலிருந்து வெளியே போகும்போது குடிநீர் குழாய், லைட், ஃபேனை மறக்காமல் ஆஃப் செய்து விட்டுப்போனால் மின்சாரத்தை மிச்சப்படுத்தலாம். சாதாரண இடங்களைவிட, இங்கு தண்ணீர், மின்சாரத்தின் தேவை அதிகமல்லவா?! 'அதுதான் நிறைய பணம் கொடுத்து ரூம் எடுத்திருக்கிறோமே...' என்றொரு எண்ணம் தோன்றினால், 'நாம் வீணடிப்பது இயற்கையின் சொத்து' என்பதை நினைவூட்டிக் கொள்ளுங்கள்.

எஜுகேஷன் டூர் இனிமையாக..!

'ஸ்கூல் எக்ஸ்கர்ஷன்', 'காலேஜ் எஜுகேஷனல் டூர்' என பள்ளி, கல்லூரி டூர் நம் ஆயுளுக்கும் பசுமை நினைவுகளை அள்ளிக் கொடுக்கும் இனிமையான பயணங்கள். அந்த இனிமை நிலைக்க...

94. 5-10 வயது குழந்தைகளை அழைத்து செல்லும் பள்ளிகள், குழந்தைகளை பள்ளி யூனிஃபார்மிலேயே அழைத்துச் சென்றால் எவ்வளவு கூட்டமாக இருந்தாலும் அவர்களை ஈஸியாக அடையாளம் கண்டுபிடித்து விடலாம். யூனிஃபார்மோடு பள்ளியின் ஐ.டி கார்டு, அம்மா-அப்பா பெயர், முகவரி, செல் நம்பர் எழுதிய கார்டையும் குழந்தைகளிடம் கொடுத்து வைப்பது நல்லது.

95. சிறு குழந்தைகளை தகிக்கும் வெயிலில் அழைத்துச் சென்று களைப்படைய வைப்பதைவிட, ஒரு சுற்றுலா இடத்தை குறைத்துக் கொண்டு, வெயில் குறைவாக உள்ள காலையிலும் மாலையிலும் அழைத்துச் சென்றால் அவர்கள் என்ஜாய் பண்ணுவார்களே..!

96. ஒருவேளை, குழந்தை வழி தெரியாமல் எப்படியாவது மிஸ் ஆகிவிட்டால், கலவரமடையாமல் அருகிலுள்ள போலீஸ்காரரிடம் சென்று தங்கள் பள்ளிப் பெயர், ஊர் பெயரை சொல்ல வேண்டும் என, டூருக்குப் புறப்படும்போதே குழந்தைகளிடம் தெளிவாக சொல்லி வைக்கலாம்.

97. கல்லூரி மாணவர்கள் படிப்புக்காக சுற்றுலா செல்வது... படிக்கும் விஷயங்களைவிட பார்க்கும் விஷயங்கள் எளிதாக மனதில் பதியும், ஈஸியாகப் புரியும் என்பதற்காகத்தான். இதைப் புரிந்து கொண்டு 'இதெல்லாம் எவன் பார்ப்பான்' என கிளாஸைக் 'கட் அடிப்பது' போல இந்த ட்ரிப்பின் வகுப்புகளையும் கட் அடிக்காமல் இருந்தால் அதன் பலன் தக்க சமயத்தில் புரியும்.

98. டூர் என்றதும் அம்மா-அப்பாவிடம் அதையும் இதையும் சொல்லி அதிகப் பணம் வாங்கிச் சென்று தண்ணீராகப் பணத்தை இறைப்பதற்கு பதில், 'மும்பையில அம்மாவுக்குப் பிடிச்ச காட்டன் சேலை வாங்கி வந்தேன்', 'தங்கைக்கு ஜெய்ப்பூர் ஸ்பெஷல் கண்ணாடி பதித்த வளையல் வாங்கினேன்' என்றால், உங்களுக்கும் சந்தோஷம்... குடும்பத்துக்கும் சந்தோஷம். ஆனால், நீங்கள் கொடுக்கும் விலை சரியானதுதானா என்பதை உறுதிப்படுத்திக் கொண்டு வாங்க மறக்காதீர்கள்.

99. இளமை கொண்டாட்டத்தில் வரம்பு தாண்டாமல் இருப்பது முக்கியம். 'இந்த இடம் ஆபத்தானது' என்று போர்டு போட்டிருந்தால் அதை மதியுங்கள். தாண்டினால் ஆபத்து அந்த போர்டுக்கு அல்ல... நமக்கும், நம் குடும்பத்தும், நம்மை அழைத்து போன கல்லூரிக்கும்தான் என்பது நினைவில் இருக்கட்டும்.

100. கல்விச் சுற்றுலா என்றதுமே போகிற ஊர்களில் எல்லாம் சினிமா பார்க்க நினைப்பார்கள் சிலர். அந்த சினிமாவை உங்கள் ஊர் தியேட்டரிலோ... வீட்டில் இருக்கும் வி.சி.டி-யிலோ பார்த்துவிடலாம். ஆனால், ஆயிரக்கணக்கில் செலவு செய்து நீங்கள் சென்றிருக்கும் ஆக்ராவில் உள்ள தாஜ்மகாலை பார்க்காமல் விட்டால்... எந்த அளவுக்கு நஷ்டம் என்று யோசியுங்கள்!

சுற்றுலா பொழுதுபோக்குக்கு மட்டுமல்ல; வாழ்க்கையை கற்றுக் கொள்ளவும் தெளிவு பெறவும் நமக்கு வாய்க்கும் ஒரு பயணம்! அதிக பயணம் செய்தவர்கள், அதிகமான அனுபவங்களுடன் உலா வருகிறார்கள். குணம், பழக்க வழக்கங்கள், வாழ்வியல் மதிப்பீடுகள், சிந்தனைகள் என மற்றவர்களைவிட அவர்கள் எல்லாவிதங்களிலும் ஒரு படி மேலே உயர்த்துவதற்கு சுற்றுலா அனுபவங்கள் உதவும்.

வாழ்க்கையை ரசிக்கக் கற்றுக்கொள்ள போய் வாருங்கள் ஒரு உலா... சுற்றுலா!