வீடு தேடி வரும் ஜவுளி வில்லங்கம்!

எங்களின் மகளிர் சுய உதவிக்கு குழு கூட்டம் முடிகின்ற நேரத்தில் ரசீது புத்தகத்துடன் வந்தார் ஒரு இளைஞர். தான் கரூரில் பிரபலமான ஜவுளி நிறுவனம் ஒன்றின் முகவர் என் றும், பல ஊர்களில் மெத்தை விரிப்புகளுக்கும் கம்பளிப் போர்வைகளுக்கும் தயாரிப்பு விலையிலேயே தருவதற்கு ஆர்டர் எடுத்து வருவதாகவும், முகவரியோடு முன்பணமாக இருநூறு மட்டும் தந்தால் போதுமென்றும், பொருளைப் பெற்றுக்கொண்ட பிறகு மீதி பணம் கட்டலாம் என்றும் கூறினார். கூட்டத்துக்கு வந்திருந்த உறுப்பினர்களில் பத்துக்கும் மேற்பட்டோர், இருநூறு ரூபாய் செலுத்தி ரசீதும் பெற்றுக் கொண்டனர்.

மூன்று மாதத்துக்குப் பிறகும் எவருக்கும் பார்சல் வராத காரணத்தால், அந்த இளைஞர் கொடுத்துச் சென்ற 'செல்' எண்ணுக்கு தொடர்புகொள்ள, 'நீங்கள் தொடர்பு கொள்ள விரும்பும் நபர், தொடர்பு எல்லைக்கு அப்பால் இருக்கிறார்' என்றே சொல்லிக் கொண்டிருந்தது. பிறகுதான் தெரிந்தது... இது ஒரு ஏமாற்று வேலை என்று!

'ஏமாளிகள் இருக்கிற வரையில் ஏமாற்றுக்காரர்களும் இருந்து கொண்டுதான் இருப்பார்கள்' என்பது அந்தத் தோழியர்களின் அனுபவத்தின் மூலமாக மீண்டும் ஒரு முறை நிரூபணமாகியிருக்கிறது!

- செல்வமணி தியாகராசன், கும்பகோணம்

உனக்கு டியூஷன்... எனக்கு சீரியல்!

சமீபத்தில் தெரிந்த பெண்மணி ஒருவர் வீட்டுக்குச் சென்றிருந்தபோது, பள்ளி விட்டு வந்த அவருடைய மகள், ரேங்க் கார்டை அவரிடம் காட்டினாள். அனைத்திலும் நல்ல மதிப்பெண்கள் பெற்றிருந்தாள். கார்டை பார்த்தபின், "சரி, டியூஷனுக்கு நேரமாச்சு கிளம்பு" என்று அவளை அனுப்பி வைத்தார். நானோ ஆச்சர்யப்பட்டு, "நல்லாத்தானே படிக்கறா. கூடவே, யூ.கே.ஜி. படிக்கற சின்ன பொண்ணு வேற. அவளுக்கு எதுக்கு டியூஷன்?" என்று கேட்க, சொன்னாரே ஒரு பதில்... அப்பப்பா!

"வீட்டுல இருந்தா தொணதொணனு ஏதாச்சும் பேசிட்டு, சேட்டை பண்ணிட்டே இருப்பா. நிம்மதியா சீரியலும் பார்க்க விடமாட்டா. டியூஷன் அனுப்பினாலாச்சும் ரெண்டு மணி நேரம் நிம்மதியா இருக்கலாம். அதனாலதான்..."

குழந்தைக்கான நேரத்தை டி.வி. சீரியலில் செலவிடுவதெல்லாம் தவறு என்று எவ்வளவோ வாதாடியும், அதை அவர் ஏற்றுக்கொள்ளவே இல்லை. என்னைத்தான் நொந்து கொண்டேன் - இதுபோன்றவர்களுக்கு அறிவுரை சொல்ல முயன்றதற்காக!

- சொ.பரிமளா, சுப்ரமணியபுரம்

பார்த்து அனுப்புங்க பத்திரிகையை!

சமீபத்தில் என் உறவினர் பெண்ணின் திருமணத்துக்கு பத்திரிகையை தபாலில் அனுப்பியிருந்தனர். பிரித்தால், மழையில் நனைந்து நைந்திருந்ததுடன், பசை வேறு அளவுக்கு அதிகமாக ஒட்டப்பட்டிருந்ததால், பிரிக்கும்போதே கிழிந்துவிட்டது பத்திரிகை. முகூர்த்த தேதி எங்களுக்குத் தெரியும் என்றாலும், மண்டபம், முகூர்த்த நேரம் போன்றவற்றுக்காக வெளியூர் உறவினர் ஒருவருக்கு போன் செய்ய, அவர்களுக்கும் நனைந்து, நைந்து, கிழிந்தே வந்து சேர்ந்திருக்கிறது பத்திரிகை. பிறகுதான் தெரிந்தது... பத்திரிகையை போஸ்ட் செய்யும்போதே அது மழையில் நனைந்திருந்திருக்கிறது என்று! சம்பந்தப்பட்டவரிடமே போன் செய்து, மண்டபம் உள்ளிட்ட விவரங்களை அறிந்துகொண்டோம்.

தோழிகளே... திருமணப் பத்திரிகையை தபாலில் அனுப்புவது தவறல்ல. ஆனால், இது போன்ற அசௌகரியங்களைத் தவிர்க்க பொறுப்பான நபரிடம் கொடுத்து, 'போஸ்ட்' செய்யச் சொல்லுங்கள். கூடவே, என்னதான் தபாலில் பத்திரிகை அனுப்பிவிட்டாலும், முக்கியமான நண்பர்களுக்கும், உறவினர்களுக்கும் தொலைபேசியிலும் ஒருமுறை அன்புடன் அழைத்தால், அவர்களுக்கும் ஒரு தனி மகிழ்ச்சி உண்டாகுமே!

- ஏ.பி.உஷா, சென்னை-44

இடம் மாறிய நகை..!

பழைய நகையை மாற்றவும், ஹேண்ட்பேக்கை பழுது பார்க்கவும் திட்டமிட்டு நானும் என் அண்ணியும் கிளம்பினோம். சென்னை, தி.நகர், ரங்கநாதன் தெருவில் ஹேண்ட்பேக் ரிப்பேர் கடைக்குச் சென்றபோது... "தொழுகைக்கு கிளம்பிட்டு இருக்கேனே..." என்றார் கடைக்காரர். உடனே, "திரும்பி வந்து சரி பண்ணிட்டு, இந்த நம்பருக்கு போன் பண்ணுங்க. பக்கத்துல ஒரு வேலை இருக்கு. போயிட்டு வந்துடறோம்" என்று சொல்லி பேக்கைக் கொடுத்துவிட்டு, நகைக்கடைக்கு கிளம்பினோம். அங்கே சென்றபிறகுதான்... கைப்பையில் பழைய நகை இல்லாதது தெரிந்தது. 'எங்கே, எப்படி...' என்றெல்லாம் நிதானிக்க முடியாமல் அண்ணி வியர்த்து நின்றிருந்தபோது செல்போன் சிணுங்கியது. "நான் ஹேண்ட் பேக் கடையில இருந்து பேசறேம்மா. தொழுகை முடிச்சுட்டு வந்து உங்க பேக்கை திறந்தப்போ, அதுல நகை இருந்துச்சு. உடனே வந்து வாங்கிக்கோங்கம்மா" என்றார் கடைக்காரர்.

போன உயிர் திரும்ப வந்தது எங்களுக்கு! நேரில் சென்று நகையைப் பெற்றுக்கொண்ட நாங்கள், அவருக்கு கோடி நன்றிகளை, நெகிழ்ச்சிகளைப் பொழிய, "இனிமே கவனமா இருங்கம்மா..." என்றார் அவர் அடக்கத்துடன்!

வீட்டிலிருந்து கிளம்பும்போது அவசரத்தில் நகையை பை மாற்றி வைத்த எங்கள் அண்ணிக்கு, அது ஒரு ஆயுள்கால பாடம்... நமக்கும்தான்!

- மீனாட்சி கண்ணன், சென்னை-92