"நான் பி.ஏ., ஆங்கில இலக்கியம் மூன்றாமாண்டு படிக்கிறேன். சிவில் சர்வீஸ் எக்ஸாம் எழுத வேண்டுமென்று ஆர்வமாக உள்ளேன். ஆனால், இதுவரை எந்தப் பயிற்சியும் எடுக்கவில்லை. கூடவே, அதற்கான வழிகாட்டலும் எனக்கு இல்லை. ஐ.ஏ.எஸ். தேர்வு முறை பற்றிய முழு விவரங்களை விளக்க வேண்டுகிறேன்...''

- ஜெ.எம். மீரா, திருச்சி

ச.சுதாகர், கல்வியியலாளர், சென்னை

" 'சிவில் சர்வீஸ்' என்றாலே நம் நினைவுக்கு வருவது I.A.S., I.P.S., I.F.S., என்ற மூன்று பதவிகள் தான். ஆனால், சிவில் சர்வீஸ் தேர்வு 23 பதவிகளுக் கான பணியிடங்களை நிரப்புகிறது. மேலே குறிப்பிட்ட I.A.S., I.P.S. பதவிகளுக்கான தேர்வை எழுத இந்தியக் குடிமகனாக இருக்க வேண்டியது அவசியம். அதேசமயம், மீதியுள்ள 21 பதவிகளுக்கு, இந்தியக் குடிமகன்கள் மட்டுமல்லாது... சில வரையறைக்குட்பட்டு, இந்தியக் குடியுரிமை பெற்று இந்தியாவில் வசிப்பவர்களும் போட்டியிடலாம்.

பொதுவாக, சிவில் சர்வீஸ் தேர்வு எழுதுபவரின் வயது இருபத்தியன்றுக்கு மேல், முப்பதுக்குள் இருக்க வேண்டும். இதர பிற்படுத்தப்பட்டவர்களுக்கு 33 வயது வரையும், தாழ்த்தப்பட்டவர்களுக்கு 35 வயது வரையும் சலுகை வழங்கப்படுகிறது. தேர்வு எழுதுவதற்கு பொதுப்பிரிவினருக்கு 4 முயற்சிகளும், இதர பிற்படுத்தப்பட்டோருக்கு 7 முயற்சிகளும், தாழ்த்தப்பட்டோருக்கு எத்தனை முயற்சிகள் வேண்டுமானாலும் அனுமதிக்கப்படுகிறது.

சிவில் சர்வீஸ் தேர்வுக்கான கல்வித் தகுதி... ஏதாவது ஒரு இளங்கலைப் பட்டம் பெற்றிருக்கவேண்டும். இளங்கலை இறுதி ஆண்டு மாணவர்களும் தகுதியானவர்களாகவே கருதப்படுகிறார்கள்.

கடந்த ஆண்டு வரை ஆண், பெண் இருவருக்கும் ஒரே கட்டணம் இருந்தது. ஆனால், இந்தியாவில் பெண் ஆட்சியர்கள் குறைவாக உள்ள நிலையை மாற்ற அவர்களுக்கான அனைத்துக் கட்டணங்களையும் ரத்து செய்துள்ளது மத்திய அரசு. தவிர, பிரதான தேர்வில் வெற்றி பெற்று நேர்முகத்தேர்வுக்குப் போகும் பெண்களுக்கான பயணப்படியையும் அரசே வழங்குகிறது. இந்த ஆண்டில் அமலுக்கு வந்துள்ள இந்தச் சலுகைகள், அனைத்துப் பிரிவு பெண்களுக்கும் பொருந்தும்.

சிவில் சர்வீஸ் தேர்வானது, பிரிலிமினரி, மெயின், இன்டர்வியூ என்று மூன்று நிலைகளில் நடத்தப்படும். ஒரு மதிப்பெண் பொது அறிவுக் கேள்விகள் - 150, நீங்கள் தேர்ந்தெடுத்த விருப்பப்பாடத்தில் (கொடுக்கப்படும் 23 பாடங்களில் ஏதாவது ஒன்றை நீங்கள் விருப்பப்பாடமாக தேர்ந்தெடுக்கலாம்) இருந்து இரண்டரை மதிப்பெண் கேள்விகள் - 120... இதுதான் பிரிலிமினரி வினாத்தாளின் உள்ளடக்கம். 450 மதிப்பெண்களுக்கான இந்தத் தேர்வு, அப்ஜெக்டிவ் வகையில் இருக்கும். தவறான பதிலுக்கு நெகட்டிவ் மதிப்பெண்கள் வழங்கப்படும்.

பப்ளிக் அட்மினிஸ்ட்ரேஷன், ஜியோகிராபி, இந்திய வரலாறு... இந்த மூன்றும் சிவில் சர்வீஸில் 'பாப்புலர் ஆப்ஷன்ஸ்' என்று செல்லமாக அழைக்கப்படும் பாடங்கள். இவற்றை எடுப்பவர்களுக்கு வாய்ப்பு அதிகம். இதனால் வடஇந்தியாவிலும், கேரளா போன்ற சில தென்னிந்திய மாநிலங்களிலும் இளங்கலையில் இவற்றையே குறிவைத்துப் படிக்கிறார்கள்.

அடுத்ததாக, பிரதான தேர்வு. பிரிலிமினரி தேர்வில் வெற்றியடைபவர்கள், ஒன்பது தாள்களை உள்ளடக்கிய பிரதான தேர்வை எழுத வேண்டும். பிரிலிமினரி போல 'அப்ஜக்டிவ்'வாக அல்லாமல், விவரித்து எழுதும் வகையில் இந்தத் தேர்வு அமையும்.

முதல் தாளில் ஒரு இந்திய மொழியையும் (தமிழ், தெலுங்கு, இந்தி போன்ற அங்கீகரிக்கப்பட்ட மொழிகள்), இரண்டாம் தாளில் ஆங்கிலத்தையும் எழுத வேண்டியிருக்கும். மூன்றாம் தாளாக ஒரு கட்டுரைத் தேர்வு நடத்தப்படும். இதனை ஆங்கிலம் அல்லது இந்தியில் எழுதலாம். நான்கு மற்றும் ஐந்தாம் தாள்கள் பொது அறிவு மற்றும் உங்களின் சமூகப் பார்வை தொடர்பானவை. இதைத் தவிர்த்த பிற நான்கு தாள்களிலும் உங்கள் விருப்பப் பாடத்தில் இருந்து கேள்விகள் கேட்கப்படும் (நீங்கள் பிரிலிமினரி தேர்வில் தேர்ந்தெடுத்த அதே விருப்பப் பாடத்தை இதிலும் தேர்ந்தெடுக்க வேண்டும் என்ற அவசியம் இல்லை). மூன்றாம் தாளுக்கு 200 மதிப்பெண்கள். மற்ற அனைத்துக்கும் தலா 300 மதிப்பெண்கள்.

முதல் இரண்டு தாள்களில் நீங்கள் தேர்ச்சிக்கான மதிப்பெண்கள் எடுத்தால் மட்டுமே பிற 7 தாள்கள் திருத்தப்படும்! அதேசமயம் உங்களின் தரவரிசை எண்ணில் இந்த மொழித்தாள் மதிப்பெண்கள் சேர்க்கப்படாது. மொத்தம் 2,600 மதிப்பெண்களில், முன்பே சொன்னதுபோல முதல் இரண்டு மொழித் தேர்வுகளின் 600 மதிப்பெண்கள் தவிர, மீதமுள்ள 2,000 மதிப்பெண்களில் நீங்கள் எவ்வளவு மதிப்பெண் எடுக்கிறீர்கள் என்பதே உங்களின் தேர்ச்சியை முடிவு செய்யும்.

அடுத்து நடக்கும் நேர்முகத் தேர்வில் உங்களின் பதில்களும், நடவடிக்கையும் கண்காணிக்கப்படும். பிரிலிமினரியில் நெகட்டிவ் மதிப்பெண்கள் எப்படியோ அப்படிதான் பிரதான தேர்வில் 'பெனால்டி' மதிப்பெண்கள் வழங்கப்படும். கேள்வி எந்தப் புரிதலோடு கொடுக்கப்பட்டதோ, அதற்குச் சம்பந்தமே இல்லாத புரிதலோடு கேள்வியை அணுகுபவர்கள் இதனால் பாதிக்கப்படுவார்கள். எதற்கு எவ்வளவு பெனால்டி என்பதை தேர்வாளர் மட்டுமே முடிவு செய்ய முடியும்.

பிரதான தேர்வில் நீங்கள் எடுத்த மதிப்பெண்ணும், நேர்முகத்தேர்வில் வழங்கப்படும் மதிப்பெண்களுமே உங்களின் தர எண்ணை முடிவு செய்யும். நல்ல தர எண்ணோடு தேர்ச்சி பெற்றால், நீங்கள் எந்த மாநிலத்தில் சேவை செய்ய வேண்டும் என்பதை நீங்களே முடிவெடுக்கலாம்! பொதுவாக ஐ.ஏ.எஸ்ஸுக்கு இந்த வருடம் 26 பணியிடங்கள் காலியாக இருக்கின்றன என்றால், உங்களின் தர எண் முதல் 26 இடங்களுக்குள் இருந்தால் உங்கள் விருப்பப்படி நீங்கள் ஐ.ஏ.எஸ் மற்றும் ஐ.பி.எஸ். என எந்த பதவியை வேண்டுமானாலும் தேர்ந்தெடுக்கலாம். இதுவே அடுத்த லிஸ்ட்டில் இருந்தீர்கள் என்றால்... ஐ.பி.எஸ், ஐ.எஃப்.எஸ் மற்றும் ஐ.ஆர்.எஸ். இவற்றில் ஏதாவது ஒரு பதவி உங்களுக்கு வழங்கப்படும்.

சிவில் சர்வீஸ் தேர்வுக்கான அறிவிப்பு... பொதுவாக நவம்பர் மாதத்தில் வெளியாகும்.''