"எனக்குக் குழந்தை பிறந்திருக்கு... இந்தாங்க ஸ்வீட்" என்று இனிப்பை நீட்டுபவரிடம் நாம் கேட்கும் முதல் கேள்வி, "சிசேரியனா... நார்மல் டெலிவரியா?"

இப்படி சர்வசகஜமாகிவிட்ட 'சிசேரியன்' பிரசவத்துக்கான மருத்துவக் காரணங்கள் பல இருந்தாலும்கூட, இந்த 'சிசேரியன்' என்ற சொல்லைத் துரத்தியடிக்கிற சாகசம், கர்ப்பம் தரிக்கும் ஒவ்வொரு பெண்ணிடமும் இயற்கையிலேயே இருக்கிறது என்பதை மனதில் முதலில் ஆழமாகப் பதித்துக் கொள்ளுங்கள்!

பொதுவாக, பெண்ணின் கர்ப்பக் காலம் 40 வாரங்கள் (கிட்டதட்ட 280 நாட்கள்) என்று கணக்கிடப்பட்டு இருந்தாலும்... முதல் 4 வாரங்கள், அதாவது ஒரு மாத காலத்தில் உடலளவில் எந்தவித மாறுதலும் இருக்காது. ஆனால், மனதளவில் ஏற்படும் மாற்றங்களும் குழப்பங்களும் மலையளவு பெருகிக் கொண்டே இருக்கும். இதற்கு முக்கிய காரணம், கருப்பைக்குள் இருக்கும் கரு நாளுக்கு நாள் வளர்ந்து கொண்டிருக்கும்போதே, கர்ப்பமான பெண்ணின் உடலுக்குள் ஏகப்பட்ட ஹார்மோன்கள் சுரக்கத் தொடங்கி விடும். இந்தச் சுரப்புத் தன்மையால் முக்கியமாக பாதிக்கப்படுவது மனதுதான்.

மாதவிலக்கு ஏற்படும் முன் தினங்களிலேயே மனம் ஒரு நிலையில் இல்லாமல் எதற்குஎடுத்தாலும் கோபப்படுவதும், எரிச்சலடைவதும் நிகழும். இதை 'ப்ரீமென்ஸுரல் புளூஸ்' (Premenstrual blues) என்பார்கள். அதற்கே அப்படியென்றால், பிரசவ காலத்தில் சொல்லவே வேண்டாம்.

இது ஒருபக்கம் இருக்க... இன்னொரு பக்கம் சுற்றிஇருப்பவர்களில் சிலர் கர்ப்பிணிப் பெண்களிடம், "மாசமா இருக்கிறதா சொல்றே... வயிறே தெரியலையே? எதுக்கும் ஜாக்கிரதையா இரு...", "தலவாசல் படியில உட்காராதே... பிரசவம் சிரமமாப் போயிடும்" என்றுஎல்லாம் போகிற போக்கில் போதித்து விட்டுப்போக, அதை ஏற்கவும் முடியாமல் ஒதுக்கவும் முடியாமல் தவிப்பார்கள்.

'எப்படிப் படுக்கணும், எப்படி உட்காரணும், எதைஎல்லாம் சாப்பிடணும், எதையெல்லாம் செய்யக்கூடாது' போன்ற கேள்விகள் முளைத்துக் கொண்டே இருக்கும். விளைவு... புத்தகங்களிலும், இன்டர்நெட்டிலும் 'பிரசவம்' பார்க்கிறார்கள் கர்ப்பிணிப் பெண்கள்! அதில் எல்லாம் 'பிரசவம் எப்படி இருக்கும்'?' என்ற அவர்களின் தேடலுக்கு, 'இப்படித்தான் இருக்கும்' என்று அங்கே கொட்டுகிற தகவல்கள், பெரும்பாலும் குழப்பத்தை, பயத்தை மேலும் கிளறுவதாகவே இருக்கின்றன.

இந்த மனப் போராட்டங்களில் இருந்து உங்களை மீட்கும் உண்மை ஒன்றுதான்... 'நமக்கு நல்லபடியா குழந்தை பிறக்கும்' என்ற மன நம்பிக்கைதான் கர்ப்பிணிப் பெண்களுக்கான முதல் மருந்து, முழுமுதற் சத்து! 'கர்ப்பக் காலத்தில் நல்ல விஷயங்களைக் கேட்க வேண்டும், பார்க்க வேண்டும், படிக்க வேண்டும், நல்ல இசையை ரசிக்க வேண்டும்' என்றெல்லாம் நம் பெரியவர்கள் சொல்வதற்கு முக்கியமான காரணம், மனதில் ஏற்படும் இதுபோன்ற தேவையில்லாத குழப்பங்களை, அச்சங்களை விரட்டுவதற்காகத்தான்.

அப்படி பயங்கள் நீங்கி, மனம் தெளிவாக இருக்கும் போதுதான் உடம்பில் உள்ள தசைகளும், ரத்த ஓட்டமும் சீராக இருக்கும். புத்துணர்ச்சி பொங்கும். நிம்மதியான உறக்கம் வாய்க்கும். ஆரோக்கியம் வளரும். அதைப் பெற, தெளிவான மனதுடன் கர்ப்பக் காலத்தில் செய்ய வேண்டிய எளிய உடற் பயிற்சிகளும் முக்கிய இடத்தை வகிக்கின்றன.

'உடற்பயிற்சி' என்றதும் 'பெரியவங்க 'அதை செய்யாதே', 'இதை தூக்காதே'னு சொல்றாங்க. நீங்க இப்படி சொல்றீங்களே? கர்ப்பக் காலத்துல ஒடம்பை வளச்சு உடற்பயிற்சி செய்யலாமா?' என்று கேள்விகள் பொங்கும் உங்களுக்கு.

ஆனால், நம் வீட்டு எள்ளுப் பாட்டிகள், "குனிஞ்சு நிமிர்ந்தாத்தாண்டி பிரசவம் சுளுவாகும்; காலை மடக்கி, நிமிர்ந்து உக்காரு; மல்லாக்கப் படுத்தா புள்ள நெஞ்சுக்கு ஏறிக்கும்; பொரண்டு பொரண்டு படுத்தா புள்ளைக்கு மாலை சுத்திக்கும்; எப்பவும் ஒருக்களிச்சுதான் படுக்கணும்''என்றெல்லாம் நம் கொள்ளுப் பாட்டிகளையும், பாட்டிகளையும் விரட்டிக்கொண்டே இருந்தனர் என்பதை மறந்துவிடக்கூடாது. அவற்றுக்கெல்லாம் நிறையவே மருத்துவ காரணங்கள் இருக்கின்றன! ஆம்... உடற்பயிற்சி என்பதைத்தான், 'நம்பிக்கைகள்' பல தடவி சூசகமாகச் அப்படிச் சொல்லியிருக்கிறார்கள்.

ஆக... உடற்பயிற்சி என்பதைக் கட்டாயம் செய்யலாம். செய்ய வேண்டும். செய்தால்தான் பலன்! முக்கியமாக, பிரசவம் எளிமையாகும். 'எப்படிச் செய்வது அந்த உடற்பயிற்சிகளை?!'