"என் பெற்றோர், மாமனார், மாமியார் என எல்லோருமே எங்களுடனேயே இருக்கிறார்கள். இந்த நிலையில் நாங்கள் புதிதாக வீடு கட்டி வருகிறோம். எனவே, வயது முதிர்ந்த அவர்களுடைய தேவையையும் அனுசரித்து கட்டடப் பணிகளை மேற்கொள்ள இருக்கிறோம். முதியோர்களின் வசதிகளுக்கு முன்னுரிமை தர, கூடுதல் அறைகள் மட்டுமல்லாது வேறு என்னென்ன ஏற்பாடுகளை கவனத்தில் கொள்ள வேண்டும்?'' என்று தேனியில் இருந்து அக்கறையுடன் கேட்டிருக்கும் நாகவள்ளிக்கு, பதில் அளிக்கிறார் திருச்சியை சேர்ந்த வீட்டு அலங்கார நிபுணர் எஸ்.ஆனந்த்.

"வீடு கட்டும் விஷயத்தில் வீட்டுப் பெரியவர்களின் நலனையும் நீங்கள் கவனத்தில் கொண்டிருப்பது பாராட்டப்பட வேண்டிய அம்சம். பொதுவாக, வீட்டுப் பெரியவர்களுக்கென ஒதுக்கப்படும் அறைகள் வழவழப்பாக இல்லாது, க்ரிப்புடன் கூடிய தரையுள்ளதாக அமைக்கப்பட வேண்டும். வயதானவர்களுக்கு பார்வைத் திறனில் தடுமாற்றம் இருக்கும் என்பதால், 'பளிச்' வெளிச்சமுள்ள, அதேசமயம் கண்களை உறுத்தாத 'சி.எஃப்.எல்' ரக விளக்குகளைப் பொருத்தலாம்.

கட்டில்களின் உயரம் சராசரியை விட சற்றுத் தாழ்வாக இருப்பது நல்லது. 'பெட்'டின் அருகிலேயே சிறு மேஜை இருந்தால், மூக்குக் கண்ணாடி, மாத்திரைகள், தண்ணீர், புத்தகம் போன்றவற்றை அதிலேயே வைத்துக்கொள்வது அவர்களின் சிரமத்தைக் குறைக்கும். ஓய்வுப்பொழுதே பிரதானமாக இருக்கும் வயதானவர்களின் அறையில் அவர்கள் விருப்பத்தைப் பொறுத்து டி.வி. அமைக்கலாம்.

அறையின் விளக்கு, மின்விசிறி போன்றவற்றை கட்டுப்படுத்தும் சுவிட்சுகள் சுவரில் உயரத்தில் ஒன்று இருப்பதுடன், கட்டிலில் இருந்த படியே பயன்படுத்தும் வகையில் கைக்கு எட்டும் தொலைவில் ஒன்று இருப்பதும் நன்று. சுவர்கள் உறுத்தாத நிறத்திலும், எதிரெதிர் சுவர்கள் வேறுபட்ட நிறத்திலும், கதவு மற்றும் அலமாரிகள் அடர் நிறத்திலும் வண்ணம் பெற்றிருக்க வேண்டும்.

என்னதான் நவீன வசதிகளை வீட்டில் கொட்டி நிறைத்தாலும், இயற்கையை நேசிக்கும் மூத்த தலைமுறையினருக்கு அவை நிறைவைத் தராது. எனவே, ஜன்னலை ஒட்டியே வெளிப்புறத்தில் பசுமையான செடி, கொடிகளை வளர்க்கலாம்.

பாத்ரூமை பொறுத்தவரையில் அங்கு சரிபாதி இடம் உலர் தரையாக இருக்கும்படி வடிவமைக்க வேண்டும். தரை எந்த நிலையிலும் பிடி இழக்காததாக இருப்பதோடு, சுவரோரம் கைப்பிடி அமைப்பதும் நல்லது. டாய்லெட்டிலும் இந்தக் கைப்பிடி அத்தியாவசியம். இந்திய அமர்வைவிட வெஸ்டர்ன் டைப்பே சிறப்பானது என்பதைத் தனியாக சொல்ல வேண்டியதில்லை.

சிறுநீர் உபாதையில் மற்றவர்களைவிட முதியவர்கள் அதிக முறைகள் இரவில் எழுவார்கள். அகால நேரத்தில் பாத்ரூமில் ஸ்விட்ச் போட்டதும், அந்தப் பளீர் வெளிச்சம், தூக்கத்தை தெறித்தோடச் செய்துவிடும். தூக்கமிழந்த மிச்ச இரவு அவர்களுக்கு ரணகளமாகிவிடும். எனவே, தரைக்கு மட்டுமே வெளிச்சமளிக்கும் விளக்குகளைப் பதித்தால், இந்தத் தொல்லைகள் எதுவும் இருக்காது."