மாலை... விழுந்த வேளை!

கோ-எட் கல்லூரியில் சேர்ந்த முதல் நாளில், 'வெல்கம் பார்ட்டி' மூடில் முதலாம் வருட மாணவ, மாணவிகள் அனைவரும் உற்சாகத்தில் மிதந்தோம். அதிலும் கொஞ்சம் எக்ஸ்ட்ரா குஷியோடு இருந்த மாணவர்கள், காலேஜ் நிறுவனர் சிலைக்கு போடப்பட்டிருந்த மாலையை எடுத்து, ஒருவர் மாற்றி ஒருவர் கழுத்தி வீசி, "மாப்ள மாதிரி இருக்கடா..." என்று விளையாடிக் கொண்டிருந்தனர். கண்ணிமைக்கும் நேரத்தில் மாலை சர்ரென்று சுழன்று வந்து என் கழுத்தில் விழ, அதிர்ச்சியில் உறைந்துவிட்டேன் நான். மாணவர்களும் கப்சிப். எல்லோர் முகத்திலும் ஒரு கலவரம். விநாடிக்குள் சுதாரித்துக் கொண்ட நான் மாலையை மறுபடியும் மாணவர்கள் பக்கமே வீசிவிட்டு எழுந்து சென்று விட்டேன்.

அந்த மூன்று வருடங்களில் எல்லா கொண்டாட்ட, கும்மாளங்களையும் மறுபடி மறுபடி சொல்லிச் சிரித்த மாணவர்கள் இந்த 'மாலை' மேட்டரை மட்டும் நைஸாக 'டெலிட்' செய்துவிட்டனர். நானும்தான்!

- ப.மகாலெட்சுமி, மணப்பாறை

ஃபைனல் இயர் குறும்புக்கு எக்ஸ்கியூஸ்!

சென்னை கல்லூரி ஒன்றில் சுமார் 15 வருடங்களுக்கு முன் நான் படித்துக் கொண்டிருந்தபோது, கிரிக்கெட் மேட்ச் கமென்ட்ரி கேட்பதற்காகவே ஒரு சின்ன ரேடியோவை கல்லூரிக்கு எடுத்துச் சென்று, ஒளித்து வைத்துக் கேட்போம்! அன்று 'லஞ்ச் ஹவர்' முடிந்தபோது, மேட்ச் நாற்பதாவது ஓவரில் விறுவிறுவென்று போய்க் கொண்டிருந்தது. அதனால், மேம் கிளாஸ§க்குள் நுழைந்தபோதும், ரேடியோவை ஆஃப் செய்யாமல் வால்யூமைக் குறைத்து, திருட்டுத்தனமாக கேட்டுக் கொண்டிருந்தோம். மேம் அதை கண்டுபிடித்துவிட, ஒரே அசுர அர்ச்சனை. அதுமட்டுமல்ல... ரேடியோவை வாங்கிக்கொண்டவர் நேராக ஹெச்.ஓ.டி-யிடமும் போட்டுக் கொடுத்துவிட்டார். ஹெச்.ஓ.டி. எங்களை அழைக்க, 'டி.சி. ரெடியாயிட்டு இருக்காம்...' என்று வயிற்றில் புளியைக் கரைத்து எங்களை வழியனுப்பி வைத்தனர் வகுப்புத் தோழிகள்.

"நீங்கதானா அது..?" என்ற ஹெச்.ஓ.டி. ரேடியோவை எங்களிடம் கொடுத்தார். பின் அந்த மேமிடம் திரும்பி, "ஃபைனல் இயர் பசங்க... இப்படி சின்னச் சின்ன குறும்புகளை அனுபவிச்சுட்டு போகட்டுமே... இந்த முறை எக்ஸ்கியூஸ் கொடுத்துடலாம்..." என்று சிபாரிசு செய்ய, ஆனந்த ஆச்சரியத்தில் மூழ்கிவிட்டோம் நாங்கள்! டின் டின்னாக வாங்கிக் கொண்டு வருவோம் என்று எதிர்பார்த்திருந்த வகுப்புத் தோழிகளுக்கோ அதைவிட ஆச்சர்யம்!

- ரமா மாதவன், சென்னை-33