|
ஒரு தடவை, 'என்ன வேலை பார்த்துக்கிட்டிருக்க?' என்று தன் உறவுக்கார பெண்ணிடம் அவர் கேட்க, அதற்கு கிடைத்த... 'ஆபீஸ் டைகர்ல கிளயன்ட் இன்டர்ஃபேஸ் (Office Tiger, Client interface) பண்றேன்' என்ற பதில்தான் இந்த முடிவுக்குக் காரணம்!
பெற்றோர்களிடம் புதுப்பிக்கப்பட்ட தகவல் அறிவு குறைந்து போய் விடுகிறது. ஆசிரியர்கள் பலருக்கும்கூட ஆழம் உள்ள அளவு, அகன்ற தகவல் அறிவு திரட்டுவது கடினம். அதனால் வேலையில் வெற்றி பெற்ற (?) நண்பர்களும் உறவினர்களும் சொல்லும் ஆலோசனைகள்தான் இன்று அதிகாரப்பூர்வமாகக் கருதப்படுகின்றன.
சரி, விஷயத்துக்கு வருவோம்.
ஒருபுறம் படிப்பும், தகுதியும், ஆர்வமும் உள்ள கூட்டம் 'எனக்கான சிறந்த வேலை எது?' என்று தெரியாமல் தவித்துக் கொண்டிருக்க, இன்னொருபுறம் தகுதியான, வேலைக்குத் தயாரான ஆட்கள் கிடைக்காமல் தவித்துக் கொண்டிருக்கின்றன நிறுவனங்கள்!
என்ன சிக்கல் என்றால், டெய்லர்கள் தேவை, கடை ஊழியர்கள் தேவை, டிரைவர்கள் தேவை என கடைநிலை ஊழியர்கள் தேவை என்பதை 'ஆட்கள் தேவை' போர்டுகளை வாசலில் தொங்கவிட்டுத் தெரியப்படுத்தலாம். ஆனால், 'White Collar’' பணியாளர் களுக்கு இப்படி பலகை தொங்கவிட்டுத் தேட முடியாது. தீவிரமாக ஆங்கில தினசரிகளில் விளம்பரம் பார்ப்பவருக்கு வேண்டுமானால் ஓரளவு பிடிபடலாம். ஆனால், வேலைச் சந்தைப் பற்றி தற்போதைய நிலையையும், நாளை ஏற்படவிருக்கும் தொழில் சந்தை நிலவரத்தை கணித்து ஆலோசனை சொல்லவும் 'ஹெச்.ஆர்' (HR-Human Resources) அனுபவம் தேவை.
இதில் இன்னும் சில பக்கங்களும் உள்ளன. ஒரு வேலையைத் தேர்ந்தெடுக்க நல்ல வேலை, நல்ல சம்பளம், நல்ல நிறுவனம் போன்ற வெளிக்காரணங்கள் மட்டும் போதுமா? உங்கள் தனித்தன்மை, ஆர்வம், சிறப்புத் தகுதி, அனுபவம் போன்ற தனி மனித காரணங்கள் தேவையில்லையா? எளிமையாகச் சொன்னால்... எதில் வாய்ப்பு அதிகம் என்று பார்த்துத் தீர்மானிப்பதா? அல்லது எதில் ஆர்வமும் ஆற்றலும் உள்ளது என்று பார்த்துத் தீர்மானிப்பதா?
தொடர்ந்து விவாதிப்போம் இந்தத் தொடரில்..!
| 
