ஸ்டார்ட் மியூஸிக்! டொய்ங்... டொய்ங்... டொய்ங்..! ரீட்டா வந்துட்டா!

கொஞ்சம் ஓவர்தான் இல்ல?! ஓ.கே... ஆரம்பத்துலயே ஒரு ஸ்பெஷல் நியூஸ் சொல்லி உங்களை கூல் பண்ணிடறேன் பாருங்க!

'ரமணி வெர்சஸ் ரமணி', 'மர்ம தேசம்', 'சிதம்பர ரகசியம்'னு சூப்பர் டூப்பர் ஹிட் சீரியல்கள் கொடுத்த டைரக்டர் நாகா, சின்னத்திரையில இருந்து பெரிய திரைக்குப் போனதால அவரை நாம ரொம்பவே மிஸ் பண்ணினோம் இல்லியா?! இதோ... மறுபடியும் சின்னத்திரைக்கும் வந்துட்டாரு நாகா! கூடிய சீக்கிரம் பாலிமர் டி.வி-யில வெளிவரப்போகுது அவரோட அடுத்த சீரியல் 'அமுதசுரபி'!

''சீரியல் பத்தி அப்புறம் பேசலாம். சின்னத்திரை, பெரியதிரைனு வட்டம் போடற சீக்ரெட் என்ன..?!"னு நாகா சார்கிட்ட கேட்டா, தெளிவா வச்சுருக்கார் பதில்!

''சினிமாவுல இருக்கறவங்க சீரியலுக்கு வந்துட்டா, அவங்களுக்கு மார்க்கெட் இல்ல... சீரியல்ல இருக்கறவங்க சினிமாவுக்குப் போயிட்டா அவங்க சின்னத்திரையை மறந்துடணுங்கறது எல்லாம் மரபு இல்லை ரீட்டா. என்னைப் பொறுத்தவரை மக்களுக்கு கதை சொல்லிக்கிட்டே இருக்கணும். கதையோட நிகழ்வுகளைப் பொறுத்து... சுருக்கமா சொல்றதுக்கு சினிமாவையும், விளக்கமா சொல்றதுக்கு சீரியல்லையும் நம்பறேன். இயக்குநர் ஷங்கரோட 'எஸ் பிக்சர்ஸ்' தயாரிப்புல 'ஆனந்தபுரத்து வீடு' படம் பண்ற சான்ஸ் கிடைச்சுது. படத்தை முடிச்ச சமயம், 'அமுதசுரபி'னு சீரியலுக்கு வந்துட்டேன்!"னு சொன்ன நாகாகிட்ட,

''புது சீரியல் எப்படி இருக்கும் சார்..?"னு கேட்க,

''நீங்க எதிர்பார்க்கற மாதிரியே த்ரில், திகில் கலந்த சீரியல்தான். இதில் எக்ஸ்ட்ரா எனர்ஜியா ஆராய்ச்சி மற்றும் வரலாற்றுச் சான்றுகளை சேர்த்திருக்கேன். என் குடும்ப நண்பரான நடிகை சங்கீதா, என் வேண்டுகோளுக்காக இதுல ஒரு சின்ன ரோல் பண்றாங்க!"னு ஸ்கூப் சொன்ன நாகாவுக்கு, இந்த ஏப்ரல் மாசம் மெகா சந்தோஷங்களைத் தரும்னு அவரோட ராசி பலன் சொல்லுது. யெஸ்! அவரோட 'ஆனந்தபுரத்து வீடு' படம், 'அமுதசுரபி' சீரியல்... ரெண்டுமே ஏப்ரல் ரிலீஸ்!

டபுள் ஷாட்!

''போன இஷ்யூல பப்லு பாலிமர் டி.வி-க்கு ரெண்டு சீரியல்கள் தயாரிக்கப் போறதா ஸ்கூப் நியூஸ் சொன்னியே... அந்த சீரியல்களோட கதை என்னனு ஃபாலோ பண்ண வேண்டாமா..?"னு எங்க எடிட்டர் என்னை விரட்ட, நான் பப்லுவை விரட்டிப் பிடிச்சேன்.

''கதை கேட்கறதெல்லாம் அநியாயம் ரீட்டா..."னு எஸ்கேப்பாகப் பார்த்த பப்லுகிட்ட, ''பரவாயில்ல... சொல்லுங்க பாஸ்"னு வேண்டுகோள் வைக்க, ஷார்ட் அண்ட் ஸ்வீட்டா சொன்னாரு பப்லு!

'' 'எஸ்.எம்.எஸ் (சவாலை முடிந்தால் சமாளி)', இது ஒரு சீரியல் 'ப்ளஸ்' கேம் ஷோ ரீட்டா. ஒரு பிஸினஸ்மேன் நெட்ல தான் நடத்தற சேனலுக்கு புரொக்ராமிங் வேலைகளுக்கு கிரியேட்டிவ் ஆட்கள் வேணும்னு விளம்பரம் பண்றார். வர்ற விண்ணப்பங்கள்ல ஆறு பேரை செலக்ட் பண்ணி, அந்த ஆறு பேருல ஒருத்தரை ஃபைனலா செலக்ட் பண்ண, அவங்களுக்கு ஒரு போட்டி வைக்கறார்.

ஜெயிச்சா, வேலையோட... கோடி ரூபாய் பரிசும் காத்திட்டு இருக்கு. ஆனா, அந்தப் போட்டி மத்த யாருக்கும் தெரியக்கூடாதுனு ஒரு கண்டிஷன். இதனால போட்டியாளர்களுக்கு பர்சனல் வாழ்க்கையிலயும் பல பிரச்னைகள் ஏற்படுது.

இந்த த்ரில்லர் பந்தயங்கள்லதான் கதை நகரும். அதனால, சீரியல் பார்க்கறதோட ஒரு கேமையும் என்ஜாய் பண்ண ஃபீல் கிடைக்கும். கண்டிப்பா இந்த வித்தியாச முயற்சி மக்களுக்கு பிடிக்கும்!"னு நம்பிக்கையா சொல்ற பப்லுவோட 'டிரிபிள் செவன்' சீரியல், ஒவ்வொரு வாரமும் ஒரு கதைனு கலக்கப்போகுதாம்! ஒவ்வொரு கதைக்கும் ஒரு இயக்குநராம்!

எல்லாம் சரி! யார்கிட்டயும் 'டூக்கா' விட்டுட மாட்டீங்களே பப்லு?!

'நீலாம்பரி' (சன்) சீரியல்ல வில்லாதி வில்லியா வெரைட்டி காஸ்ட்யூம்ஸ்ல வந்து பயம் காட்டின சுதா சந்திரன், இப்போ புரமோஷன் ஆகி, 'கருணமஞ்சரி'யில (ராஜ் டி.வி) சமர்த்தா ஒரு பாஸிட்டிவ் கேரக்டர்ல வர்றாங்க. ''ஹலோ மேம்..."னு அவங்க முன்னாடி போய் நின்னா,

'' 'கருணமஞ்சரி' பத்திதானே கேட்கப்போற..?"னு கற்பூரமா பேசின மேம், அந்த சீரியல்ல தன்னோட கேரக்டர் பத்தி சொன்னாங்க.

''ஒரு பொஸசிவ் கேரக்டர் பண்றேன். கணவரும் குழந்தையும்தான் உலகம்னு நினைக்கற பொண்ணு. அவளுக்கு கர்ப்பப் பையில ஒரு பிரச்னை, அதனால தாம்பத்யத்துல ஏற்படற சிக்கல், கணவன் மேல வச்சிருக்கற அளவில்லாத அன்பால அவர் எதிர்கொள்ற கஷ்டங்கள்னு கதை போகும். பிரபுநேபால் சார்தான் சீரியல் டைரக்டர்!"னு சொன்ன சுதா, ஹிந்தி சீரியல் ஏரியாவுலயும் பிஸி!

''ஆமா ரீட்டா... ஹிந்தியில சகாரா டி.வி-க்காக ஒரு சீரியல் பண்றேன். அப்புறம் சன் டி.வி-க்காக 'பொண்டாட்டி தேவை'னு ஒரு சீரியல்ல நடிக்கறேன். பக்கா காமெடி கேரக்டர். தூர்தர்ஷனுக்காக பண்ற 'அதுராபந்தன்' சீரியல்ல உறவுகளால தவிக்கற ஒரு பெண்ணா நடிக்கறேன்"னு கடகடனு ஒப்பிச்ச சுதா, ''ஒரு டான்ஸ் ஃபெஸ்டிவலுக்காக அவசரமா அலகாபாத் கிளம்பிட்டு இருக்கேன். கேட்ச் யூ லேட்டர் ரீட்டா!"னு சொல்லிட்டு 'விர்ர்ர்'ரானாங்க.

அப்போ இந்த ரீட்டாவும் இப்போதைக்கு 'டாட்டா'!