"நானும், என் தோழியும் நாற்பது வயதைத் தாண்டியவர்கள். 'நாற்பது வயதுக்கு மேல் பெண்களுக்கு எலும்பு பலவீனமடையும். அதனால நான் கால்சியம் மாத்திரை சாப்பிட ஆரம்பிச்சுட்டேன். நீயும் வாங்கி சாப்பிடு' என்கிறாள் தோழி. கூடவே, பெண்களுக்கான கால்சியம் மாத்திரை விளம்பரங்களும் என்னைக் குழப்புகின்றன. தெளிவுபடுத்துங்களேன்..."

டாக்டர் கோமதி, டயட்டீஷியன், சென்னை

"உங்களை மட்டுமல்ல... பல நடுத்தர வயதுப் பெண்களையும் இதுபோன்ற விளம்பரங்களும், 'எலும்பு தேய்மானம்' பற்றிய பயங்களும் குழப்பியுள்ளது கண்கூடு. பொதுவாக 41 வயதுக்கு மேலே உள்ள பெண்களுக்குக் கால்சியம் குறைபாடு ஏற்படலாம் என்பது உண்மைதான். அதனை ஈடுகட்ட அவர்கள் தினமும் 300 மில்லி பால் குடித்தாலே போதும். அதையும் மீறி, கை, கால் வலி, மூட்டு வலி என்று பிரச்னைகள் வரிசை

கட்டினால், உடனடியாக ஒரு டாக்டரை அணுக வேண்டும். உங்கள் பிரச்னைக்கு காரணம் கால்சியம் குறைபாடுதான் என்று அவர் உறுதி செய்தால், உங்களுக்கான கால்சியம் தேவை உள்ளிட்ட பல கூறுகளையும் ஆராய்ந்து, அதன் அடிப்படையில் மருத்துவர் உங்களுக்கு கால்சியம் மாத்திரைகளைப் பரிந்துரைப்பார்.

இவ்வாறில்லாமல், 'எனக்கு நாப்பத்திரெண்டு வயசாச்சு. தினமும் கால்சியம் மாத்திரை எடுத்துக்கறேன்...' என்று விளம்பரங்களைப் பார்த்தோ, தவறான வழிகாட்டுதல்களாலேயோ டாக்டரின் பரிந்துரையின்றி நீங்களாகவே கால்சியம் மாத்திரை எடுத்துக்கொள்வது தவறு. கால்சியம் உடலுக்கு மிகவும் தேவையானதுதான் என்றாலும், அளவுக்கு மீறினால் அமுதமும் நஞ்சுதானே?! உடல் தேவைக்கு அதிகமான கால்சியத்தை நீங்கள் எடுத்துக் கொள்ளும்போது, அது சிறுநீரகங்களில் கல் போன்ற பிரச்னைகளை ஏற்படுத்தலாம்!"

"துரத்தி வரும் தூக்கம்...துரத்தி அடிக்க என்ன வழி?"

"எனக்கு வயது 60. பகலிலும் என்னைத் தூக்கம் துரத்துவதுதான் என் பிரச்னை. இதனால் எங்கு அமர்ந்தாலும், அந்த இடத்திலேயே என்னையுமறியாமல் தூங்கி விழுந்து விடுகிறேன். அதிக எடையுடன் இருக்கும் எனக்கு இதனால் கை, கால், முட்டிகளில் எல்லாம் பலமாக அடிபட்டு, அந்த வலி வேறு படுத்துகிறது. இந்த பிரச்னைக்கு காரணம் என்ன... இதிலிருந்து விடுபட வழி என்ன..? தெளிவு படுத்துங்களேன்..."

டாக்டர் சுதிர், பொது மருத்துவர், மதுரை

"பகலிலும் உங்களைத் தூக்கம் தூக்கிக் கொண்டு போகும் இந்தப் பிரச்னைக்கு இரண்டு பொதுவான காரணங்கள் இருக்கலாம். ஒன்று, அதிக எடை உடையவர்களுக்கு சீராக மூச்சு விட முடியாமல், ஆக்ஸிஜன் லெவல் குறைந்து, கார்பன்&டை&ஆக்ஸைடு லெவல் கூடும் வாய்ப்பு உள்ளது. எனவே, அந்த சமயம் தன்னையும் அறியாமல் அவர்கள் மயக்கம் போட்டு விழுவதற்கு வாய்ப்பு அதிகம். அந்த மயக்கத்தை நீங்கள் தூக்கமாக புரிந்து கொண்டிருக்கலாம்.

அல்லது, சிலருக்கு கழுத்துப் பகுதியில் அதிக சதை இருந்தால், இரவு நேரங்களில் சீராக மூச்சுவிட முடியாமல், புரண்டு புரண்டு படுப்பார்கள். இதனால், தூங்க வேண்டிய நேரத்தில் தூங்க முடியாமல் போய், பகல் நேரங்களில், பொது இடங்களில் அவர்களையும் அறியாமல் தூங்குவார்கள்.

மற்றொன்று, வலிப்பு நோயின் காரணமாகவும் மயங்கி விழ வாய்ப்பு உண்டு. நீங்கள் உங்களுக்கு வலிப்பு நோய் உள்ளதாக எதுவும் குறிப்பிடவில்லை. எனவே, நீங்கள் குறிப்பிட்டுள்ள உங்களின் 'அதிக எடை'யே இந்தப் பிரச்னைக்கு காரணமாக இருக்கலாம். எனினும், உங்களின் பிரச்னையை சரியாக உறுதிப்படுத்திக் கொள்ள உங்கள் குடும்ப மருத்துவர் அல்லது ஒரு பொது மருத்துவரின் வழிகாட்டலின் கீழ், 'ஸ்லீப் லேப்' என்று சொல்லப்படுகிற, தூக்கத்தை மானிட்டர் பண்ணக்கூடிய லேப்பில் பரிசோதனை செய்யுங்கள். அதன் முடிவைப் பொறுத்து நீங்கள் சிகிச்சை பெறவேண்டிய மருத்துவரை உங்களின் டாக்டரே பரிந்துரைப்பார்!"