அடிமனதில் புதைந்து கிடக்கும் ஒரு ரகசியம் !

''எந்தக் கல்யாணத்துக்குப் போகணும், எவ்வளவு மொய் வைக்கணுங்கற மாதிரி சின்ன சின்ன விஷயங்கள்ல ஆரம்பிச்சு... வீடு வாங்கறது, பிள்ளைகளுக்கு வரன் பார்க்கறதுனு முக்கியமான விஷயங்கள் வரை கல்யாணம் ஆன நாள்ல இருந்து எங்க வீட்டுல எல்லா முடிவுகளையும் அவரேதான் எடுக்கறார் சுவாமி. அப்புறம் இந்த வீட்டுல நான் எதுக்கு? சமைச்சுப் போட்டு, துணி துவைச்சு, வீட்டைப் பெருக்கினு வேலைக்காரியா மட்டும் இருக்கறதுக்கா?''

- மனைவிமார்கள் பலரும் என்னிடம் கோபமாகக் கேட்கும் கேள்வி இது. இந்தக் கோபத்துக்கு என்ன தீர்வு?

'பெண்களின் கூந்தலுக்கு இருக்கும் மனம் இயற்கையானதா, அல்லது செயற்கையானதா?' என்று மன்னன் பாண்டிய நெடுஞ்செழியனுக்கு ஏற்பட்ட சந்தேகம் போலவே, வேறு ஒரு ராஜாவுக்கு வேறு ஒரு சந்தேகம் எழுந்தது. 'மகாராணியின் ஆழ் மனதில் என்ன இருக்கிறது?' என்பதைத் தெரிந்துகொள்ள வேண்டும் என்று விரும்பினான் அவன். சரியான பதிலைக் கண்டுபிடித்துச் சொல்கிறவர்களுக்கு ஆயிரம் பொற்காசுகள் பரிசு என்றும் அறிவித் தான்.

கிட்டத்தட்ட 'திருவிளையாடல்' போலவே... ஏழைப் பெண் புலவர் ஒருவர், "அய்யோ... ஒரு காசா இரண்டு காசா... ஆயிரம் பொற்காசாச்சே...'' என்று கோயில் மண்டபத்தில் நின்று அங்கலாய்த்துக் கொண்டிருந்தபோது, சூனியக்காரக் கிழவன் ஒருவன், பெண் புலவர் முன்பு வந்தான்.

"என்ன பெரிய புடலங்காய் கேள்வி. பெண்ணின் அடிமனதில் என்ன இருக்கிறது என்பதுதானே..? இந்தக் கேள்விக்கான விடை எனக்குத் தெரியும். அதை நீ ராஜாவிடம் போய் சொன்னால், உனக்கு பொற்காசுகள் கிடைக்கும். ஆனால், அதை உனக்குச் சொல்வதால், எனக்கென்ன லாபம்?'' என்று கேட்டுவிட்டு, ''நீ என்னைத் திருமணம் செய்து கொள்வதாக வாக்குறுதி கொடு. நான் உனக்கு பொற்காசுகளை பரிசாக வெல்லக்கூடிய பதிலைச் சொல்கிறேன்!'' என்றான்.

அந்த இளம் கவிதாயினிக்கு வேறு வழி தெரியவில்லை. இறந்துபோன தந்தையால் ஏற்பட்ட கடன் தொல்லை கழுத்தை நெரித்துக் கொண்டு இருந்ததால், அந்தக் கிழவனின் யோசனைக்கு சம்மதம் தெரிவித்தாள். இப்போது அந்தக் கிழவன், மன்னனின் சந்தேகத்துக்கான பதிலைச் சொல்லத் துவங்கினான்.

"நன்றாக யோசித்துப் பார். 'இந்த மாதிரி மட்டமான புத்தகங்களை எல்லாம் படிக்காதே', 'இதைச் சாப்பிடாதே', 'அந்தப் பையனோட பேசாதே', 'இந்த டிரெஸ் போடாதே', 'இவங்க வீட்டுக்குப் போகாதே' என்று பிறந்ததிலிருந்தே உணவு, உடை, நண்பர்கள், புத்தகம், படிப்பு, வாழ்கைத்துணை என்று எதையுமே ஒரு பெண் அவள் விருப்பத்துக்கு ஏற்ப பெரும்பாலும் இங்கு தேர்ந்தெடுக்க முடிவதில்லை. திருமணத்துக்குப் பிறகும் இதேபோன்ற சூழ்நிலையில்தான் அவள் தொடர்ந்து வாழ நிர்ப்பந்திக்கப் படுகிறாள். அதனால்... ஒரு பெண், தான் சம்பந்தப்பட்ட முடிவுகளைத் தானே எடுக்கும் உரிமைக்குத்தான் ஆசைப்படுகிறாள். அந்த நாளுக்காக ஒவ்வொரு நாளும் ஏங்குகிறாள். இதுதான் ஒவ்வொரு பெண்ணின் அடிமனதிலும் இருக்கும் ஆசை!''

- இந்த பதில் மன்னனுக்கு சரியென்று தோன்றியதால், கவிதாயினிக்கு பொற்காசுகள் கிடைத்தன. ஆனால், அவளுக்கு சந்தோஷமில்லை. ஒப்பந்தப்படி அந்த சூனியக்கார கிழவனை, திருமணம் செய்துகொண்டாக வேண்டுமே?! வேறு வழியில்லாமல் கவிதாயினி சூனியக்கார கிழவன் வீட்டுக் கதவைத் தட்டினாள். அங்கே அவள் கண்டது ஆச்சர்யமான காட்சி! ராஜகுமாரன் போன்ற கம்பீர தோற்றம் கொண்ட ஓர் இளைஞன், "வாருங்கள் கவிதாயினி. மன்னனிடமிருந்து உங்களுக்குப் பரிசு கிடைத்த செய்தியைக் கேள்விப்பட்டு மிகவும் சந்தோஷமடைந்தேன். சொன்ன சொல்லைக் காப்பாற்றும் நோக்கத்துடன் என்னைத் திருமணம் செய்து கொள்வதற்காக வந்த உங்கள் நேர்மையைக் கண்டு நான் மேலும் மகிழ்ச்சியடைகிறேன்!'' என்றான்.

கிழவன் வேடத்தில் வந்தது ஒரு ராஜகுமாரன் என்பதை புரிந்து கொண்ட கவிதாயினிக்கு சந்தோஷம் பிடிபடவில்லை. அவள் சந்தோஷத்தோடு திருமணத்துக்கு தன்னைத் தயார்படுத்திக்கொள்ள, அப்போது அவளருகே வந்த அந்த ராஜகுமாரன், "என்னைப் பற்றிய ஒரு ரகசியத்தை சொல்ல மறந்துவிட்டேன். என்னால் எப்போதும் ராஜகுமாரனாக இருக்க முடியாது. நான் வீட்டுக்குள் அழகிய ராஜகுமாரனாக இருக்க வேண்டுமென்றால்.. உன்னோடு வெளியே வரும்போது சூனியக்காரக் கிழவன் போல ஆகிவிடுவேன். வெளியே வரும்போது ராஜகுமாரன் போல இருக்க வேண்டுமென்றால், வீட்டுக்குள் கிழவனாகிவிடுவேன். நான், எப்போது... எப்படி இருக்க வேண்டும் என்பதை நீதான் முடிவு செய்ய வேண்டும்!'' என்று சொன்னான்.

இவனிடம் பழகியதில் கவிதாயினிக்கு இப்போது கொஞ்சம் புத்திசாலித்தனம் வந்துவிட்டது. "எப்போது ராஜகுமாரனாக இருக்க ஆசைப்படுகிறீர்கள்... எப்போது சூனியக்காரக் கிழவனாக இருக்க விரும்புகிறீர்கள் என்பதை நீங்களே முடிவு செய்துகொள்ளுங்கள்! இதெல்லாம் உங்களுடைய விருப்பம்!'' என்று சொல்லிவிட்டு மணமாலையை எடுத்து ராஜகுமரானுக்கு சூட்ட... அந்த கணத்திலிருந்து ஒரு நொடிகூட அந்த ராஜகுமாரன் தன்னுடைய சூனியக்கார முகத்தை காட்டவில்லை.

இந்தக் கதையிலிருந்து அறியப்படும் பாடம் அழகானது.

ஆணாக இருந்தாலும் சரி, பெண்ணாக இருந்தாலும் சரி... அடிமனதில் புதைந்து கிடக்கும் ரகசியம் ஒன்றுதான்.

எல்லோருமே அவர் அவர் சம்பந்தப்பட்ட முடிவுகளை தாங்களே எடுக்க விரும்பு கிறார்கள்!