'ஒன்றே குலம் என்று பாடுவோம்...'

என் கணவரின் ஊரான தாதன்குளத்தில் உலக ரட்சகர் ஆலயத் திருவிழாவுக்கு சென்றிருந்தோம். அங்கிருந்த சிறுவர்கள், என் கணவரின் கையில் இருந்த கேமராவை வேடிக்கை பார்க்க, உடனே, "பிள்ளைகளா... உட்காருங்க. உங்களை ஒரு போட்டோ எடுக்கிறேன்" என்றேன். அங்கு போடப்பட்டிருந்த கல் மீது எல்லாப் பிள்ளைகளும் ஜாதி, மத பேதமின்றி ஒன்றாக அமர்ந்தனர். நான் முதல் முதலாக எடுத்த இந்தப் புகைப்படம், ஆலய ஆல்பத்திலும் இடம் பெற்றுள்ளது.

- ஜூலியட் டேனியல், கோவை

'சுத்தம் என்பது நமக்கு சொர்க்கம் உள்ள வீடுதான்...'

நமக்கெல்லாம், ஒரு கையால் 'மாப்'பிங் பண்ணுவதற்குள் தாவு தீர்ந்துவிடும். இங்கே பாருங்களேன்... இரண்டு கைகளிலும் இந்தக் குட்டி கலக்குவதையும், இன்னொரு குட்டி கிடைத்ததையெல்லாம் கீழே போடத் தயாராக இருப்பதையும்.

மூன்று வருடங்களுக்கு முன்பு லண்டன் சென்றிருந்தபோது என் தங்கையின் பேத்திகள் அடித்த லூட்டியை ஓயாமல் ரசித்த நான், அப்படியே 'கிளிக்'கியது இது.

- ரமணி, பெங்களூரு

'கண்ணா... கருமை நிற கண்ணா!'

எங்கள் செல்லக்குட்டி மானஸா படுசுட்டி. அவளுக்கு நான்கு வயதாக இருந்தபோது பள்ளியின் சுதந்திரதின விழாவில் மாறுவேடப் போட்டியில் எடுத்த போட்டோ இது. ஆசையோடு நாங்கள் செய்த சின்னக் கண்ணன் மேக்கப்பை ஆர்வத்துடன் போட்டுக் கொண்டவளுக்கு கிடைத்தது... முதல் பரிசு! வீடு திரும்பியதும், "அம்மா, கண்ணன் வேஷம் போட்டேன்ல. ஆனா, வெண்ணெய் பானையை மட்டும் எங்கே காணோம்?'' என்று உதட்டைச் சுழித்து கேட்டாளே பார்க்கலாம்..!

-ஆர்.சாந்தி, தூத்துக்குடி

'சந்திப்போமா... இனி சந்திப்போமா?'

என் திருமணம் 1967-ல் நடந்தபோது எடுத்த போட்டோ இது. பள்ளித் தோழிகள், உறவுகள் என்று பலரும் கூடி நிற்கிறார்கள். இதில், தோழி சுதாவை இன்றும் பார்ப்பதுண்டு. ஆனால், மற்ற தோழிகளை அன்று பார்த்ததுதான். 42 வருடங்களானாலும் அவர்களையெல்லாம் சந்திக்க மாட்டோமா என்ற ஏக்கம் அடிமனதில் எழுகிறது. 'அவள் விகடன்' மூலம் அந்த வாய்ப்பு கிட்டும் என்று எதிர்பார்க்கிறேன்.

- ஜெயலஷ்மி கணேஷ், சென்னை-20

'பேய்கள நம்பாதே... பிஞ்சுல வெம்பாதே..!'

பதினைந்து ஆண்டுகளுக்கு முன், நண்பர்கள் குடும்பம் புடைசூழ நானும், கணவரும் சுற்றுலா சென்றிருந்தோம். ஏதோ ஒரு பூங்காவில் பூத சிலையைப் பார்த்ததும், அங்கே நின்று கொண்டு போட்டோ எடுக்கச் சொன்னோம். "இந்தப் பூதத்தைப் பார்த்தா... எங்களுக்கே பயமாயிருக்கு. உங்களுக்குப் பயமே இல்லையா?" என்று கலாய்த்தனர் என் கணவரும் தோழியின் கணவரும். நாங்களோ... ஒரே குரலில், "உங்களோட எல்லாம் குடும்பம் நடத்தறதுக்கே நாங்க பயப்படல... இந்தப் பூதத்துக்கா பயப்படுவோம்?" என்றோம். அப்போது அவர்களின் முகம் போன போக்கைப் பார்த்து, நான் வாய் விட்டுச் சிரிக்க... சட்டென்று 'கிளிக்'கிவிட்டனர்.

- சுபா தியாகராஜன், சேலம்

சுவாரஸ்யமான சம்பவங்களை நினைவுபடுத்தும் புகைப்படங்கள் உங்கள் வீட்டுப் பரணிலும் இருக்கிறதா? எடுங்கள் அவற்றை. சம்பவங்களோடு எங்களுக்கு எழுதி அனுப்புங்கள். (குறிப்பு கடிதத்தில் உங்களின் முழு முகவரி, தொலைபேசி எண்ணை குறிப்பிட வேண்டியது அவசியம். புகைப்படங்களை கண்டிப்பாகத் திருப்பி அனுப்ப இயலாது).

முகவரி 'போட்டோ அனுப்புங்க... சேதி சொல்லுங்க!'
அவள் விகடன், 757, அண்ணாசாலை,
சென்னை-600 002