கண்கள்ல தீரம், கைகள்ல பலம், கால்கள்ல வேகம்னு மைதானத்துல சீறிப்பாயறாங்க ஹேமாஸ்ரீ. கோவை, நிர்மலா கலைக்கல்லூரியில இரண்டாம் வருட மாணவி.

"சமீபத்துல வியட்னாம்ல நடந்த 'ஏசியன் கேம்ஸ்', தடை தாண்டுதல் போட்டியில வெண்கலம் வென்ற வீரமங்கை இவ! மேடம், இந்திய அளவுல நிகழ்த்தி இருக்கற சாதனைகளும் எக்கச்சக்கம்தான்!"னு ஃப்ரெண்ட்ஸ் எல்லாம் இன்ட்ரோ கொடுக்க, இயல்பா ஆரம்பிச்சாங்க ஹேமாஸ்ரீ...

"ஒண்டிப்புதூர்தான் சொந்த ஊர். அப்பா ஜெயபால், அம்மா ராஜாமணியோட ஊக்கம்தான் இந்த வெற்றி, புகழுக்குக் காரணம். சின்ன வயசுலயே தடகளத்தின் மேல எனக்கு இருந்த ஆர்வத்தை கவனிச்ச அப்பா, கோச் பார்வதி மேம்கிட்ட ஒப்படைச்சார். அவங்கதான் என் முயற்சியை எல்லாம் வெற்றியா மடை மாத்தினாங்க!"னு சொல்ற ஹேமாஸ்ரீக்கு, அதுக்கு அப்பறம் நிகழ்ந்திருக்குது ஒரு துயர தொய்வு.

"ஸ்கூல் வரைக்கும் வழிகாட்டியா இருந்த பார்வதி மேம், கேன்சரால பாதிக்கப்பட்டு இறந்துட்டாங்க. அதுக்குப் பிறகு, கை தூக்கிவிட ஆள் இல்லாம நின்ன என்னைக் கண்டெடுத்து, அடுத்தடுத்த கட்டங்களுக்கு ஏற்றிவிட்டார்... இப்போ இருக்கற கோச் நந்தகுமார் சார். எங்க காலேஜும் துணை நிக்குது"னு சொல்ற இந்த இளம் சாதனையாளர், ஒரு தடவை சர்வதேச வெற்றி, தேசிய அளவுல இருபதுக்கும் மேற்பட்ட வெற்றிகள், மாநில அளவுல முப்பதுக்கும் மேற்பட்ட வெற்றிகள்னு குவிச்சுருக்காங்க.

"100 மீட்டர் தடை ஓட்டத்தை, 14.4 நொடியில கடந்த தேசிய சாதனையும், நேஷனல் லெவல் தடகளத்துல சீனியர் மற்றும் ஜூனியர் பிரிவுல இரண்டாமிடம் வகிக்கறதும் நான் பெருமையா நினைக்கற வெற்றிகள்"னு சிரிக்கற ஹேமாஸ்ரீ,

"என் தந்தை... சாதாரண மில் தொழிலாளி. என் குடும்பத்தோட வறுமை, கஷ்டம் எல்லாம் கடந்து வந்திருக்கற நான், ஒவ்வொரு முறை போட்டியில ஓடத் தொடங்கறதுக்கு முன்னாடியும், 'இந்த வெற்றிதான் என் வாழ்க்கையை மாற்றியமைக்கப் போகுது'னு நினைச்சுப்பேன்"னு தன் வெற்றிக்கான ரகசியத்தை சொன்ன ஹேமாஸ்ரீ,

"இந்தியாவுல நடக்கவிருக்கற காமன்வெல்த் போட்டியில சாதனைகள் படைக்கணும். அப்புறம், ஒலிம்பிக்ஸ்ல ஜெயிச்சு நாட்டுக்கு பெருமை சேர்க்கணும்!"னு உறுதியான குரல்ல ஓங்கி ஒலிச்சாங்க!