'பன்றிக் காய்ச்சல் ரிட்டர்ன்ஸ்!'

- சமீப நாட்களாக நாளிதழ் செய்திகள் நமக்கு மீண்டும் பன்றிக் காய்ச்சல் பயத்தை விநியோகிக்க ஆரம்பித்துவிட்டன. 'நமக்கும் பன்றிக் காய்ச்சல் வந்துடுமோ..?' என்ற அச்சம் மக்களுக்கு எழுவது தவிர்க்க முடியாததாகி விட்டது.

A(H1N1) எனப்படும் ஒருவகை வைரஸ் மூலம் பரவும் 'ஸ்வைன் ஃப்ளூ' எனப்படும் இந்த பன்றிக் காய்ச்சல் நோய், உலகத்தையே உலுக்கிக் கொண்டிருக்கிறது. கடந்த ஆண்டு இந்தியாவில் ஆயிரத்துக்கும் மேற்பட்டோர் பாதிப்புக்கு உள்ளானதாகவும், ஐம்பதுக்கும் மேற்பட்டவர்கள் பலியானதாகவும் புள்ளிவிவரங்கள் தெரிவிக்கின்றன.

இந்நிலையில், கடந்த சில தினங்களில் மட்டுமே பத்துக்கும் மேற்பட்டோர் தமிழகத்தில் பலியாகிவிட, பன்றிக் காய்ச்சல் பீதி, பழையபடி மக்களை படபடக்க வைத்துள்ளது. இதைத் தொடர்ந்து இந்நோயைத் தடுக்க மத்திய, மாநில அரசுகள் முழு வீச்சில் களம் இறங்கியுள்ளன. தடுப்பூசி மையங்களில் மக்கள் கூட்டம் குவிகிறது.

இந்நிலையில் சென்னை மாநகராட்சி மருத்துவமனையில் பணியாற்றி ஓய்வு பெற்ற டாக்டர் பஞ்சாட்சரம் செல்வராஜன், 'பன்றிக் காய்ச்சல் குறித்து தேவையான விழிப்பு உணர்வு மற்றும் தேவையற்ற பீதி' பற்றி இங்கே விவரிக்கிறார்.

"இந்த நோயைப் பற்றிக் கேள்விப்பட்டவர்கள், பன்றியைப் பார்த்து பதறத் தேவையில்லை என்பதை முதலில் சொல்லிவிடுகிறேன். இந்த நோயை உருவாக்கும் வைரஸ், பன்றிகளிடம் காணப்படும் ஒரு வைரஸ் போல தோற்ற மளித்ததன் காரணமாகவே இதை 'பன்றிக் காய்ச்சல்' என்கிறார்கள். ஆனால், இந்நோய்க்கும் பன்றிக்கும் சம்பந்தமில்லை.

இந்த நோயைப் பொறுத்தவரைக்கும் சிக்கல் தரும் விஷயம் என்னவென்றால்... அடையாளம் காண்பதுதான். காய்ச்சல், இருமல், தொண்டை வலி, மூக்கடைப்பு, உடல் வலி, தலைவலி, குளிர், உடல் அசதி, எப்போதாகிலும் வாந்தி மற்றும் வயிற்றுப் போக்கு என்று பலவிதமான அறிகுறிகளை வெளிப்படுத்தும் இந்நோய்க்கு, 'இதுதான் பன்றிக் காய்ச்சல்' என்று உறுதியாகச் சொல்லும்படியான பிரத்யேக அறிகுறிகள் என்று எதுவும் இல்லை. சிலசமயம் காய்ச்சலே இல்லாதவர்களுக்கு செய்யப்பட்ட சோதனையில்கூட 'பாஸிட்டிவ்' என்று முடிவு வரலாம்.

கூடவே, சாதாரணமாக மழையில் நனைந்தவுடன் நமக்கு வரும் காய்ச்சலுக்கும், இதற்கும் பெரிய வேறுபாடு எதுவும் கிடையாது. இந்தக் குழப்பங்களால்தான் இன்றைய சூழலில் காய்ச்சல் வந்தாலே, 'ஸ்வைன் ஃப்ளூ பாதிப்பாக இருக்குமோ..?' என்று பயம் ஏற்படுகிறது. அந்த வீண் பீதி தேவை இல்லை. காரணம், இயல்பாகவே நமக்கு இந்த நோய்க்கான எதிர்ப்பாற்றல் உள்ளது" என்று நம்பிக்கை தந்த டாக்டர் செல்வராஜன், இந்த நோய் தாக்க அதிக வாய்ப்புள்ளவர்களைப் பட்டியலிட்டார்...

"பன்றிக் காய்ச்சல் தாக்குதலால் மிகஎளிதாக பாதிக்கப்படுபவர்கள் ஆறு வயதுக்குட்பட்ட குழந்தைகளும், அறுபத்தி ஐந்து வயதுக்கு மேற்பட்ட முதியவர்களும்தான்" என்றவரிடம்,

"தற்போது பன்றிக் காய்ச்சல் பாதிப்பால் இறந்தவர்களில் அனைத்து வயதினரும் இருக்கிறார்களே?" என்றோம்.

"இந்த நோயைப் பொறுத்தவரை காய்ச்சல் வந்த ஓரிரு நாள்களில் யாரும் இறக்கவே மாட்டார்கள். குறைந்தபட்சம் பத்து நாட்களுக்குப் பிறகுதான் இறப்பே நிகழும். முதல் மூன்று, நான்கு நாட்களுக்கு, 'சாதாரண காய்ச்சல்' என்று அலட்சியப்படுத்திவிட்டால், ஆபத்தை விலைக்கு வாங்குவதாகத்தான் அர்த்தம்.

தொடர்ந்து குடிப்பழக்கம் உள்ளவர்கள், ஆஸ்துமா எனும் ஈளை நோய், நீரிழிவு நோய், சிறுநீரக - கல்லீரல் நோய்கள், ரத்தக் குறைபாடு நோய், ஹெச்.ஐ.வி. பாதிப்புக்கு உள்ளானவர்கள் மற்றும் தொடர்ந்து ஸ்டீராய்டுகள் உட்கொள்பவர்கள் போன்றவர்களையும் இந்நோய் தாக்க வாய்ப்பிருக்கிறது - அவர்கள் எந்த வயதினராக இருந்தாலும்! தவிர, இயல்பிலேயே நோய் எதிர்ப்புச்சக்தி குறைவாக அமையப் பெற்றவர்களையும் தாக்கலாம்" என்ற டாக்டர்,

"மக்களை அலர்ட் செய்வதற்காக சில எச்சரிக்கை குறிப்புகளைச் சொல்லப் போகிறேன். இதையெல்லாம் அச்சுறுத்தலாக எடுத்துக் கொள்ள வேண்டாம்'' என்று சொல்லி தொடர்ந்தார்.

''குழந்தைகளைப் பொறுத்தவரை... மூச்சுத் திணறல், தோல் நீல நிறமாதல், காய்ச்சலுடன் தோலில் திட்டுக்கள், போதிய அளவு திரவங்கள் உட்கொள்ளாமையும்; பெரியவர்களைப் பொறுத்தவரை... மூச்சுத் திணறல், மார்பிலும் வயிற்றிலும் வலி அல்லது அழுத்தம், திடீரென ஏற்படும் தலைச்சுற்றல், கடுமையான, தொடர்ச்சியான வாந்தி, காய்ச்சல் மற்றும் தலைவலி போன்ற பிரச்னைகளுக்கு உடனடி கவனம் கொடுத்து, மருத்துவமனை செல்ல வேண்டும். அங்கே பன்றிக் காய்ச்சலுக்கான பரிசோதனைகள் மற்றும் மருந்துகளை பரிந்துரைப்பார்கள்.

மேற்கூறிய அறிகுறிகளில் ஏதேனும் இருப்பின் சம்பந்தப்பட்டவர்கள் மக்கள் அதிகமாகக் கூடும் இடங்களுக்குச் செல்வதையும், பஸ், ரயில் பயணங்கள் போன்றவற்றையும் தவிர்க்கலாம். ஓரிரு தினங்கள் வீட்டிலேயே தங்கி சிகிச்சை எடுப்பதோடு, ஓய்வு மிகவும் அவசியம். கைகளை அடிக்கடி சோப் போட்டுக் கழுவலாம். இருமும்போதும், தும்மும்போதும் முகத்தை மூடிக் கொள்வது நலம். இவையெல்லாம் இந்நோய் பாதிப்பு கண்டவர்களிடமிருந்து, நோய்க்கிருமிகள் மற்றவர்களுக்கு கடத்தப்படாமல் இருப்பதற்கான அறிவுறுத்தல்கள்" என்ற டாக்டர்,

"இந்நோய் பாதிப்புக்கு உட்பட்டவர்களில் லட்சத்தில் ஒருவர் மட்டுமே உயிரிழக்க நேரிடலாம். ஆனால்... கிரிக்கெட் ஆட்டத்தின் 'ஸ்கோர்' போல், இறந்தவர்களின் எண்ணிக்கையை வெளியிட்டு ஊடகங்கள் பீதியைக் கிளப்புவது வருத்தமான விஷயம்" என்று தன் வருத்தத்தைப் பதிவு செய்துவிட்டு, பன்றிக் காய்ச்சலுக்கான தடுப்பூசிகள் பற்றிப் பேசினார்.

"ஐந்து நாட்கள் கடும் உடல் வலியோடு கடந்து போகும் இந்நோய்க்கு, இப்போது வெளிநாடுகளில் தடுப்பூசி போட்டுக் கொள்கிறார்கள். ஆனால், 'நாமார்க்கும் குடியல்லோம் - நமனை அஞ்சோம்' என்று ஹெப்படைடிஸ்-பி போன்ற உயிர்க்கொல்லி நோய்களுக்கே அலட்சியத்தில் தடுப்பூசி போட்டுக் கொள்ளாத நம் இந்திய மக்கள், இப்போது, பன்றிக் காய்ச்சலுக்கு தடுப்பூசி போட்டுக்கொள்ள முண்டியடிப்பது, அந்த நோய் பற்றி அவர்களிடம் பரப்பப்பட்டுள்ள தேவையற்ற பயத்தையே காட்டுகிறது.

இத்தடுப்பூசி... மருத்துவர்கள், மருத்துவமனை ஊழியர்கள், நெரிசலான, சுகாதாரமற்ற இடங்களில் பணிபுரிபவர்களுக்கு அத்தியாவசியமானது. எனினும், அனைத்து மக்களும் கட்டாயமாக போட வேண்டும் என்கிற அவசியமில்லை.

இப்போது இந்தியாவிலேயே இந்நோய்க்கான தடுப்பூசிகளும், மூக்கில் ஸ்ப்ரே செய்துகொள்ளும் மருந்துகளும் தயாராகிவிட்டன. இவை 70-80% தடுப்பாற்றல் கொடுக்க வல்லது. இதன் ஆற்றல் ஒரு ஆண்டு காலம் வரையே நீடிக்கும் என்பது குறிப்பிடத்தக்கது" என்ற டாக்டர் செல்வராஜன்,

"எது எப்படியோ... ஏதேனும் நோய்வாய்ப்பட நேரிட்டால் தாமதிக்காமல் மருத்துவரிடம் சென்று தெளிவு பெறுவதும், சிகிச்சை பெறுவதும் சரியான அணுகுமுறை. நோயையும் வைத்துக் கொண்டு, 'பன்றிக் காய்ச்சலா இருக்குமோ..?' என்ற பயத்தையும் வைத்துக் கொண்டு இருப்பது அநாவசியமானது!" என்று எச்சரித்தார்!