ஒவ்வொன்றுக்கும் பரிசு

150

'எல்லாமே ஐ.எஸ்.ஐ-தான்!'

தபால் துறையில் பணிபுரிந்த என் கணவரின் அலுவலகத்துக்கு அன்று வருடாந்தர இன்ஸ்பெக்ஷனுக்காக உயரதிகாரி வந்திருந்தார். மரியாதை நிமித்தம் அவரை வீட்டுக்கும் அழைத்துவந்தார். ஒரு பிளேட்டில் பிஸ்கட்டுகளும், காபியும் கொடுத்து உபசரித்தேன் நான். சற்று கண்டிப்பான அந்த அலுவலரோ, ''நோ நோ... நான் எங்கயும் எதுவும் சாப்பிடறதில்ல...'' என்றார் கறாராக. நானும் என் கணவரும் தயங்கி நிற்க, என் ஆறு வயது சுட்டிப் பையன் அவரிடம், ''சார்... இதெல்லாம் ஐ.எஸ்.ஐ. முத்திரை போட்ட பிஸ்கட்தான். வேணும்னா கவரைப் பாருங்க...'

என்று கவரை எடுத்து வந்து காண்பித்ததுடன், ''இதுவும் ஃபில்டர் காபிதான். சாப்பிட்டுட்டு 'பேஷ் பேஷ்'னு சொல்லுவீங்க...'' என்று துடுக்காகப் பேச, சிரித்தேவிட்ட அந்த ஸ்ட்ரிக்ட் அலுவலர், ''ஸ்மார்ட் பாய்'' என்று அவனைக் கொஞ்சிவிட்டுப் போனார்!

இன்று அந்த 'ஸ்மார்ட் பாய்', ஜெர்மனியில் பிஹெச்.டி படித்துக்கொண்டுஇருக்கிறான்!

- ஜெயா ஸ்ரீனிவாசன், சென்னை-83

'மீதி நூல்... பையில்'!

என் பெண்ணும், மாப்பிள்ளையும் சமீபத்தில் அமெரிக்காவிலிருந்து நாடு திரும்பி, சென்னையில் குடியேறியுள்ளனர். என் ஏழு வயது பேத்திக்கு தமிழ் சொல்லிக் கொடுப்பதுதான் இப்போது எனக்கு முக்கிய அசைன்மென்ட். செய்யுள் சொல்லிக்

கொடுத்தபோது, 'நீதி நூல் பயில்' என்று வாசித்துவிட்டு, ''அப்படீனா என்னனு சொல்லு பார்ப்போம்...'' என்றேன். ''அது வந்து.. நாம தைக்கும்போது நூல் மிச்சமானா, அதை பத்திரமா எடுத்து பையில வெச்சுக்கணும். அதுதான் 'மீதி நூல் பையில்' '' என்று அவள் கூறிய அர்த்தத்தில் நான் விழுந்து விழுந்து சிரிக்க... ''குட்டிக்கு கற்பனையைப் பாரேன்...'' என்று கொஞ்சிக் கொண்டார் அவளுடைய தாத்தா!

- வசந்தா தியாகராஜன், விழுப்புரம்

நரகமாக மாறிய நகரம்!

முதலாம் வகுப்பு படிக்கும் என் பேத்தி, அன்று என்னிடம் ஓடி வந்து, ''பாட்டி...

'நரக வாழ்க்கை' பத்தி சொல்லுங்களேன்...'' என்றாள். ''அது எதுக்குடி உனக்கு..?'' என்று நான் கேட்க, ''நாளைக்கு தமிழ் கிளாஸ்ல சொல்லணும்... மிஸ் டைரியில எழுதி விட்டிருக்காங்க பாருங்க...'' என்று சொல்ல, அப்போதுதான் புரிந்தது 'நகர வாழ்க்கை'யை 'நரக வாழ்க்கை' ஆக்கிய என் பேத்தியின் மழலை மொழி!

வீட்டில் அனைவரிடமும் இதை நான் சொல்லிச் சிரிக்க, 'அப்படி என்ன நாம ஜோக் சொல்லிட்டோம்..!' என்று புரியாமல் விழித்தாள் என் செல்ல பேத்தி!

- எஸ்.ஞானகுமாரி, சென்னை-101

உங்கள் வீட்டு குட்டீஸ் குறும்புகளையும் இந்தப் பகுதியில் அரங்கேற்றலாம். அனுப்ப வேண்டிய முகவரி, 'குட்டீஸ் குறும்பு', அவள் விகடன் 757, அண்ணாசாலை, சென்னை -600 002.