பரதநாட்டியம், நம்மளோட பாரம்பரியம். அந்த நாட்டியத்தை ஆறாவது படிக்கறப்பவே கத்துக்க ஆரம்பிச்சு, பதினோராவது படிக்கறப்ப... மத்தவங்களுக்கு கத்துக் கொடுக்கற குரு அளவுக்கு உயர்றது எவ்வளவு பெரிய விஷயம்! அப்படி உசந்திருக்கற ஒரு பொண்ணு... பாரதி!

கரூர், அரசுப் பள்ளியில பதினோராம் வகுப்பு மாணவியா இருக்கற இந்த பாரதி, வார இறுதி நாட்கள்ல, பதினஞ்சு குழந்தைங்களுக்கு பரத கிளாஸ் எடுக்கற நாட்டிய குரு! இதுவரைக்கும் 350 மேடைகளுக்கும் மேல அரங்கேற்றம் நடத்தியிருக்கற பாரதிக்கு, தமிழக அரசோட 'கலை இளமணி விருது', 'கலை இசைவாணி', 'யுவகலா பாரதி', 'நவரச நாட்டிய திலகம்'னு விருதுகள் குவிஞ்சுட்டே இருக்கு.

''எங்க வீட்டுக்கும் பரதத்துக்கும் சம்பந்தமே இல்ல. அப்பா ஜவுளிக்கடை வெச்சுருக்கார். அம்மா இல்லத்தரசி. எனக்கு ஆறு வயசு இருக்கும்போது, டி.வி-யில வர்ற பரதநாட்டிய பாட்டு, அந்த காஸ்ட்யூம்ஸ் எல்லாம் பார்த்துட்டு ஆசையாகி, 'பரதநாட்டிய கிளாஸ் போறேன்'னு நான் சொன்னப்போ, அப்பாவுக்கும், அம்மாவுக்கும் ஆச்சர்யம், சந்தோஷம். சுஜாதானு ஒரு குருகிட்ட சேர்த்து விட்டாங்க. வர்ணத்துல இருந்து தில்லானா வரை எல்லா கிரேடுகளையும் பதிமூணு வயசுலயே முடிச்சுட்டேன். 'குரு'வாகற தகுதியை எட்டிட்டேன்''னு சொல்ற பாரதி, நடனத்தை தன்னோட திறமையா மட்டும் நினைக்காம, மத்தவங்கள மகிழ்விக்கற கலையாவும் கொண்டாடறது, சிறப்பு!

''எங்க ஊர்ல இருக்கற குழந்தைகள் காப்பகத்துக்கும், மனநிலை பாதிக்கப்பட்டவங்களோட காப்பகத்துக்கும் அடிக்கடி போய் பரதம் ஆடுவேன். பெரிய மேடைகள்ல, கலைஞர்கள் முன்னாடி ஆடும்போதும் பெருமையா... சந்தோஷமா இருக்கும். சுனாமி வந்தப்போ, அந்த வருஷம் முழுக்க என் கச்சேரிகள்ல எனக்கு கிடைச்ச அன்பளிப்புத் தொகையை, சுனாமியால பாதிக்கப்பட்டவங்களுக்கு அனுப்பி வெச்சேன்.

பரதம் மட்டுமில்ல... பாட்டு, வீணையிலயும் பல பரிசுகளை வாங்கியிருக்கேன். ஸ்டாம்ப் கலெக்ஷன், காயின் கலெக்ஷன்யும் டிஸ்ட்ரிக்ட் அளவுல முதலிடம் நான்தான்!''னு சொன்னப்போ, பெருமிதம் அவங்க முகத்துல.

''சமீபத்துலதான் இந்தியாவில இருக்கற சித்தர் கோயில்களுக்கெல்லாம் போய் பரதம் ஆடிட்டு வந்தேன். நடனத்தைப் பார்க்க வந்த குட்டிப் பொண்ணுங்களுக்கு எல்லாம், கண்ணுல மின்னல். 'அக்கா நாங்களும் பரதம் கத்துக்கணும்னு ஆசையா இருக்கு'னு ஆர்வமா சொன்னாங்க. அதுதான் நான் எதிர்பார்த்தது. வருங்காலத்துல கிராமப்புறங்கள்ல பரதப் பள்ளி ஆரம்பிக்கணுங்கறதுதான், என்னோட லட்சியம்!'' என்று ஆர்வம் பொங்கச் சொன்னாங்க பாரதி!

அடுத்து வரப்போறது... அஞ்சாவது படிக்கறப்பவே பரதத்தைக் கத்துக்கிட்டு, இப்ப கலா மாஸ்டரே கன்னத்துல கை வைக்கற அளவுக்கு ஆச்சர்யப்படுத்திக்கிட்டிருக்கற அஸ்வதி!

''அஞ்சாவது படிக்கும்போது, 'எல்லாரும் என்ன ஆகப் போறீங்க..?'னு டீச்சர் கேட்டப்போ, 'டாக்டர்', 'இன்ஜினீயர்', 'டீச்சர்' இப்படி வந்த பதில்களுக்கு நடுவுல, 'டான்ஸர்'னு சொல்லி கிளாஸை சர்ப்ரைஸ் ஆக்கினேன் நான். சமீபத்துல கோவை செம்மொழி மாநாட்டுல பங்கேற்ற 2,337 நடன கலைஞர்கள்ல, 'பெஸ்ட் பெர்ஃபார்மர் அவார்ட்' வாங்கினப்போ, லட்சியத்தை அடைஞ்சுட்ட சந்தோஷம் மனசுக்குள்ள!''னு அழகா ஆரம்பிச்ச அஸ்வதி, திருச்சி, கலைக்காவிரி காலேஜ்ல பி.எஃப்.ஏ. செகண்ட் இயர் மாணவி.

''ஆறாவது படிக்கும்போதே பரதம் கத்துக்க ஆரம்பிச்சேன். பதினோராம் வகுப்பு படிச்சப்போ என்னோட முதல் நிகழ்ச்சிக்கு வாய்ப்பு கிடைச்சது, ஒரு சுவாரஸ்ய அனுபவம். திருப்பூர், மாரியம்மன் கோயில் திருவிழாவுல நைட் பத்து மணிக்கு எனக்கு டைம் கொடுத்திருந்தாங்க. ஆனா, அதுக்கு முன்னதா நடந்துகிட்டிருந்த நிகழ்ச்சிகள் முடியறதுக்கு நேரமாயிட்டதால, காலையில மூணு மணிக்குத்தான் எனக்கு மேடை கிடைச்சுது. தூக்க கலக்கம், கலைஞ்ச மேக்கப்போட மேடை ஏறினாலும், தொடர்ந்து ஆறரை மணி நேரம் ஆடி, ஆடியன்ஸை அசத்தினேன். அதுல இருந்து பிக்-அப் ஆயிடுச்சு என்னோட ஆட்டம்...''னு சொல்ற அஸ்வதி, இதுவரைக்கும் 800 மேடைகள்ல நடன நிகழ்ச்சிகள், ஒரு பொதுமேடையில 335 பாடல்களுக்கு 13 மணி நேரம், இருபது நிமிஷம் தொடர்ந்து பரதம் ஆடின சாதனை, கலைஞர் டி.வி, 'ஆட்டம் பாட்டம்' நிகழ்ச்சியில வின்னரா வந்தப்போ, 'நான் அஸ்வதியோட ஃபேன்'னு சொன்ன கலா மாஸ்டரோட பாராட்டுனு தொடர்ந்து அசத்திட்டு இருக்காங்க.

''பரதநாட்டியத்துல சிவபெருமானோட 108 கரணங்கள (நாட்டிய முத்திரைகள்) புகுத்தி ஆடறதை, பத்மா சுப்ரமணியம் மேடத்தோட ஸ்பெஷலா சொல்லுவாங்க. இப்போ, நானும் என் நாட்டிய அரங்கேற்றங்கள்ல அந்த 108 முத்திரைகள அபிநயங்களா பிடிக்கறது, என்னோட பாக்கியம்!''னு அடக்கமா முடிச்சாங்க அஸ்வதி!