''அம்மா, ஹோம் வொர்க் செய்யணும். ப்ளீஸ் சீக்கிரம் வாங்க...'' என்று குழந்தைகள் அம்மாவிடம் அன்பாகக் கெஞ்சி, கொஞ்சிக் கொண்டிருந்த அழகான மாலை நேரம் அது... வாய் கொள்ளாத சிரிப்போடும் சந்தோஷத்தோடும் நம்மிடம் பேசினார் தமிழ்நாடு கொண்டாடிய நடிகை, ஆந்திராவின் அதிரடி அரசியல்வாதி ரோஜா!

'' 'செம்பருத்தி'யில நீங்க என்னைப் பார்த்தப்போ, நான் ஒண்ணும் தெரியாத டீன் ஏஜ் பொண்ணு. இப்போ, இந்த உலகத்தை என் அறிவுக்கு எட்டின வரைக்கும் புரிஞ்சுட்டிருக்கற அனுபவசாலி. இத்தனை வருஷ என்னுடைய வாழ்க்கைப் பயண வழியில நான் கடந்த பெருமதிப்புக்குரிய ஆண்கள் இவங்க...'' என்று அறிமுகத்தோடு வார்த்தைகள் தொடர்ந்தார் ரோஜா!

''செல்வமணி. என் கணவர். என் முதல் பட இயக்குநரான அவர் மேல எனக்கு அப்போ ஏற்பட்டது பெரிய மரியாதையும் பக்தியும். சினிமா நடிகைனா நல்ல கலரா இருக்கணும்ங்கற இலக்கணத்தை உடைச்சு, 'செம்பருத்தி'யில அவர் என்னை ஹீரோயினா அங்கீகரிச்சாலும், அந்த நேரத்துல பிறரால நான் ரொம்ப அவமானப்படுத்தப்பட்டிருக்கேன்.

'இதையெல்லாம் யாரு ஹீரோயினா ஒப்புக்குவாங்க, என்ன தைரியத்துல இவர் நடிக்க வைக்கறார், இந்த படத்தோட காணாமப் போயிரும்'னு ஒவ்வொரு நிமிஷமும் வார்த்தை அம்புகள் விழுந்துகிட்டே இருக்கும். அப்போவெல்லாம் என்னை சரியா கைட் பண்ணி, நம்பிக்கையான வார்த்தைகள் சொல்லி நேர் செய்தவர் செல்வமணி. அவர் தந்த ஊக்கமும் உற்சாகமும்தான் நூறு படங்கள்ல என்னை நடிக்க வெச்சுது.

பொது வாழ்க்கைக்கு தைரியமா வரவெச்சதும் அவர்தான். 'நீ கம்பீரமானவ. உன்னால இது முடியும்'னு வார்த்தைகளுக்குள்ள தன்னம்பிக்கையைத் திணிச்சு திணிச்சு என்னை உயரச் செய்தவர். என் சிறகுகள சுதந்திரமா அகல விரிச்சுப் பறக்க வெச்சவர். என் காதல் கணவர், என் குழந்தைகளுக்கு பாசமான அப்பாங்கற உயிரான உறவு மட்டுமில்ல... எப்பவும் என் கூடவே இருக்கற குருவும் அவர்தான்!

எங்க அண்ணன் குமாரசாமி, எனக்கு கண்டிப்பான பிரம்பு. நாம உயரமா வளர்ற நேரம், எல்லாரும் நம்மை வானளாவ புகழ்வாங்க. ஆனா, அதுல பெரும்பாலும் உண்மை இருக்காது. அந்த புகழ்ச்சிக்கு மத்தியிலயும் ரொம்ப சத்தமா ஒரு குரல் வரும்... 'நீ சரியான பாதையில போகல, இந்த விஷயத்த நீ இப்படி செஞ்சுருக்கணும்'னு நம்ம முகத்துக்கு நேரா கண்டிப்போட சொல்லப் படற அந்த விமர்சனம்... அந்த நிமிஷம் நம்மள ரொம்ப கஷ்டப்படுத்தும், காயப்படுத்தும். ஆனா யோசிச்சுப் பார்த்தா, அதுதான் நம்ம வாழ்க்கையை நேரான பாதையில, நிறைய கற்களையும் முட்களையும் அதிக வலியில்லாம தாண்டி வர வெச்சிருக்கும். எனக்கு அப்படி ஒரு நேர்மையான விமர்சகர் என் அண்ணன். எனக்கு கிடைச்ச பொக்கிஷமான க்ரிடிக் அவர்தான்.

என் அரசியல் வாழ்க்கையில ரொம்ப முக்கியமானவர், நான் மதிக்கறவர்... சந்திரபாபு நாயுடு. சித்தூர்ல ஒரு சின்ன ஊர்ல பிறந்து, ஆந்திர அரசியல் எல்லைகளை விஸ்தரிச்சவர். தேசிய அரசியலிலும் முக்கிய நபரா இருக்கிறவர். அரசியல் ஆர்வம் ஏற்பட்டு நான் தெலுங்கு தேசம் கட்சியில சேர்ந்தப்போ, அவர்கிட்ட நான் கத்துக்கிட்ட ஆரோக்கியமான அரசியல் அரிச்சுவடிகள் நிறைய. எப்பவும் ஒரு தெளிவான 'விஷனோட' இருப்பார். 'ஒரு விஷயத்த ஆரம்பிக்கிறதுக்கு முன்ன ஆயிரம் தடவ யோசிக்கணும், அந்த விஷயத்துல இறங்கிட்டா, அப்புறம் யோசிக்காம, தொடர்ந்து போய்கிட்டே இருக்கணும்'னு செயல்படற அவரோட அரசியல் ஸ்டைல் எனக்குப் பிடிக்கும்.

இப்போ அந்தக் கட்சியில இருந்து நான் விலகிட்டாலும், எப்பவும் என் அரசியல் குரு, ரோல் மாடல் அவர்தான்!

எல்லாருக்கும் ரஜினி சாரைப் பிடிக்கும். எனக்கு ரொம்பப் பிடிக்கும். நடிப்புக்கு நல்ல உடம்பும், நல்ல கலரும் வேணும்னு சினிமாத் துறை நம்பிக்கிட்டு இருந்த காலகட்டத்துல... ஸ்டைலா வந்து ஸ்கிரீன்ல நின்னு, 'நடிக்கச் தெரிஞ்சா நடிகனாகலாம்டா...'னு நிரூபிச்சவர். தன்னோட எளிமைய மட்டுமே எப்பவும் வெளிப்படுத்திக்கற அவரோட வாழ்க்கை முழுக்க தன்னம்பிக்கை அத்தியாயங்களால நிறைஞ்சது. 'நாம கறுப்பா இருக்கோமேங்குற தாழ்வு மனப்பான்மை எனக்குள்ள இருந்துச்சு. ரஜினி சாரைப் பார்த்து பார்த்துதான் நான் அதை தூக்கி எறிஞ்சேன். அதனாலதான் சினிமாவுல என்னால ஷைன் பண்ண முடிஞ்சது'னு பேட்டிகள் தந்திருக்கற எத்தனையோ சினிமாத்துறை ஆட்களுக்கு... அவர்தான் எனர்ஜி. எனக்கும்!

இவங்க எல்லாம் என் போற்றுதலுக்கு உரியவங்க. ஒரு பெண்ணை சக மனுஷியா மதிக்கற, மரியாதையோடவும் நட்போடவும் நடத்துற ஆண்கள் எல்லாருமே என் மரியாதைக்கு உரியவங்க!