வயல்வெளிகளில் வெள்ளாடுகளைப் பார்த்ததுண்டா? முன்னங்கால்களைத் தூக்கிக் கொண்டு ஒன்றின் மீது ஒன்று விழுந்து விளை யாடும். ஏதாவது ஒரு ஆட்டுக்குட்டி ஓரமாக ஒதுங்கி நின்றால், அதையும் மற்ற ஆடுகள் விளையாட அழைக்கும். நம்முடைய பாண்டியாட்டம், கல்லா - மண்ணா விளையாட்டுகள் போல... இவை ஆடுகளின் விளையாட்டுகள்!

விலகி நின்று பார்க்கும்போது விலங்குகள் அனைத்தும் சாப்பிடுவது, அசைபோடுவது, தூங்குவது என்று மட்டுமே பொழுதைக் கழிப்பது போன்று தோன்றும். ஆனால், விலங்குகளின் வாழ்க்கையை இந்த அளவுக்கு எளிமைப்படுத்திவிட முடியாது. விலங்குகளுக்கு என்று அவற்றின் உலகில் ஒரு தனி சமூகம், ஊருக்கே பெரிய ஆள், குடும்பத்துக்கு பெரியவர் என்று சமுதாயத்தில் பல அடுக்குகள், ஏற்றுக் கொள்ளக்கூடிய செயல்பாடுகள், ஏற்கமுடியாத செயல்பாடுகள், மகிழ்ச்சி, காதல், விருப்பு, வெறுப்பு, பயம், மன அழுத்தம் என்று எல்லாமும் உண்டு. விலங்குகளின் உலகம் ஓர் அதிசய அரங்கம்!

ஆப்பிரிக்க நாடான கென்யாவில் இருக்கும் மாஸி மாரா காடுகளுக்கு சென்ற அனுபவங்களை 'சந்தோஷ தேசம்' என்ற பெயரில் ஜொனாத்தன் என்பவர் புத்தகமாக எழுதியிருக்கிறார். அந்தக் காட்டில் ஒரு தாய் சிங்கம், மரத்தின் நிழலில் ஹாயாக படுத்திருக்க, குட்டிகள் அதன் முதுகில் வரிசையாக சறுக்கு மரம் விளையாடியதை விரிவாக எழுதியிருக்கிறார். நம் வீடுகளில் அப்பாவின் தொப்பையில் குழந்தைகள் சறுக்குமரம் விளையாடும் காட்சியை இது உங்களுக்கு நினைவுபடுத்துகிறது இல்லையா?

ஆளரவமற்ற வயல்வெளிகளில் மின் கம்பியிலிருந்து தலைகீழாக தொங்கும் குருவிகள், சட்டென்று கம்பியிலிருந்து பிடியை விலக்கிக்கொண்டு Ôஸ்கூபா டைவிங்Õ போல மண்ணை நோக்கி விழுந்து, தரையை எட்ட கொஞ்ச தூரம் இருக்கும்போது சடாரென்று மேல் நோக்கி Ôடைவ்Õ அடித்து பறந்து மீண்டும் மின்கம்பியில் தொங்குவதையும் பார்க்கலாம்.

கிச்சு கிச்சு விளையாட்டு, குழந்தைகளுக்குப் பிடித்தது. சுண்டெலி மற்றும் 'பபூன்' வகை குரங்குகளுக்கும்கூட இந்த 'கிச்சு கிச்சு' ஆட்டம் ரொம்பவே பிடிக்கும். சுண்டெலிகள் பற்றிய ஆராய்ச்சிக் கூடத்தில், ஆராய்ச்சியாளர்கள் சில சுண்டெலிகளிடம் கிச்சு கிச்சு மூட்டி விளையாட, ஆரம்பத்தில் தயங்கினாலும்... போகப் போக அந்த ஆராய்ச்சியாளர்கள் சீரியஸாக வேலை பார்த்துக் கொண்டிருக்கும் நேரங்களில்கூட இவை அவர்களை கிச்சு கிச்சு ஆட்டம் ஆட அழைக்கும் அளவுக்கு பழகிவிட்டனவாம்.

நம்மைப்போலவே விலங்குகளும் ஸ்பரிசங்களை விரும்புகின்றன. உங்கள் செல்ல நாய்க்குட்டியின், பூனைக்குட்டியின் முதுகை, தொப்பையை மென்மையாக தேய்த்து விளையாடிப் பாருங்கள். அவை ஸ்பரிசத்தை எந்த அளவுக்கு விரும்புகின்றன என்பதை உங்களால் உணர முடியும்.

நம் வீட்டில் ஒரு குழந்தை இருந்தால்... அதற்கு பாட்டிலில் பாலை ஊற்றிக் கொடுத்துவிட்டு விலகி வந்து விடுவோமா என்ன? செல்லப் பிராணிகளும் குழந்தைகள் மாதிரிதான். அவற்றுக்கு வெறுமனே உணவு மட்டும் கொடுத்துவிட்டால் போதாது என்பதை உணருங்கள்.

மழைக் காலம் என்பதால் வெளியே எங்கேயும் விடாமல் உங்கள் செல்லப் பிராணியை வெகுநாட்களாக நீங்கள் வீட்டுக்குள்ளேயே அடைத்து வைத்திருந்தால், அவற்றை ஒரு மைதானத்துக்கு அழைத்துச் சென்று சுதந்திரமாக விட்டுப் பாருங்கள். சந்தோஷத்தில் அவை என்னவெல்லாம் செய்கின்றன என்பதை பார்த்து நீங்கள் ஆச்சர்யப்பட்டுப் போவீர்கள்!