Published:Updated:

படி... படி... அடுத்தபடி!

பாரம்பரியம் பேசும் கலை சார்ந்த படிப்புகள்..!

படி... படி... அடுத்தபடி!

பாரம்பரியம் பேசும் கலை சார்ந்த படிப்புகள்..!

Published:Updated:
##~##

 சில படிப்புகள் வெறும் படிப்பாக மட்டுமல்லாமல் கலையாகவும் இருக்கும். ஆம்... நம் பண்பாடு மற்றும் பாரம்பரியம் பேசும் இசை, நடனம், ஓவியம், சிற்பம் உள்ளிட்ட கலை சார்ந்த படிப்புகள், தற்போது முறைப்படி பல்கலைக்கழகங்களிலேயே கற்றுவிக்கப்படுகின்றன. அவற்றில் பலவற்றை நம் அரசாங்கம் இலவசமாகவும், குறைந்த கட்டணத்திலும் வழங்குவது, நமக்கெல்லாம் வரப்பிரசாதம். இந்த இதழில் கலை சார்ந்த சில படிப்புகளும், அதைப் பற்றிய தகவல்களும் இடம்பிடிக்கின்றன.

அரசு இசைக் கல்லூரி!

ஒட்டுமொத்த விகடனுக்கும் ஒரே ஷார்ட்கட்!

தமிழ்நாடு அரசின் கலை பண்பாட்டுத்துறை சார்பாக... சென்னையில் இயங்கி வரும் கல்லூரி. முழு நேர மற்றும் மாலை நேர வகுப்புகளில் பல்வேறு பயிற்சி வகுப்புகள் ஆண்டுதோறும் நடத்தப்பட்டு வருகின்றன. அவை...

இசைக்கலைமணி: குரலிசை, வயலின், வீணை, புல்லாங்குழல் ஆகியவற்றில் மூன்று ஆண்டுகளுக்கான பட்டயப் படிப்பு இது. இதனுடன் பொது இசையியல் கட்டாயமாகக் கற்றுத் தரப்படும். செயல்முறைப் பயிற்சி வகுப்புகள் நடத்தப் படுகின்றன. செயல்முறைப் பயிற்சியில் முக்கியப் பாடம், ஒரு துணைப்பாடம் என்ற வகையில் பயிற்றுவிக்கப்படும்.

படி... படி... அடுத்தபடி!

குரலிசையை முக்கியப் பாடமாக மேற்கொண்டவர்கள் கருவியிசையை துணைப்பாடமாகவும், கருவியிசையை முக்கியப்பாடமாக மேற்கொள்பவர்கள் குரலிசையை துணைப்பாடமாகவும் கற்க வேண்டும். தவிர, குரலிசை பயில்வோர் சிறப்பு இசையியல், பரதநாட்டியம், மிரு தங்கம், புல்லாங்குழல், நாட்டுப்புறக்கலை ஆகியவற்றில் ஏதேனும் ஒன்றை துணைப் பாடமாகக் கற்கலாம். இந்த மூன்று ஆண்டு பட்டயப் படிப்பில் சேர்வதற்கு தகுதி...  எட்டாம் வகுப்பு தேர்ச்சி. வயது... 13    முதல் 18.

வாத்தியக் கலைமணி: மிருதங்கம், கடம், கஞ்சிரா, முகர்சிங், நாகஸ்வரம், தவில் போன்ற பயிற்சிகள் வழங்கப்படும்.   இது, மூன்று ஆண்டு படிப்பு. சேர விரும்புபவர்கள், கட்டாயம் எட்டாம் வகுப்பு தேர்ச்சி பெற்றிருப்பதோடு, 13 வயது முதல் 18 வயதுக்குள் இருக்க வேண்டும்.

ஆடற்கலைமணி: மூன்று ஆண்டு படிப்பான ஆடற்கலைமணி பட்டயப் படிப்பில் சேர எட்டாம் வகுப்பு தேர்ச்சியும், 13 வயது முதல் 18 வயதுக்குள்ளும் இருக்க வேண்டும். இந்த மூன்று ஆண்டு பயிற்சி வகுப்பில் முழுக்க முழுக்க பரத நாட்டியம் கற்றுத்தரப்படும்.

நாட்டுப்புறக்கலைமணி: நாட்டுப்புறக்   கலைமணி பட்டயப் படிப்புக்கு எட்டாம் வகுப்பு தேர்ச்சி பெற்றிருப்பதுடன், 13 வயது முதல் 18 வயதுக்குள் இருக்க வேண்டியது அவசியம். இந்த மூன்று ஆண்டு படிப்பில் நாட்டுப்புற நடனம் உள்ளிட்ட நாட்டுப்புறக்கலைகள் சார்ந்த அனைத்தும் கற்றுத்தரப்படும்.  

நட்டுவாங்கக் கலைமணி: ஆடற்கலைமணி பட்டயப்படிப்பு முடித்த 15 வயது முதல் 25 வயதுக்குள் உள்ள பெண்கள் மட்டும்தான் இப்படிப்பில் சேர முடியும். இதில் ஆடற்கலையில் உள்ள சில சிறப்பு பயிற்சிகள் வழங்கப்படும்.

மேநிலை இசைக்கலைமணி: இசைக்கலைமணி பட்டயம் பெற்றவர்களுக்கான மேற்படிப்பு இது. இசைத்துறையில் பி.ஏ. மியூஸிக் பட்டம் பெற்றவர்களும் இதில் சேரலாம். 15 வயது முதல் 25 வயதுக்குள் இருக்க வேண்டும். இரண்டு ஆண்டு படிப்பான இதில், இசையில் மேல் நிலை பயிற்சிகள் வழங்கப்படும்.

இசை ஆசிரியர்: இசைக்கலைமணி அல்லது அதற்கு இணையான பட்டயம் பெற்றிருப்பவர்கள், ஓராண்டு பயிற்சியான இதில் சேரலாம். 16 வயது முதல் 25 வயதுக்குள் இருக்க வேண்டும். நேர்முகத்தேர்வில், இசை ஆற்றல் மற்றும் சிறப்புத் தகுதிகளை தெரிவு செய்து அனுமதி வழங்கப்படும். இப்படிப்பை சிறப்பாக முடித்தவர்கள் இசை ஆசிரியராக வாய்ப்புண்டு.

மேற்கண்ட படிப்புகளில் சேருவதற்காக ஆண்டுதோறும் ஜூலை மற்றும் ஆகஸ்ட் மாதங்களில் விண்ணப்பங்கள் விநியோகம் செய்யப்படுகின்றன. நேர்முகத்தேர்வு மற்றும் எழுத்துத் தேர்வுகள் மூலமாக தெரிவு செய்யப்பட்ட பிறகே கல்லூரியில் இடம் அளிக்கப்படும். இப்பயிற்சிகளுக்கு சிறப்புக் கட்டணம் 200 ரூபாய். சேர்க்கை கட்டணம் 2 ரூபாய். பிணையத் தொகையாக 10 ரூபாய். தவிர, இங்கே படிக்கும் மாணவர்களில் 75% வருகை பதிவு உள்ளவர்களுக்கு மாதத்துக்கு 500 ரூபாய் வீதம், 10 மாதங்களுக்கு 5,000 ரூபாய் ஆண்டுதோறும் வழங்கப்படுகிறது. சென்னையில் மட்டுமல்லாது... மதுரை, கோயம்புத்தூர், திருவையாறு போன்ற இடங்களிலும் செயல்பட்டுவரும் அரசு இசைக் கல்லூரிகளில் இத்தகைய பயிற்சி வகுப்புகள் நடத்தப்படுகின்றன.

தொடர்புக்கு: தமிழ்நாடு அரசு இசைக்கல்லூரி, டாக்டர் டி.ஜி.எஸ்.தினகரன் சாலை, சென்னை-28, 044-24937217.

அரசு கவின் கலைக்கல்லூரி

சென்னை அரசு கவின் கலைக்கல்லூரியில் சேருவதற்காக ஆண்டுதோறும் பிளஸ் டூ தேர்வு முடிவு வெளியானதும் விண்ணப்பங்கள் விநியோகம் செய்யப்படுகின்றன. அதில் இளங்கலை (பி.எஃப்.ஏ) பிரிவில் உள்ள ஓவியம், சிற்பம், விஷ§வல் கம்யூனிகேஷன் உள்ளிட்ட பிரிவுகளுக்கு விண்ணப்பிக்கும் மாணவர்களுக்கு நுழைவு தேர்வு மற்றும் நேர்முகத் தேர்வுகள் நடத்தப்படும். இதில் தேர்வாகும் மாணவர்களுக்கு 4 ஆண்டுகளுக்கான பயிற்சிக் கட்டணம் 1,200 ரூபாய். முதுகலை (எம்.எஃப்.ஏ) படிப்புகளும் உண்டு. அதற்கான கட்டணம், 2 ஆண்டுகளுக்கு 2 ஆயிரம் ரூபாய்.

கும்பகோணத்தில் உள்ள அரசு கவின் கலைக்கல்லூரியில் ஓவியம், சிற்பம் உள்ளிட்ட இளங்கலை மற்றும் முதுகலை பட்டப் படிப்புகளும், மாமல்லபுரத்தில் உள்ள அரசு சிற்பக் கல்லூரியில் மரபு கட்டடக்கலை, மரபு சிற்பக்கலை, மரபு வரைகலை மற்றும் வண்ணம் போன்ற இளங்கலை பட்டப்படிப்புகளும் நடத்தப்படுகின்றன.

தொடர்புக்கு: அரசு கவின் கலைக்கல்லூரி, எழும்பூர், சென்னை, 044-25610878. அரசு கவின் கலைக்கல்லூரி, கும்பகோணம், 0435-2481371. அரசு சிற்பக்கல்லூரி, மாமல்லபுரம், 044-27442261.

கலை ஆர்வமிக்கவர்கள் இப்படிப்புகளில் சேர்ந்து படித்தால்... நம் பாரம்பரியக் கலையை வளர்ப்பதோடு, நல்ல வருமானமும் பார்க்க முடியும்.

- சா.வடிவரசு

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism