Published:Updated:

லீச்சா ரோன்ஜூலி!

உழைக்கும் தாய்மார்களுக்காக ஓர் உரத்த குரல்!வேல்ஸ்

லீச்சா ரோன்ஜூலி!

உழைக்கும் தாய்மார்களுக்காக ஓர் உரத்த குரல்!வேல்ஸ்

Published:Updated:
லீச்சா ரோன்ஜூலி!

'தாய்ப்பால் மறக்காத குழந்தையை வீட்டில் விட்டு ஆபீஸ் செல்வதா... ஆபீஸே வேண்டாமென வீட்டிலேயே இருந்துவிடுவதா?’ என்று தவிக்கும் தாய்மார்கள் உலகெங்கும் உண்டு. ஆனால், ஆபீஸர்களுக்கோ... வேலை நடக்க வேண்டும். அவ்வளவுதான்!

##~##

இப்படி கைக்குழந்தையோடு தவிக்கும் தாய்மார்களின் பிரச்னையைப் பற்றி, பங்களா தேஷில் நர்ஸாக வேலை பார்த்த காலம்தொட்டு நிறையவே பார்த்து வெதும்பியிருக்கிறார், லீச்சா ரோன்ஜூலி. பிறகு, தன் இத்தாலி நாட்டின் மருத்துவமனை ஒன்றில் இயக்குராக உயர்ந்தபோதும், ஒரு அரசியல்வாதியைக் கைபிடித்து, தானும் அரசியல்வாதியாகி, ஐரோப்பிய நாடாளுமன்ற உறுப்பினரான பிறகும்... உழைக்கும் தாய்மார்களுக்கு வேலை இடங்களில் கூடுதல் வசதியும் சலுகைகளும் கொடுக்கப்பட வேண்டியதன் அவசியத்தை தொடர்ந்து வற்புறுத்தினார். ஆனால், யாருமே சீரியஸாக எடுத்துக் கொள்ளவில்லை.

இந்நிலையில் இரண்டரை ஆண்டுகளுக்கு முன்பு லீச்சாவுக்கு, அழகான பெண் குழந்தை பிறந்தது. ஆறு வாரங்களே ஆன நிலையில் உழைக்கும் தாய்மார்கள் குறித்த சட்டவரைவு ஒன்று ஐரோப்பிய நாடாளுமன்றத்தில் விவாதத்துக்கு வரவே... பால்மணம் மறக்காத தன் குழந்தை விட்டோரியாவை, தேயிலை தோட்டத் தொழிலாளியைப் போல மார்பிலே கட்டிக் கொண்ட லீச்சா, அந்த விவாதத்தில் பங்கெடுத்து, கருத்துக்களை ஆணித்தரமாக எடுத்து வைத்தார். அவர் பேச்சிலிருந்த கருத்துக்களைவிடவும், அவர் மார்பில் இருந்த குழந்தை, உழைக்கும் தாய்மார்களின் சிரமங்களை நாடாளுமன்ற உறுப்பினர்களுக்கு சத்தமாக தெரிவித்தது.

லீச்சா ரோன்ஜூலி!

பொதுவாக திருமணம், பார்ட்டி... என்றால்கூட சிறுகுழந்தைகளை அழைத்துச் செல்வது அநாகரிகம் என்கிற கலாசாரத்தில் வளர்ந்தவர்கள் ஐரோப்பியர்கள். இத்தகைய பின்னணியில், கைக்குழந்தையோடு லீச்சா நாடாளுமன்றத்துக்கு செல்ல... அத்தனை டி.வி. சேனல்களும், எக்ஸ்க்ளூஸிவ் பேட்டியை ஒளிபரப்ப, இவர் சொல்ல நினைத்த விஷயங்கள் ஏராளமான மக்களை சென்று சேர்ந்தது. ஆனால், சட்ட ரீதியிலான சீர்திருத்தங்கள் கிடைக்கவில்லை. அதனால் குழந்தையோடு நாடாளுமன்றம் செல்வதை வழக்கமாக்கிக் கொண்டார். சுற்றுச்சூழல் பற்றிய ஒரு ஓட்டெடுப்பில் லீச்சா வோட்டளிக்க கையை உயர்த்தியபோது, மடியில் இருந்த விட்டோரியாவும் கையை உயர்த்தியது, தலைப்புச் செய்தியானது!

இப்போது லீச்சாவும், குழந்தை விட்டோரியாவும் ஏறக்குறைய இரண்டரை வருடங்களாக நாடாளுமன்றத்தின் கூட்டத்தொடர்களில் கலந்துகொண்டு வருகிறார்கள். சட்ட சீர்திருத்தங்கள் இன்னும் வந்தபாடில்லை.

பெண்களுக்கான போராட்டங்கள் எப்போதும் தொடர்கதைதானே..?!