Published:Updated:

"வேலைவாய்ப்பு கனவில் இல்லை... உங்கள் கையில் இருக்கிறது!”

வே.கிருஷ்ணவேணி

பிரீமியம் ஸ்டோரி

'படிப்பதே வேலைக்குத்தான்’ என்கிற உலகத்தில் வாழ்ந்துகொண்டிருக்கிறோம். 'இதற்கு வசதியாக எந்த கோர்ஸில் சேரலாம்' என்கிற விவாதம், வீட்டுக்கு வீடு தொடர்ந்துகொண்டிருக்கிறது. இப்படி வேலைவாய்ப்பை குறிவைத்து படிப்பைத் தேடிக்கொண்டிருக்கும் மாணவர்கள் மற்றும் பெற்றோர்களுக்கு பொதுவான ஆலோசனைகளைத் தருகிறார்... மனிதவள நிபுணரும், 'கெம்பா’வின் நிர்வாக இயக்குநருமான டாக்டர் ஆர்.கார்த்திகேயன்.

"வேலைவாய்ப்பு கனவில் இல்லை... உங்கள் கையில் இருக்கிறது!”

கோர்ஸை தேர்ந்தெடுப்பதற்கு முன்...

''இன்றைய சூழல், நல்ல வேலைவாய்ப்புகளைத் தரக்கூடியதாக அமைந்திருக்கிறது. எனவே, அவற்றுக்கு வழி ஏற்படுத்திக் கொடுக்கும் படிப்புகளைத் தேர்ந்தெடுப்பதில், தெளிவும், பக்குவமும் வேண்டும். மேலைநாடுகளைப் பொறுத்தவரை மாணவர்கள், 'எனக்கு இதில்தான் விருப்பம், அதனால், இதைத்தான் படிப்பேன்’ என தீர்மானமாக முடிவெடுத்து, கால் வைக்கிறார்கள். நம்நாட்டில் மாணவர்களுக்கு ஒரு விருப்பம் இருக்கும்; பெற்றோர்களுக்கு ஒரு கனவு இருக்கும்; அக்கம்பக்கத்தினர் ஒரு படிப்பைச் சொல்வார்கள்; ஊடகங்கள் வேறொன்றை போதிக்கும். இதில் குழம்பி, ஏதோ ஒரு படிப்பில் சேர்ந்து, கரையேற முடியாமல் தவிக்கிறார்கள் பலர்.

அடிப்படை இதுதான். அதாவது, தேர்ந்தெடுக்கப்போகும் கோர்ஸுக்கு தகுந்தாற்போல் உங்களை மாற்றிக்கொள்ள நினைக்காதீர்கள். உங்கள் விருப்பம், திறமையின் அடிப்படையில் ஒரு கோர்ஸை தேர்ந்தெடுங்கள். நிச்சயம் அந்தத் துறையில் உங்களால் வெற்றிக்கொடி நாட்ட முடியும்.

ஐந்து வருடங்களுக்குப் பின்...

ஒரு கோர்ஸை மூன்று முதல் ஐந்து வருடங்கள் படித்து முடித்த பின்தான், வேலைக்குச் செல்ல முடியும். எனவே, இன்றுள்ள வேலைவாய்ப்புகளைவிட, ஐந்து வருடங்கள் கழித்து எந்தெந்த துறைகளுக்கு அதிக வாய்ப்புள்ளது என்றுதான் ஆலோசிக்க வேண்டும். நீடித்த வேலைவாய்ப்புகளைத் தரும் ஆசிரியப் பணி, மனிதவளம், அக்கவுன்ட்ஸ், விற்பனைத்துறை போன்றவற்றைத் தேர்ந்தெடுப்பது புத்திசாலித்தனம். இவை ஏற்ற, இறக்கத்துக்கு அப்பாற்பட்ட துறைகளும்கூட.  

பி.பீ.ஓ என்னவாயிற்று... ஐ.டி என்னவாகும்..?

சில வருடங்களுக்கு முன்பு பி.பீ.ஓ துறை, அனைவரையும் தன்னை நோக்கி வரச் செய்தது. சொல்லப் போனால், கல்லூரி பேராசிரியர்கள்கூட பணிகளை விட்டுவிட்டு, பி.பீ.ஓ துறைப் பணிகளுக்குச் சென்றனர். இன்றோ அந்தத் துறை, வேலைவாய்ப்புகள் குறைந்து காலியாகக் கிடக்கிறது. ஆனாலும், ஐ.டி கோடிங், புராடக்ட் டெவலெப்மென்ட் போன்றவற்றில் நல்ல அறிவு இருப்பவர்களுக்கு, இப்போதும் வேலைவாய்ப்புகள் இருக்கவே செய்கிறது.

ஐ.டி. துறையைப் பற்றிய மாயை இங்கு நிறைய உள்ளது. 'கேம்பஸ் இன்டர்வியூவில் அள்ளிக்கொண்டு போய்விடுவார்கள், சம்பளம் லட்சங்களில்’ என்று, பலரும் இத்துறை சார்ந்த படிப்புகளுக்குத் தொடர்ந்து படையெடுக்கிறார்கள். ஆனால், வேலைகள் உருவாகும்போதுதான் வேலைவாய்ப்புகள் உருவாகும். அதற்காக, 'ஐ.டி. இறங்குமுகத்தில் இருக்கிறது. இனி, அந்தத் துறையில் வேலைவாய்ப்பில்லை’ என்று சொல்வதும் தவறு. வேலைக்குத் தகுதியான ஆட்களை எல்லா நிறுவனங்களும் ஒவ்வொரு வருடமும் எடுத்துக்கொண்டேதான் இருக்கின்றன. எனவே, ஐ.டி துறையைப் பொறுத்தவரை, படித்தவர்களுக்கு எல்லாம் வேலை உண்டு என்பது இல்லை. திறமையானவர்களுக்கு நிச்சயம் வாய்ப்பு உண்டு.  

"வேலைவாய்ப்பு கனவில் இல்லை... உங்கள் கையில் இருக்கிறது!”

எல்லா துறைகளிலும் ஏற்ற, இறக்கம் உண்டு!

படிப்பை முடித்த அடுத்தடுத்த வருடங்களிலேயே லட்சங்களில் சம்பளத்தை எட்ட வேண்டும் என்று லட்சியம் இருக்கலாம், அதை திறமையின் மூலம் சாத்தியப்படுத்தலாம். ஆனால், நிறுவனங்கள் அந்த சம்பளத்தை வழங்க வேண்டும் என்கிற கட்டாய எதிர்பார்ப்பு இருக்கக் கூடாது. அதேபோல, இன்று கோர்ஸ் முடித்த அடுத்த வருடத்தில் இருந்தே வங்கிக் கடனை அடைக்க வேண்டிய சூழ்நிலையில் இருக்கும் மாணவர்கள், பெரிய நிறுவனத்தில், பெரிய வேலைக்குத்தான் போவேன் என்று வந்த வாய்ப்புகளை வீணாக்கக் கூடாது. கிடைத்த வேலையில், ஒரு நடுத்தர நிறுவனத்தில் சேர்ந்து, திறமை, அனுபவம் மூலமாக டாப் நிறுவனத்தில் இடத்தைப் பெறலாம்.

சில துறைகள் தவிர்த்த மற்ற பெரும்பாலான துறைகளிலும் ஏற்ற, இறக்கங்கள் சகஜம். உதாரணமாக, உற்பத்தி சார்ந்த தொழில்கள் இரண்டு வருடங்களாகப் படுத்துவிட்டன. இப்படி ஒவ்வொரு வருடமும் ஏதாவது ஒரு துறையில் ஏற்ற, இறக்கம் நிகழ்ந்துகொண்டுதான் இருக்கும். எனவே, இறக்கத்தில் இருக்கும் துறை சார்ந்த படிப்பைத் தேர்ந்தெடுப்பதில் ஐயம் ஏற்படலாம். ஆனால், ஏற்கெனவே தேர்ந்தெடுத்துப் படித்துக் கொண்டிருப்பவர்கள் குழம்ப வேண்டியதில்லை. சக்கரம் சுழலும்!

படித்துவிட்டு குழம்பாதீர்கள்!

எந்தத் துறைக்கான வேலையைக் குறிவைக்கிறோமோ, அதற்கான படிப்பைத் தேர்ந்தெடுக்க வேண்டும். ஆனால், ஒரு கோர்ஸில் படித்துக் கொண்டிருக்கும்போதே குழம்பி, மற்றொரு துறைக்கு மாறுபவர்களும் உண்டு. பொறியியல் முடித்துவிட்டு, ஐ.ஏ.எஸ், பேங்க் எக்ஸாம் என்று தயாராகிறார்கள். இதற்கு கலை, அறிவியல் டிகிரி படித்திருக்கலாமே, எதற்கு பொறியியல்? கோயம்புத்தூர் பக்கம் பயோடெக்னாலஜி கோர்ஸை விரும்பிப் படிப்பவர்கள் அதிகம் பேர். பயோடெக்னாலஜி படித்து, பிஹெச்.டி முடித்து வெளிநாட்டு வேலைவாய்ப்புக்குச் சென்றவர்கள் ஒரு சதவிகிதத்தினரே. மேலும், ஐ.டி. கோடிங் வேலை பார்த்துக்கொண்டிருப்பவர்களில் முக்கால்வாசிப்பேர் பயோடெக்னாலஜி முடித்தவர்களே. கோடிங் வேலைக்கு, பயோடெக்னாலஜி தேவை இல்லையே? எனவே, பலகட்ட பரிசீலனைகளுக்குப் பின் கோர்ஸைத் தேர்ந்தெடுங்கள், படித்த படிப்புக்கு ஏற்ற வேலை என்பதில் திடமான நம்பிக்கை வையுங்கள்.

பர்சன்டேஜ் மட்டுமே வேலை தராது!

வேலைவாய்ப்பு சந்தையில், முட்டி மோதிப் படித்து நீங்கள் வாங்கியிருக்கும் மதிப்பெண்கள் மட்டுமே உங்களுக்காகப் பேசினால் போதாது... நீங்களும் பேச வேண்டும். அதற்கு, 'சாஃப்ட் ஸ்கில்’களை வளர்த்துக்கொள்ள வேண்டியது அவசியம். இந்த இடத்தில்தான் ஆவரேஜ் மாணவர்களும் மேலே வந்துவிடுகிறார்கள், படிப்பாளிகள் தேங்கிவிடுகிறார்கள். எனவே, படிப்பு தவிரவும் பேச்சுத் திறமை மற்றும் ஆட்டிட்யூடில் உங்களைத் தகுதிப்படுத்தும் சாஃப்ட் ஸ்கில்களை வளர்த்துக்கொள்ள, அதற்கான பயிற்சி வகுப்புகளை, படிக்கும் காலத்திலேயே நாடலாம்'' என்று தெளிவாக பட்டியலிட்ட கார்த்திகேயன்,

''ஆல் தி பெஸ்ட்!'' என்று வாழ்த்தினார்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு