Published:Updated:

ஒரு வருடப் படிப்பு... இரண்டு வருடமானால்..?

சா.வடிவரசு

பிரீமியம் ஸ்டோரி

''1987-ம் ஆண்டு லேப் டெக்னீஷியன் படிப்பை முடித்து வேலைவாய்ப்பு அலுவலகத்தில் பதிவு செய்தேன். அப்போது ஒரு வருட கோர்ஸாக இருந்த லேப் டெக்னீஷியன் படிப்பானது, 1993-ம் ஆண்டு முதல் இரண்டு வருடப் படிப்பாக மாற்றப்பட்டது. இந்நிலையில் வேலைவாய்ப்பு அலுவலகம் மூலமாக பலமுறை நேர்முகத் தேர்வுக்கான அழைப்புக் கடிதங்கள் வந்தும், நேரில் சென்றபோதெல்லாம், 'நீங்கள் படித்த இன்ஸ்டிட்யூட் அரசால் அங்கீகரிக்கப்படவில்லை, ஒரு வருடம் லேப் டெக்னீஷியன் முடித்தவர்களுக்கு எல்லாம் அரசு வேலை தர முடியாது’ என்ற பதிலே கிடைத்தது. இதனால் மிகுந்த மனஉளைச்சலுக்கு ஆளானேன். என்னைப் போல நூற்றுக்கணக்கானோருக்கு இதே பிரச்னைதான்.

ஒரு வருடப் படிப்பு...   இரண்டு வருடமானால்..?

இது இப்படியிருக்க, இதுநாள் வரை ஒரு வருடப் படிப்பாக இருந்து வந்த பி.எட் படிப்பும், இனி இரண்டு வருடப் படிப்பாக மாறப்போகிறது என்கிற செய்தி வெளியாகி வருகிறது. இப்படி மாற்றப்பட்டால், ஒரு வருட பி.எட் கோர்ஸ் படித்தவர்களுக்கும் அரசு வேலைவாய்ப்பு கிடைப்பதில் சிக்கல் வரலாம்... ஒரு வருட லேப் டெக்னீஷியன் கோர்ஸ் முடித்தவர்களை புறக்கணித்தது போல!''

- சென்னை, திருவல்லிக்கேணியைச் சேர்ந்த வாசகி மணிமேகலை, நம் அலுவலக தொலைபேசி எண்ணில் (04428512121), இப்படி தன் ஆதங்கத்தை வெளிப்படுத்தியிருந்தார்.

இதுகுறித்து சென்னை, சாந்தோமில் உள்ள மாவட்ட வேலைவாய்ப்பு அலுவலகத்தின் இணை இயக்குநர் சம்பத்திடம் கேட்டபோது,

''அரசு அங்கீகாரம் பெற்ற கல்லூரிகளில் லேப் டெக்னீஷியன் படிப்பை முடித்தவர்களுக்கு மட்டுமே வேலைவாய்ப்பு அலுவலகம் மூலமாக அரசுப் பணிகளை வழங்கி வருகிறோம். அரசு அங்கீகாரம் பெற்ற கல்லூரிகளில் ஒரு வருட லேப் டெக்னீஷியன் கோர்ஸ் படித்தவர்களும் இதில் அடங்குவார்கள்.

93-ம் ஆண்டுக்கு முன்புவரை லேப் டெக்னீஷியன் படிப்பானது ஒரு வருடப் படிப்பாக இருந்து வந்தது. அந்த காலகட்டங்களில் அதிகமானோர் அரசு அங்கீகாரம் பெறாத இடங்களில் இந்தப் படிப்பை முடித்திருக்கிறார்கள். இன்றைக்கும் அதிகமான தனியார் கல்லூரிகள் அரசு அங்கீகாரம் பெறாமல் லேப் டெக்னீஷியன் படிப்பை 6 மாதம், ஒரு வருடம் என்று நடத்தி வருகிறார்கள். இத்தகைய நிறுவனங்களில் படிப்பவர்களுக்கு வேலைவாய்ப்பு அலுவலகம் மூலம் அரசுப் பணி கிடைக்காது. வேலைவாய்ப்பு அலுவலகம் மூலமாக தனியார் நிறுவனங்களில் வேலை கிடைக்க வாய்ப்பு உள்ளது.

வேலைவாய்ப்பு அலுவலகம், அரசுப் பணியிடங்களுக்கு மட்டும் ஆட்களை பரிந்துரை செய்யும் மையம் அல்ல. தனியார் நிறுவனங்களில் உள்ள பணியிடங்களுக்கும் தேவையின் அடிப்படையில் ஆட்களை பரிந்துரை செய்து வருகிறது. இதற்காக நடத்தப்படும் வேலைவாய்ப்பு முகாம்கள் குறித்த அறிவிப்புகள், வேலைவாய்ப்பு அலுவலக அறிவிப்புப் பலகை தொடங்கி, அதன் வலைதளம், செய்தித்தாள் என்று வெளியிடப்பட்டு வருகிறது. இதன் மூலமாக ஆண்டுதோறும் ஆயிரக்கணக்கானோர் பயனடைகிறார்கள்.

படித்த கல்லூரி, முடித்த கோர்ஸ் உள்ளிட்டவை, வேலைவாய்ப்பு அலுவலகம் மூலமாக அரசுப் பணி பெற தகுதியில்லாதவையா என்ற சந்தேகங்கள் உள்ளவர்கள், நேரடியாக எங்கள் அலுவலகத்தை தொடர்புகொண்டு தெளிவும், எங்களது ஆலோசனைகளையும் பெற்றுச் செல்லலாம்'' என்று சொன்னவர்,

''பி.எட் படிப்பானது இரண்டாண்டு படிப்பாக மாறவிருக்கிறது என்கிற செய்தி கடந்த சில ஆண்டுகளாகவே வந்துகொண்டிருக்கிறது. ஆனால், இதுநாள் வரை எந்தவித அரசு வெளியீடுகளும் இதுகுறித்து வெளியாகவில்லை. எனவே, ஒரு வருட பி.எட் படித்தவர்கள் குழம்ப வேண்டாம். அவர்களது தகுதிக்கேற்ப நிச்சயம் அரசு வேலை கிடைக்கும்'' என்று நம்பிக்கை ஊட்டினார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு