Published:Updated:

85 வயதில்... 250 வகை மெழுகுவத்திகள்!

வே.கிருஷ்ணவேணிபடங்கள்: இரா.யோகேஷ்வரன், மாடல்: லத்தீரா கங்கை

85 வயதில்... 250 வகை மெழுகுவத்திகள்!

வே.கிருஷ்ணவேணிபடங்கள்: இரா.யோகேஷ்வரன், மாடல்: லத்தீரா கங்கை

Published:Updated:

''மெழுகுவத்தி தொழில், நம்பித் தொடங்கறவங்க வாழ்க்கையில வெளிச்சம் ஏற்றும். இந்த மாதிரி கலை சார்ந்த தொழிலில் நம்ம கற்பனைத் திறன்தான் வெற்றிக்கான சாவி. அப்படி இந்தத் தொழிலில் என் கற்பனையில் விரிந்த மெழுகுவத்தி வடிவங்கள்தான், என்னை இதில் 45 வருடங்களா வெற்றிக்கொடி நாட்ட வெச்சிருக்கு!''

- உற்சாகமாகச் சொல்கிறார் சென்னை, நங்கநல்லூரைச் சேர்ந்த 85 வயது ஜானகிராமன்.

''தீபாவளி, கார்த்திகை, கிறிஸ்துமஸ்னு இது ஒளியின் சீஸன்! 45 வருஷத்துக்கு முன்ன இப்படி ஒரு சீஸன்லதான் இந்தத் தொழிலைக் கையில் எடுத்தேன். சிலர், ஒரு குறிப்பிட்ட காலத்துக்கு மேல செய்யும் தொழில்ல பணநிறைவு, மனநிறைவு இல்லைனு சொல்லி, தொழிலின் ஆழத்தைப் பார்க்கவே ஆசைப்படாம, வேற தொழிலுக்கு மாறிடுறாங்க. எனக்கும் அப்படி ஒரு நிர்பந்தம் வந்தபோதும் பொருட்படுத்தாம, இந்த கேண்டில் மேக்கிங் தொழிலைத் தொடர்ந்தேன். என்னை இந்தத் தொழிலில் ஒரு தூணா நிலைநிறுத்திக்க, கற்பனை, புதுமைனு மெனக்கெட்டேன். இன்னிக்கு மெழுகுவத்தி தயாரிப்பு என்றாலே, என் பெயரைத் தவிர்க்க முடியாதபடி வேரூன்றியிருக்கேன்.

ஒட்டுமொத்த விகடனுக்கும் ஒரே ஷார்ட்கட்!

85 வயதில்... 250 வகை மெழுகுவத்திகள்!
85 வயதில்... 250 வகை மெழுகுவத்திகள்!

ஃப்ளோட்டிங், உருவ பொம்மைகள், பூக்கள், பறவைகள், விலங்குகள், கான்செப்ட் மெழுகுவத்திகள்னு, கிட்டத்தட்ட 250க்கும் மேற்பட்ட டிசைன்களில், எல்லையில்லா கற்பனையில் மெழுகை வார்த்தேன். 1972ல் கலைஞர் பிறந்த நாளுக்கு நான்கு அடி உயர மெழுகுவத்தி செய்து கொடுத்தேன். சோழா ஹோட்டல்ல கேண்டில் டின்னருக்கு, 1,500 மெழுகுவத்திகளை குறைஞ்ச நேரத்தில் செய்து கொடுத்து பாராட்டுகளை வாங்கியிருக்கேன். வி.ஜி.பி.கோல்டன் பீச்சுக்கு ஆர்னமென்டல் கேண்டிலை 12 அடி உயரத்தில் செய்து கொடுத்தேன். ஆர்ட் ஆசிரியர்களுக்கும், நபார்டு, எம்.எஸ்.எம்.இ போன்றவற்றுக்கும் பயிற்சியாளரா இருக்கேன். ஆந்திரா, கர்நாடகா போன்ற மாநிலங்களுக்கும் போய் மெழுகுவத்தி தயாரிப்பு பயிற்சி கொடுத்திருக்கேன்!'' என்று வியக்க வைக்கும் ஜானகிராமன், தான் செய்யும் கேண்டில்களில் 'வேக்ஸ் கிராஃப்ட் ஆர்ட்டிஸ்ட்’  என்கிற அச்சில், தன் வயதையும் அச்சிடுவதை வழக்கமாக வைத்திருக்கிறார்.

''சிலர் இதை கவனிச்சு எங்கிட்ட கேட்பாங்க. 'இந்த வயசுலயும் இந்தக் கலையில் ஆர்வத்தோட ஈடுபட்டிருக்கேன்னு சொல்லத்தான், அச்சிட்டிருக்கேன்!’னு சொல்லுவேன். இத்தனை வருஷத்துல எனக்கு எவ்வளவோ வருமானம் கொடுத்த இந்த கேண்டில் தொழில் மூலம், இப்போவும் மாதம் 20,000 ரூபாய் சம்பாதிச்சிட்டு இருக்கேன். வாழ்க்கையில் ஒளியேற்றுவதுனு சொல்லுவாங்க, என் ஆயுளுக்கும் ஒளியேற்றிட்டு இருக்கு, நான் செய்ற கேண்டில்கள்!''

ஜானகிராமனைப் பார்த்து சிரிக்கின்றன அவர் செய்து வைத்திருக்கும் மெழுகுவத்திகள்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism