இறங்குமுகத்தில் மஞ்சள் விலை... காத்திருக்கும் விவசாயிகள்!

சந்தைக்கேற்ற சாகுபடி! லாப ஊருக்கு ஒரு வழிகாட்டி!துரை.நாகராஜன், படங்கள்: ரமேஷ் கந்தசாமி

யல் விளைச்சலை அள்ளிக் கொடுத்திருந்தாலும்... சந்தையில் விலை கிடைத்தால்தான் லாபம் கிடைக்கும். ‘ஒவ்வொரு பயிருக்கும் எந்தப் பருவத்தில் நல்ல விலை கிடைக்கும், சந்தையின் தேவை என்ன?’ என்பது போன்ற அடிப்படையான சில தகவல்களைத் தெரிந்துகொண்டால், ‘விலை இல்லை’ என்ற கவலையே இருக்காது. ஒவ்வொரு பயிருக்குமான சந்தைத் தகவல்களை அலசுகிறது, இத்தொடர். கடந்த இதழில் இடம்பிடித்திருந்த மஞ்சள் குறித்த தகவல்களின் தொடர்ச்சி இங்கே...

உழவன் உற்பத்தியாளர் நிறுவனத்தைச் சேர்ந்த நல்லசாமி, மஞ்சளுக்கான சந்தை வாய்ப்பு குறித்து நம்மிடம் சில தகவல்களைப் பகிர்ந்துகொண்டார்.

“தற்போது மஞ்சள் வரத்து குறைவாகவே இருக்கிறது. தவிர, தற்போதைய சந்தை வாய்ப்பும் மிக மோசமாக இருக்கிறது. அவ்வப்போது, சந்தைக்கு வரத்தாகும் மஞ்சளும் பழைய மஞ்சள்தான். இதை, பவுடருக்குப் பயன்படுத்தலாமே தவிர, ஏற்றுமதி செய்ய முடியாது. தமிழ்நாட்டில் ஈரோடு, சேலம், திருச்செங்கோடு போன்ற பகுதிகளில் அதிகமாக மஞ்சள் பயிரிடப்படுகிறது. ஈரோடு மாவட்டத்தில் நான்கு விற்பனை மையங்கள் உள்ளன. அனைத்து மையங்களிலும் சீசனில், மஞ்சள் வரத்து அதிகமாக இருக்கும். ஆனால், ஒரு சில மையங்களில் முறையான ரசீதுகள் தரப்படுவதில்லை என்ற குற்றச்சாட்டு உள்ளது. தவிர, சேமித்து வைத்து எடைபோடும்போது, கல், தூசி எனக் காரணம் காட்டி, 50 கிலோ மூட்டைக்கு 5 கிலோ வரை கழித்துவிடுவார்கள்.

எங்கள் உற்பத்தியாளர் நிறுவனத்தில் அப்படியில்லை. விவசாயிகள் கொண்டு வரும் மஞ்சளை உடனடியாகத் தரம் பிரித்து 50 கிலோ மூட்டையாகக் கட்டி உடனடியாக அன்றைய விலை நிலவரத்தின்படி விற்பனை செய்வோம். விற்பனை விலையில் ஒன்றரை சதவிகிதம் எங்கள் நிறுவனத்துக்குக் கிடைக்கும். வாராவாரம் வெள்ளிக்கிழமை இங்கு விற்பனை நடந்து வருகிறது.

எந்த விளைபொருளாக இருந்தாலும் சரி... அறுவடை முடித்து மூட்டை போடும்போதே அதில் உள்ள தூசிதும்புகளை நீக்கிக் கொண்டுவந்தால், அது உடனடியாக விற்பனையாகும். எதிர்பார்க்கும் விலையும் கிடைக்கும். முதல் மதிப்புக்கூட்டல் தூசி தும்புகளை நீக்கி தரம் பிரிப்பதுதான். அப்போதே அதன் மதிப்பு உயர்ந்துவிடும். மஞ்சள் சாகுபடியைத் துவக்கும் முன்பே ஏற்றுமதிக்கேற்ற ரகங்களைத் தேர்வு செய்து விதைக்க வேண்டும். வெளிநாடுகளுக்கு 10 சதவிகித அளவு மஞ்சள்தான் ஏற்றுமதி செய்யப்படுகிறது. மருத்துவப் பயன்பாட்டுக்கு கிழங்காகவும்; எண்ணெயாக மாற்றியும் ஏற்றுமதி செய்யப்படுகிறது. ஈரோடு மாவட்டத்தில் ஏக்கருக்கு 25 குவிண்டால் முதல் 40 குவிண்டால் வரை மகசூல் கிடைக்கிறது. ஆனால் சேலம் பகுதிகளில் 25 மூட்டை வரைதான் மகசூல் கிடைக்கும்.

மஞ்சளில் உள்ள ‘குர்க்குமின்’ என்ற வேதிப் பொருளின் அடிப்படையில்தான் மஞ்சள் தரம் பிரிக்கப்படுகிறது. தரம் மற்றும் ரகத்தைப் பொறுத்தவரையில் சேலம், மினி சேலம், டி.டி.எஸ்-10 ஆகிய ரகங்கள் அதிகம் ஏற்றுமதிக்காகப் பரிந்துரைக்கப்படுகின்றன. வருகிற நவம்பர் மாதத்துக்கு மேல், தேவை அதிகம் இருந்தால் மட்டுமே மஞ்சளுக்கு நல்ல விலை கிடைக்கும். ஆனால், ஏப்ரல் மாதம் விலை குறைந்துவிடும். எப்போதும் வரத்து குறைந்தால் விலை கூடும். ஆனால், தற்போது வரத்தும் இல்லை, விலையும் இல்லை. சிறு விவசாயிகள் இருப்பு வைக்காமல் விற்பனை செய்துவிட்டனர். பெரு விவசாயிகள் மட்டும்தான் விலை அதிகரிக்கும் என நினைத்து இருப்பு வைத்துள்ளனர். ஆனால், சந்தையில் விலை இறங்கு முகமாகவேதான் இருக்கிறது. தற்போது குவிண்டால் 8 ஆயிரத்து 500 ரூபாய் வரை விற்பனையாகிறது” என்றார் நல்லசாமி.

ஈரோடு வேளாண்மை உற்பத்தியாளர் மற்றும் கூட்டுறவு விற்பனையாளர் சங்கச் செயலாளர் குணசேகரன், “இப்போது சந்தை நிலவரம் சரியில்லை. மஞ்சளுக்கான சந்தை வாய்ப்பு அடி மட்டத்துக்குச் சென்றுவிட்டது. ஆன்லைனைப் பின்பற்றி விற்பனை நடப்பதால் அதற்கேற்றபடிதான் விலை நிர்ணயம் செய்யப்படுகிறது. தினசரி 10 டன், 12 டன் என்ற அளவில்தான் விற்பனையாகிறது. ஜனவரி மாதத்துக்குப் பிறகுதான் சந்தைக்குப் புதிய மஞ்சள் வரும் என எதிர்பார்க்கப் படுகிறது. தற்போது ஏற்றுமதி விகிதமும் குறைந்துவிட்டது. அதனால், மஞ்சள் விவசாயிகள் மிகுந்த ஏமாற்றத்துக்கு உள்ளாகியிருக்கிறார்கள். விலை ஏறுவதற்கான சாத்தியக்கூறுகள் இப்போதைக்கு இல்லை. அடுத்தடுத்த மாதங்களில் தேவை அதிகரித்து, வரத்து குறைந்தால் மட்டுமே விலை அதிகரிக்க வாய்ப்பு உண்டு” என்றார்.

Do you like the story?

Please Appreciate the Author by clapping!

Editor’s Pick

மாதத்திற்கு 7 எக்ஸ்க்ளுசிவ் கட்டுரைகள் படிக்க லாகின் செய்யுங்கள்அனைத்து எக்ஸ்க்ளுசிவ் கட்டுரைகளையும் படிக்க சந்தா செய்யுங்கள்