மழை வந்தால் பார்ப்போம்... கைவிரித்த கர்நாடக முதல்வர்!

எம்.புண்ணியமூர்த்தி

யிரக்கணக்கான போராட்டங்கள், ஆர்ப்பாட்டங்கள், எண்ணற்ற வழக்குகள், தமிழக அரசு எழுதிய கடிதங்கள் என அத்தனை முயற்சிகளுக்குப் பிறகும், தமிழகத்துக்குத் தண்ணீர் கொடுக்க மறுத்தே வருகிறது, கர்நாடகா.

உரிய நேரத்தில், கொடுக்க வேண்டிய தண்ணீரைக் கொடுக்காததால், ஏற்கெனவே குறுவைச் சாகுபடி பொய்த்துப் போய்விட்டது. தற்போது சம்பா சாகுபடிக்கும் தண்ணீர் இல்லாமல் தவித்துக்கொண்டிருக்கிறார்கள், டெல்டா பகுதி விவசாயிகள். இந்நிலையில், ‘கடிதங்களுக்குத்தான் மசியவில்லை... நேரில் போய்க் கேட்டாலென்ன?’ என்று முடுவெடுத்த தமிழக விவசாயிகள், கர்நாடக முதல்வர் சித்தராமையாவைச் சந்திக்க, இப்போதும் கைவிரித்துவிட்டார் அவர்.

கடந்த ஆகஸ்ட் 25-ம் தேதி, ‘கர்நாடக அரசு காவிரி நடுவர்மன்றத் தீர்ப்பின்படி சம்பா சாகுபடிக்காவது தண்ணீர் திறந்து விட வேண்டும்’ என்ற கோரிக்கையோடு, உழவர் உழைப்பாளர் கட்சித் தலைவர் கு.செல்லமுத்து, தி.மு.க முன்னாள் நாடாளுமன்ற உறுப்பினர் கே.பி.ராமலிங்கம், தமிழக ஏரி மற்றும் ஆற்றுப்பாசன விவசாயச் சங்க மாநிலத் தலைவர் பூ.விஸ்வநாதன், தமிழக விவசாயிகள் சங்க மாநிலத்தலைவர் கே.வெங்கடாச்சலம், தமிழக விவசாயிகள் சங்கங்களின் தேசிய ஒருங்கிணைப்பாளர் தூரன் நம்பி, தமிழக விவசாயிகள் சங்க பொதுச்செயலாளர் ஏ.பி.திருநாவுக்கரசு, தேசிய விவசாயிகள் சங்கத்தைச் சேர்ந்த பொன்னுசாமி, பாசன விவசாயிகள் சங்கத் தலைவர் காசியண்ணன் ஆகியோர் கர்நாடக விவசாயிகள் சங்கத்தினர் மற்றும் கர்நாடக முதல்வரை சந்தித்துப் பேச்சுவார்த்தை நடத்தித் திரும்பியுள்ளனர்.

இந்தச் சந்திப்பு குறித்துப் பேசிய கு.செல்லமுத்து, “கர்நாடக விவசாயச் சங்கத்தினருடன் நடந்த பேச்சுவார்த்தையின்போது, கர்நாடக விவசாய சங்கத்தைச் சேர்ந்த சிலர் ‘எங்களுக்குக் குடிக்கவே தண்ணி இல்லாதபோது உங்களுக்கு எப்படி பாசனத்துக்குத் திறக்க முடியும்?’ என்று பதிலளித்தனர். உடனே நாங்கள், டெல்டாவின் பரிதாப நிலைமையை எடுத்துச் சொன்னோம். உடனே, ‘தண்ணீர் கொடுப்பதில் எங்களுக்கு எந்தப் பிரச்னையும் இல்லை. அணைகளில் தண்ணீர் பற்றாக்குறையாக இருக்கிறது’ என்று மழுப்பிவிட்டனர். பிறகு, கர்நாடக விவசாய சங்கத் தலைவர் கோடிஅள்ளி சந்திரசேகருடன்ச் இணைந்து, கர்நாடக முதல்வரை சந்திக்கச் சென்றோம். முதல்வரைச் சந்திக்க 20 பேர் வருகிறோம் என்று ஒருவாரத்துக்கு முன்பே அனுமதி வாங்கியிருந்தும், 5 பேருக்கு மட்டும்தான் சந்திக்க அனுமதி என்று சொல்லிவிட்டனர். பிறகு நாங்கள் உள்ளே சென்றதும், ‘வாங்க... வாங்க’ என்று சிரித்த முகத்துடன் வரவேற்ற சித்தராமையா யாரையுமே உட்காரக்கூடச் சொல்லவில்லை.

‘உங்க முதல்வர் அம்மாதான் கோர்ட்ல கேஸ் போட்டிருக்கிறார்களே... கோர்ட்டில் கேஸ் நடந்துகொண்டிருக்கும்போது, நான் அதைப்பற்றிப் பேசினால் சரியாக இருக்குமா?’ என்று சிரித்துக்கொண்டே கேட்டார். அதற்கு நாங்கள், ‘அது அரசியல் ரீதியான, ராஜாங்க நடவடிக்கை. அதில், நாங்கள் தலையிடவில்லை. தண்ணீர் இல்லாமல் தமிழக விவசாயிகளின் வாழ்வாதாரம் பாதிக்கப்பட்டிருக்கிறது. அதை விவசாயிகள் என்ற முறையில் விவசாயக் குடும்பத்தைச் சேர்ந்த உங்களிடம் முறையிட வந்துள்ளோம். மனிதாபிமான அடிப்படையிலாவது தண்ணீர் திறக்க வேண்டும். சம்பா சாகுபடிக்காக 20 டி.எம்.சி அளவு தண்ணீர் உடனடியாகத் தேவை என்றோம். அதற்கு அவர், ‘நான்கு அணைகளிலும் சேர்த்து 51 டி.எம்.சி தண்ணீர்தான் இருக்கிறது. எதற்கும் அதிகாரிகளை ஆய்வு செய்யச் சொல்லி உங்களுக்குச் சொல்கிறேன். இப்போதைக்கு உள்ள தண்ணீர், எங்களுக்குக் குடிநீர்த் தேவையைப் பூர்த்திச் செய்வதற்கு வேண்டும். மழை வந்தால் நிச்சயம் தண்ணீர் திறக்கிறோம். மழை வருமென எதிர்பார்ப்போம்’ என்று சொல்லி ‘தண்ணீர் தரமுடியாது’ என்பதை சூசகமாகச் சொல்லிவிட்டார். நின்றுகொண்டே அவருடன் நடந்த பேச்சுவார்த்தை ஐந்து நிமிடங்களுக்குள் முடிந்துவிட்டது” என்ற செல்லமுத்து,

“தமிழக அரசு சட்டப்போராட்டம் நடத்துவது பாராட்டத்தக்கதுதான். ஆனால், அது விவசாயிகளுக்கு உடனடி பயனைத் தராது என்பதால்தான் இந்தச் சந்திப்பு ” என்றார்.
 

Do you like the story?

Please Appreciate the Author by clapping!

Editor’s Pick

மாதத்திற்கு 7 எக்ஸ்க்ளுசிவ் கட்டுரைகள் படிக்க லாகின் செய்யுங்கள்அனைத்து எக்ஸ்க்ளுசிவ் கட்டுரைகளையும் படிக்க சந்தா செய்யுங்கள்