பொதுத்துறை வங்கியான இந்தியன் வங்கி 2022-23-ம் நிதியாண்டின் கடைசி காலாண்டு முடிவை வெளியிட்டது. இதில் மார்ச் 31-ம் தேதியுடன் முடிவடைந்த காலாண்டில், இந்தியன் வங்கியின் முழுமையான நிகர லாபம் 47% உயர்ந்து ரூ.1,447.3 கோடியாக உள்ளது. கடந்த நிதியாண்டின் இதே காலாண்டில் இந்தியன் வங்கியின் நிகர லாபம் ரூ.984 கோடியாக இருந்தது.

இந்தியன் வங்கியின் நிகர வட்டி வருமானம், சம்பாதித்த வட்டிக்கும் செலவழிக்கப்பட்ட வட்டிக்கும் உள்ள வித்தியாசம், மதிப்பாய்வுக்கு உட்பட்ட காலாண்டில் 29.4 % அதிகரித்து ரூ. 5,508.3 கோடியாக உள்ளது. இது முந்தைய ஆண்டின் இதே காலத்தில் ரூ.4,255.2 கோடியாக இருந்தது குறிப்பிடத்தக்கது.

இந்தியன் வங்கியின் லாபம் அதிகரித்ததால், இயக்குநர் குழு முதலீட்டாளர்களுக்கு டிவிடெண்ட் வழங்க முடிவெடுத்தது. அதன்படி, இந்தியன் வங்கியின் வாரியம், 2022-23 நிதியாண்டில் ஒரு பங்குக்கு ரூ.8.60 டிவிடெண்ட் வழங்கப்படும் என்று தெரிவித்துள்ளது. இது வங்கியில் செலுத்தப்பட்ட பங்கு மூலதனத்தில் 86% ஆகும். இது முதலீட்டாளர்கள் மத்தியில் மகிழ்ச்சியை ஏற்படுத்தியுள்ளது.

இதுகுறித்து இந்தியன் வங்கியின் நிர்வாக இயக்குநரும், தலைமைச் செயல் அதிகாரியுமான சாந்திலால் ஜெயின் கூறுகையில், ``வாடிக்கையாளர்களின் தேவைகளை அறிந்து செயல்படும் இந்தியன் வங்கி ஊழியர்களின் புத்திசாலித்தனம் மற்றும் தொழில்நுட்பத்தை சரியாகப் பயன்படுத்தி அதன் மூலம் சேவை வழங்குவதே எங்களுடைய நோக்கம்'' என்று தெரிவித்தார்.