நிலையான வருமானம் கிடைக்க ஃபிக்ஸட் டெபாசிட் (Fixed deposit) வைத்திருப்பவர்களுக்குக் கிடைக்கும் வட்டி வருமானத்தில் இருந்து டிடிஎஸ் (TDS - Tax Deduction at source) பிடிக்கப்படும். இந்த தொகையை பிடிக்காமல் இருக்க இந்திய வருமான வரி சட்டம் 1961-ல் ஒரு ஆப்ஷனை வழங்கியுள்ளது.
இச்சட்டத்தின் 197A பிரிவில், 15G அல்லது 15H படிவத்தைப் பூர்த்தி செய்து வங்கியில் சமர்ப்பிக்கும் பட்சத்தில், அவர்களுக்கு டிடிஎஸ் வரி பிடிக்கமாட்டார்கள்.
தங்களின் வருமானம் அடிப்படை வருமான வரி வரம்புக்கு கீழ் இருக்கும்பட்சத்தில் 60 வயதுக்குக் கீழுள்ளவர்கள் ஃபிக்ஸட் டெபாசிட் வைத்திருப்பின் அவர்கள் 15G படிவத்தையும், 60 வயதைத் தாண்டியவர்கள் 15H படிவத்தையும் ஒவ்வொரு நிதியாண்டும் பூர்த்தி செய்து வங்கிக்கு வழங்க வேண்டும்.
இந்நிலையில், தனது வாடிக்கையாளரின் சேவையை எளிமையாக்க 15G மற்றும் 15H படிவங்களை வாட்ஸ்அப்பில் சமர்ப்பிப்பதற்கான வசதியை ஏற்படுத்தி இருக்கிறது, `யூனியன் பேங்க் ஆஃப் இந்தியா.'
யூனியன் பேங்க் ஆஃப் இந்தியாவின் வாடிக்கையாளர்கள், வங்கியில் பதிவு செய்யப்பட்ட தங்களது மொபைல் எண்ணிலிருந்து, வங்கியின் வாட்ஸ்அப் எண்ணான 09666606060-க்கு செய்தியை அனுப்ப வேண்டும்.
அதன்பின் வங்கியின் யூனியன் விர்ச்சுவல் கனெக்ட் வாட்ஸ்அப் சேனல் (UVConn) மூலமாக 7 வெவ்வேறு மொழிகளில் சேவைகள் வழங்கப்படும். இதில் உங்களுக்கான மொழியை தேர்வு செய்து கொள்ளலாம்.
60 வயதுக்கு மேற்பட்டவர்கள் 15H படிவத்தையும், 60 வயதுக்குக் கீழுள்ளவர்கள் 15G படிவத்தையும் சமர்ப்பித்து, டிடிஎஸ் பிடித்தத்தில் இருந்து விலக்கு கோரலாம்.
முதியவர்களுக்கு இந்த அறிவிப்பு மகிழ்ச்சியை ஏற்படுத்தி இருக்கிறது. இனி எவ்வித அலைச்சலும் இல்லாமல், தங்கள் மொபைலில் இருந்தே டி.டி.எஸ் பிடிக்காமல் இருக்க இவர்கள் விண்ணப்பிக்கலாம். இருந்தாலும் ஆன்லைன் ஃபிராடுகள் குறித்தும் மக்கள் உஷாராக இருக்க வேண்டும்.