பணத் தேவை அதிகரிக்க அதிகரிக்க அதனை நல்ல முறையில் முதலீடு செய்து இலாபம் ஈட்டும் வழிமுறைகளைத் தேடும் மக்களின் எண்ணிக்கையும் அதிகரிக்கும். SIP என்னும் மியூச்சுவல் ஃபண்ட் முதலீட்டு முறை தற்போது பிரபலமடைந்து வருகிறது. சிறிய தொகையை முதலீடு செய்தாலே நல்ல ரிடர்ன்ஸ் பெறலாம் என்றும் கூறப்படுகிறது. SIP என்றால் என்ன என்பது குறித்துத் தெரிந்து கொள்ள வேண்டும் என்ற ஆர்வம் நிறையப் பேருக்கு இருக்கிறது. அதே போல் இது குறித்துத் தெரிந்து கொள்ள நம் வாசகர் ஒருவருக்கும் ஆர்வம் எழுந்திருக்கிறது. அதனை மேற்கூறிய கேள்வியாக நமது டவுட் ஆஃப் காமன் மேன் பக்கத்தில் கேட்டிருந்தார்.

நம் வாசகரின் கேள்விக்கான பதிலைத் தெரிந்து கொள்ள ஃபினான்ஸ் பிளானர் சுரேஷ் பார்த்தசாரதியிடம் பேசினோம். அவர் அளித்த விளக்கம் பின்வருமாறு.

இதேமாதிரி வாசகர்கள் கேட்ட கேள்விகளின் அடிப்படையில் எழுதப்பட்ட சிறப்புக் கட்டுரைகளை வாசிக்க... இங்கே க்ளிக் செய்யவும்

SIP என்றால் என்ன?

“Systematic Investment Plan என்பதன் சுருக்கமே SIP எனப்படுகிறது. இது மியூச்சுவல் ஃபண்ட்களில் ஒரு குறிப்பிட்ட தொகையை படிப்படியாக, மாதாந்திர அல்லது காலாண்டுக்கு ஒருமுறை முதலீடு செய்யும் முறை.

தொடர்ச்சியான வைப்புத் தொகையை (recurring deposit) போலவே, ஒரு முதலீட்டாளர் நிலையான கால இடைவெளியில் (மாதாந்திர அல்லது காலாண்டு) SIP மூலம் முதலீடு செய்யலாம். மாதத்திற்கு ரூ.100க்கு கூட மியூச்சுவல் ஃபண்ட் திட்டத்தில் எஸ்ஐபி மூலம் முதலீடு செய்யத் தொடங்கலாம். தொடர்ச்சியான வைப்புத்தொகையில் 6-7% ரிடர்ன்ஸ் கிடைக்கும். SIP-இல் சந்தை நிலவரத்தைப் பொருத்து 12% வரை அல்லது அதற்கு மேலும் கூட கிடைக்க வாய்ப்பு இருக்கிறது. SIP-இல் முதலீடு செய்வதால் பல நன்மைகள் உள்ளன.

ஒரு குறிப்பிட்ட மியூச்சுவல் ஃபண்டில் தொடர்ந்து முறையில் முதலீடு செய்து வந்தீர்கள் என்றால், உங்கள் வட்டிக்கு வட்டி கிடைக்கும். நீண்ட கால முதலீடுகளில் இது மிகவும் பயனுள்ளதாக இருக்கும்.

ரூபாய் செலவு சராசரி என்னும் Rupee Cost Averaging-ன் படி நீங்கள் குறிப்பிட்ட தொகையைத் தொடர்ந்து முதலீடு செய்து வருகிறீர்கள். எத்தனை பங்குகள் வாங்க முடியும் என்பது நிகர சொத்து மதிப்பு அல்லது NAV (Net Asset Value)-வைப் பொருத்து மாறும். இதன்படி, சந்தையில் பங்குகளின் விலை ஏறும்போது நீங்கள் குறைந்த அளவில் பங்குகளும், பங்குகளின் விலை குறையும்போது அதிக பங்குகளும் வாங்குவது சாத்தியமாகிறது.” என்றார்.

இதேமாதிரி உங்களுக்குத் தோணும் கேள்விகள், சந்தேகங்களை இங்கே கிளிக் செய்து பதிவு செய்யுங்க!

பாதுகாப்பாகவும் இலாபம் தரும்படியும் முதலீடு செய்வது எப்படி?

“முதலில் நீங்கள் உங்கள் வங்கிக்குச் சென்று KYC (Know Your Customer) சரிபார்க்க வேண்டும். இந்தியப் பங்குகள் மற்றும் பரிவர்த்தனை வாரியத்தின் (SEBI) விதிமுறைகளின்படி KYC சரிபார்ப்பை மேற்கொள்வது கட்டாயமாகும், இது இல்லாமல் நீங்கள் மியூச்சுவல் ஃபண்ட்களில் முதலீடு செய்ய முடியாது.

SIP-ல் முதலீடு செய்யும் முன் கவனிக்கவேண்டிய சில விஷயங்கள் உண்டு. உங்கள் நிதி இலக்குகளைச் சரியாகத் திட்டமிட்டு, ஒவ்வொரு இலக்கையும் ஒரு குறிப்பிட்ட தொகை மற்றும் அவற்றை அடைய எத்தனை ஆண்டுகள் ஆகும் என்பதை அடையாளம் கண்டு அதற்கேற்றவாறு SIP-ல் முதலீடு செய்வது முக்கியம். வீடு வாங்குவது, ஓய்வு பெறுவது போன்ற குறிக்கோள்களுக்கு SIP-ல் இருந்து கிடைக்கும் இலாபம் கைகொடுக்கும்.

எத்தனை ஆண்டுகளுக்குப் பிறகு ரிடர்ன்ஸ் வேண்டும் எனத் தெளிவாக முடிவு செய்து கொள்ள வேண்டும். அதே போல் கடந்த 5-10 வருடங்களில் அதிக இலாபம் கொடுத்த பங்குகள் குறித்து அறிந்து முதலீடு செய்ய வேண்டும். SIP சந்தை நிலவரங்களால் பாதிப்புக்கு உள்ளாகக் கூடியது என்றாலும் நீண்ட கால முதலீடுகளில் பெரும்பாலும் இலாபத்தையே அளிக்கும்.” என விளக்கினார் சுரேஷ்.

இதேமாதிரி உங்களுக்குத் தோணும் கேள்விகள், சந்தேகங்களை கீழே பதிவு செய்யுங்க!