நடப்பு
Published:Updated:

பி.பி.எஃப் முதலீடு... ஏன் அவசியம் தேவை?

பி.பி.எஃப் முதலீடு... ஏன் அவசியம் தேவை?
பிரீமியம் ஸ்டோரி
News
பி.பி.எஃப் முதலீடு... ஏன் அவசியம் தேவை?

பி.பி.எஃப் முதலீடு... ஏன் அவசியம் தேவை?

தொழிலாளர்கள் மற்றும் பணியாளர்களின் எதிர்கால நலனைக் கருத்தில்கொண்டு தொழிலாளர் வருங்கால வைப்பு நிதி (இ.பி.எஃப்) திட்டம் ஒருபக்கம் செயல்பட்டு வந்தாலும், அமைப்பு சாராத தொழிலாளர்கள் மற்றும் சுயதொழில் புரிபவர்களின் எதிர்கால நலனையும் கருத்தில்கொண்டு அரசு கொண்டுவந்த திட்டம்தான் பொது வருங்கால வைப்பு நிதி (பி.பி.எஃப்) திட்டம் ஆகும். நிறுவனங்களில் பணியாற்றாத மற்ற வருவாய் ஈட்டும் பிரிவினர் மற்றும் பொதுமக்கள் யார் வேண்டுமானாலும், தங்களது வருங்காலப் பாதுகாப்பு நிதியை உருவாக்க பி.பி.எஃப் (Public Provident Fund - PPF) திட்டத்தில் சேரலாம். இந்தத் திட்டம், இந்திய அரசாங்கத்தின் கட்டுப்பாட்டில், அதிக வட்டியுடன், வரி இல்லாமல் சிறந்த லாபத்தை அளிப்பதாக உள்ளது. 

பி.பி.எஃப் முதலீடு... ஏன் அவசியம் தேவை?

கணக்குத் தொடங்குவது எப்படி?

இந்த பி.பி.எஃப் கணக்கில், வருடத்திற்குக் குறைந்தபட்சம் ரூ.500 ரூபாய் முதல் அதிகபட்சம் ரூ.1,50,000 வரையிலான தவணை யுடன் முதலீட்டைத் தொடரலாம். பணத்தை ஆண்டுக்கு அதிகபட்சமாக 12 தவணையில் செலுத்தலாம். அதிகபட்சமாக 15 ஆண்டுகள் வரை இந்தத் திட்டத்தில் பணத்தைச் சேமிக்க இயலும்.

இந்தத் திட்டத்தின்கீழ் நீங்கள் சேமிக்கும் பணத்திற்கு தற்போது 7.6% வட்டி வழங்கப்படுகிறது. மேலும், இதன்மூலம் நீங்கள் பெறும் லாபத்திற்குப் பிரிவு 80சி-ன்கீழ் வரி ஏதும் விதிக்கப்படாது.

ஒருவேளை, ஏதேனும் ஒரு வருடம் உங்களது கணக்கில் ரூ.500 செலுத்தமுடியாமல் போனால், ரூ.50 அபராதம் செலுத்த வேண்டிவரும். அதேசமயம், இந்தக் கணக்கில் ஆண்டுக்கு ரூ.1.5 லட்சத்துக்கும் அதிகமாகச் சேமிக்கவும் தடை இல்லை. ஆனால், கூடுதலாகச் சேமிக்கப்படும் தொகைக்கு எவ்வித வட்டியும் வழங்கப்படாது.

இந்தத் திட்டத்தில் மேற்கூறிய பிரிவினர் மட்டுமல்லாது, நிறுவனங்களில் பணியாற்றிக்கொண்டு தொழிலாளர் வருங்கால வைப்பு நிதி (இ.பி.எஃப்) திட்டத்தில் இணைந் திருக்கும் சம்பளதாரர்கள்கூடச் சேரலாம். இப்போதைக்கு வங்கிச் சேமிப்பு மற்றும் வைப்பு நிதித் திட்டங்களில் அளிக்கப்படும் வட்டியைவிடக் கூடுதலாகக் கிடைக்கிறது. அதேசமயம், முதலீட்டுக்குப் பாதுகாப்பு இருக்கும் சேமிப்புத் திட்டங்களில் மிகச் சிறந்த திட்டமாக பி.பி.எஃப் திட்டம் உள்ளது.

வரிவிலக்குக்குப் பயன்

இ.பி.எஃப் திட்டமும் பி.பி.எஃப் திட்டமும் ஒரே விதமான கட்டமைப்பைக்கொண்டிருந்தாலும், பி.பி.எஃப் திட்டத்தில், சேமிக்கும் தொகை எவ்வளவு என்பதை நமது விருப்பத்துக் கேற்ப முடிவு செய்யும் வாய்ப்புள்ளது. சம்பளதாரர்கள் ஏற்கெனவே இ.பி.எஃப் திட்டத்தில் இருப்பதால், அவர்கள் தனியாக பி.பி.எஃப் திட்டத்தில் சேர வேண்டிய அவசிய மில்லை. தங்களது இ.பி.எஃப் திட்டம்மூலமே, சேமிக்க விரும்பும் தொகையை பணியாற்றும் நிறுவனத்தின் கணக்காளர் மூலம் பிடித்தம் செய்யச் சொல்லலாம். அதே சமயம், இவ்வாறு பிடித்தம் செய்யப்பட்டு பணியாளரின் இ.பி.எஃப் கணக்கில் சேர்க்கப்படும் தொகைக்கு நிறுவனத்தின் பங்களிப்பு எதுவும் இருக்காது.

கணக்கை எங்கு தொடங்குவது?

ஸ்டேட் பேங்க் ஆஃப் இந்தியா, ஐ.சி.ஐ.சி.ஐ வங்கி,     பி.என்.பி போன்ற அதற்கென நியமிக்கப்பட்ட வங்கிகளில், எந்தெந்தக் கிளைகளில் அதற்கான வசதி உள்ளது என்பதை அந்தந்த வங்கிகளின் இணையதளத்தைப் பார்த்தோ அல்லது சம்பந்தப்பட்ட வங்கிக் கிளை ஒன்றுக்கே நேரடி யாகச் சென்றோ தெரிந்துகொண்டு கணக்கைத் தொடங்க லாம். மேலும், தபால் அலுவலகங்களிலும் தொடங்கலாம்.

ஒரு சில வங்கிகள் அவர்களது இணையதளத்திலேயே இந்தக் கணக்கைத் தொடங்குவதற்கான வசதியைக் கொண்டுள்ளதால், அதனைப் பயன்படுத்திக்கொள்ளலாம். சில வங்கிகள், தங்களிடம் கணக்கு வைத்துள்ள வாடிக்கை யாளர்களுக்கு இணையதளம் மூலம் பி.பி.எஃப் கணக்கைத் தொடங்கும் வசதியைக் கொடுக்கின்றன. மேலும், தபால் அலுவலகத்திலிருந்து வங்கிக்கோ அல்லது வங்கியிலிருந்து தபால் அலுவலகத்துக்கோ பி.பி.எஃப் கணக்கை மாற்றிக் கொள்ளும் வசதியும் உள்ளது.

தேவையான ஆவணங்கள்

* முழுமையாக நிரப்பப்பட்ட பி.பி.எஃப் படிவம்

* அடையாளச் சான்று: டிரைவிங் லைசென்ஸ், பான் அட்டை, பாஸ்போர்ட் மற்றும் வாக்காளர் அடையாள அட்டை போன்ற ஏதாவது ஒன்று

* வீடு மற்றும் நடப்பு முகவரிக்கான சான்று

* சமீபத்திய பாஸ்போர்ட் அளவு புகைப்படங்கள் இரண்டு

திரும்ப எடுக்க முடியாது

இதில் முக்கியமான விஷயம் என்ன வெனில், இதில் முதலீடு செய்யப்படும் பணம் 15 ஆண்டுகள் இடையில் எடுக்க முடியாது. ஆனால், இடைப்பட்ட காலத்தில் சில தேவைகளுக்காக குறிப்பிட்ட தொகையைக் கடனாகப் பெறலாம். 

கணக்கை எப்படி முடிப்பது?

முதலீட்டாளர் வங்கி/தபால் அலுவலகத்தில் தனது பி.பி.எஃப் கணக்கை முடித்துக்கொள்வதற்கான விண்ணப்பத்தைக் கொடுத்து, அதில் தனது பி.பி.எஃப் கணக்கு எண், பணத்தைப் பெற்றுக்கொள்வதற்கான வங்கிக் கணக்கு எண் உள்ளிட்ட விவரங்களைக் குறிப்பிட வேண்டும்.

கவனிக்க வேண்டிய விஷயங்கள்

* நடப்பில் இருக்கும் பி.பி.எஃப் கணக்கை முடித்தபின்னர்தான், புதிதாக இன்னொரு பி.பி.எஃப் கணக்கைத் தொடங்க முடியும்.

* பி.பி.எஃப் கணக்கை முதலீட்டுடன் நீட்டிப்பதற்கான ஹெச் (H) படிவத்தை ஒருவர் ஒருமுறை சமர்பித்துவிட்டால், ஐந்து ஆண்டு கால நீட்டிப்புத் தொடங்கும்போது அந்த நபரின் கணக்கில் எவ்வளவு தொகை இருந்ததோ, அதில் 60 சதவிகிதப் பணத்தை மட்டுமே எடுக்க முடியும்.

பி.பி.எஃப் கணக்கு இதுவரை இல்லாதவர்கள் இந்தக் கணக்கினைத் தொடங்குவது நல்லது!

 -பா.முகிலன்

முதலீடு இல்லாமலே பிபிஎஃப் கணக்கை நீடிக்கலாம்!

ரு முதலீட்டாளர், 15 ஆண்டு காலத்துக்குப் பின்னரும் தனது கணக்கை முடித்துப் பணத்தைத் திரும்ப எடுக்கா விட்டால், அந்தக் கணக்கு தானாகவே இன்னொரு ஐந்து  ஆண்டு காலத்துக்கு நீட்டிப்புக்குள்ளாகும். அதேசமயம், பி.பி.எஃப் கணக்கில் உள்ள தொகைக்கேற்ற வட்டித் தொகையை முதலீட்டாளர் தொடர்ந்து பெறத் தொடங்கி விடுவார். ஆனால், அந்த முதலீட்டாளர் தனது கணக்கில் புதிதாக எந்த முதலீட்டையும் செய்ய முடியாது.

முதிர்வுக் காலத்துக்குப்பின்னரும் முதலீட்டாளர் தனது பிபிஎஃப் கணக்கில்  தொடர்ந்து முதலீடு செய்ய விரும்பி னால், அவர் வங்கி அல்லது தபால் அலுவலகத்தில், முதிர்வுத் தேதியிலிருந்து ஓராண்டு முடியும்முன்னர் ஹெச் (H) படிவத்தைச் சமர்ப்பிக்க வேண்டும். இந்த முறையைத் தேர்வு செய்தபின்னர் முதலீட்டாளர் தொடர்ந்து தனது கணக்கில் மேலும் முதலீடு செய்து, 80சி பிரிவின்கீழ் வருமான வரி விலக்குப் பயனைத் தொடர்ந்து பெறலாம்.