நாணயம் ஜாப்: பள்ளி To கல்லூரி!

பிளஸ் டூ ரிசல்ட் வந்து கல்லூரியில் சேரத் தயாராக இருக்கிறார்கள் மாணவர்கள். கல்லூரியில் இவர்கள் படிக்கப் போகும் அடுத்த மூன்று, நான்கு ஆண்டுகள்தான் அவர்களின் எதிர்கால பணி வாழ்க்கையை நிர்ணயம் செய்யப் போகிறது. பள்ளியிலிருந்து கல்லூரிக்கு வரும் மாணவர்கள் தங்கள் மனநிலையை எப்படி மாற்றிக்கொள்ள வேண்டும் என்று சொல்கிறார் கோவை பாரதியார் பல்கலைக்கழகத்தின் மேலாண்மை மற்றும் தொழில் முனைவோர் துறையகத்தின் இயக்குநர் பேராசிரியர் வேங்கடபதி.

''கல்லூரி படிப்பை ஆரம்பிக்கும் மாணவர்களுக்குப் பெரும் குழப்பமே அடுத்து என்ன படிப்பைத் தேர்வு செய்வது என்பதுதான். இந்த விஷயத்தில் மற்றவர்கள் வற்புறுத்துகிறார்கள் என்பதற்காக படிப்பைத் தேர்வு செய்யாமல், அவர்களுக்கு விருப்பமான, ஆர்வமுள்ள படிப்பைத் தேர்வு செய்வது அவசியம்.  

கல்லூரிப் படிப்புக்காக வெளியூரிலோ, வெளி மாநிலத்திலோ சென்று படிக்க வேண்டிய கட்டாயம் ஏற்படலாம். இது போன்ற சமயங்களில்,  சுற்றுப்புறச் சூழ்நிலைக்குத் தக்கவாறு அவர்களின் மனநிலையை மாற்றிக்கொள்ள வேண்டும்.

பள்ளிப் படிப்பில் பாடங்கள் குறைவு. கல்லூரியில் பாடங்கள் அதிகம். எனவே, ஜாலி மனநிலைக்கு டாட்டா காட்டிவிட்டு, கல்லூரி பருவத்திற்கு ஏற்ற மனநிலைக்கு மாறுவது அவசியம்.

* கல்லூரியில் வெறும் பாடப் புத்தகத்தை மட்டும் படிக்காமல், நடைமுறை வாழ்க்கையில் இருக்கும் அத்தனை விஷயங்களையும் படிப்பது அவசியம்'' என்று முடித்தார் பேராசிரியர் வேங்கடபதி.

பள்ளி மனநிலையை கல்லூரியின் தேவைக்கேற்ப மாற்றிக் கொண்டாலே போதும், வெற்றி நூறு சதவிகிதம் உறுதி!

- செ.கார்த்திகேயன்,
படம்: வி.ராஜேஷ்