வருமான வரிச் சலுகை, வருமான வரி அனுகூலம்... என்ன வித்தியாசம்?

வருமான வரி அனுகூலம்...

ஃபிக்ஸட் டெபாசிட்டைப் (எஃ.டி) பொறுத்தவரை, அதன் மூலம் கிடைக்கும் வட்டி வருமானத்துக்கு வரி கட்ட வேண்டும். இதில், முதலீட்டை எத்தனை ஆண்டுகள் வைத்திருந்தாலும் வரிச் சலுகை கிடையாது. அதாவது, ஃபிக்ஸட் டெபா சிட்டுகள் மூலம் கிடைக்கும் வட்டி வருமானத்துக்கு, முதலீட்டை எத்தனை ஆண்டுகள் தொடர்ந்தாலும் ஒருவர் எந்த வருமான வரி வரம்பில் வருகிறாரோ, (பழைய வரி முறையில் 5%, 20% மற்றும் 30%) அதற்கேற்ப அவர் வருமான வரியைக் கட்ட வேண்டும். இதை வருமான வரி அனுகூலம் இல்லாத முதலீடு என்பார்கள்.

எஃப்.டி மூலம் கிடைக்கும் வட்டி வருமானத்துக்கு ஆண்டுதோறும் வருமான வரியைக் கட்ட வேண்டும். உதாரணமாக, ஒருவர் ரூ.1 லட்சம் ரூபாயை 10% வட்டி வருமானம் தரும் எஃப்.டி-யில் முதலீடு செய்கிறார் எனில், அவருக்கு ஓராண்டில் ரூ.10,000 வட்டி வருமானமாகக் கிடைக்கும். அவர் 30% வருமான வரி வரம்பில் வந்தால், ரூ.3,000 வருமான வரியாகக் கட்ட வேண்டும். இப்படியே ஒவ்வோர் ஆண்டும் வட்டி வருமானத்துக்கு அவர் வருமான வரியைக் கட்ட வேண்டும். மூன்றாண்டுகளில் மொத்தம் ரூ.9,000 வருமான வரியாகக் கட்டியிருப்பார்.

இதுவே அவர் கடன் சந்தை சார்ந்த மியூச்சுவல் ஃபண்டில் ரூ.1 லட்சம் முதலீடு செய்திருக்கிறார் என வைத்துக்கொள்வோம். 10% வருமானத்தில் மூன்றாண்டுகள் கழித்து அவருக்கு ரூ.33,100 வருமானம் கிடைக்கும். மூன்றாண்டுகளில் சராசரி பணவீக்க விகிதம் 7% என்று வைத்துக்கொள்வோம். கடன் ஃபண்டுகளைப் பொறுத்தவரை, மூன்றாண்டு கழித்து யூனிட்டுகளை விற்று லாபம் பார்க்கும்போது நீண்ட கால மூலதன ஆதாய வரி (Long Term Capital Gains Tax-LTCG) கட்ட வேண்டும். அதாவது, லாபத்தில் பணவீக்க சரிக்கட்டலுக்குப் பிறகு 20% வருமான வரியைக் கட்டினால் போதும். (மத்திய அரசு ஒவ்வோர் ஆண்டும் விலைவாசி குறியீட்டை (Cost Index) அறிவிக்கும். அதன் அடிப்படையில்தான் பணவீக்க விகித சரிக்கட்டலை மேற்கொள்ள வேண்டும்.)

அந்த வகையில் நீண்ட கால மூலதன ஆதாயமான ரூ.33,100-ல் ஆண்டுக்கு 7% (மூன்றாண்டு மொத்த பணவீக்கம் 21%) என்பது ரூ.6,951 ஆகும். மீதி உள்ள ரூ.26,149-ல் 20% என்பது ரூ.5,230 ஆகும். இந்த 5,230 ரூபாய்தான் வரி. அதாவது, ஃபிக்ஸட் டெபாசிட்டுக்கான வருமான வரியைவிட ரூ.3,770 குறைவாகும். இங்கே ஒரே முதலீட்டுத் தொகை, ஒரே வருமானம், ஒரே முதலீட்டுக் காலம். ஆனால், கட்டும் வருமான வரிகுறைவு. இதைத்தான் வருமான வரி அனுகூலம் என்று சொல்கிறோம்.

இதேபோல், நிறுவனப் பங்குகள் மற்றும் பங்குச் சந்தை சார்ந்த மியூச்சுவல் ஃபண்டுகளும் வருமான வரி அனுகூலம் கொண்டவை ஆகும். அவற்றில் ஓராண்டுக்கு மேற்பட்ட முதலீட்டுக்குக் கிடைக்கும் நீண்ட கால ஆதாயத்துக்கு ரூ.1 லட்சம் வரைக்கும் வருமான வரி கிடையாது. அதற்கு மேற்பட்டு கிடைக்கும் லாபத்துக்கு 10% வரி கட்டினால் போதும்.

வருமான வரிச் சலுகை, வருமான வரி அனுகூலம் - இந்த இரண்டு இடையே இருந்த குழப்பம் நீங்கியதா?