பிள்ளையார் அவதாரங்கள் !

பி.சந்திரமெளலி

பிள்ளையாரின் அவதாரங்கள் குறித்து பார்க்கவ புராணம் விரிவாக விளக்குகிறது. அனுக்கிரகம் நிறைந்த ஆனைமுகனின் அந்த அவதாரங்களும், அவற்றுக்கான  காரணங்களும் இங்கே உங்களுக்காக...

வக்ரதுண்டர்: காசியை துராசுரன் என்ற கொடுங்கோல் மன்னன் ஆண்டுவந்தான். அவனை அழிக்க சக்திதேவியை நோக்கி தேவர்கள் தவமிருந்தனர். அதனால் மனமிரங்கிய சக்தி, வக்ரதுண்ட விநாயகரைத் தோற்றுவித்தாள். சிம்ம வாகனத்தில் எழுந்தருளிய வக்ரதுண்டர் துராசுரனை அழித்து அருள்புரிந்தார்.

சிந்தாமணி கணபதி: அபிஜித் என்ற அசுரனுக் கும் குணவதிக்கும் இறையருளால் பிறந்த கணன் என்பவன், கபிலரை துன்புறுத்தி அவரிடம் இருந்த சிந்தாமணியைக் கவர்ந்தான். இதனால் வருந்திய கபிலர் விநாயகரை மனமுருகி வழிபட்டார். அவருக்கு அருள்புரிய திருவுளம் கொண்ட பிள்ளையார், கணனை அழித்து சிந்தாமணியை மீட்டுக் கொடுத்தார்.

கஜானனர்: பார்வதி  பரமேஸ்வரரிடம் அவதாரம் செய்து கஜமுகாசுரனைக் கொன்ற விநாயகரை கஜானனர் எனப் புராணங்கள் போற்றிப் புகழ்கின்றன.

விக்ன விநாயகர்: வரேண்யன்  புஷ்பவதி என்ற தம்பதியரிடம் தோன்றி விக்னங்களை அகற்றியவர் விக்ன விநாயகர். இவர், வரேண்யன் என்பவனுக்கு உபதேசித்ததே கணபதி கீதை ஆயிற்று.

மயூரேச கணபதி: சங்கடஹர சதுர்த்தி விரதம் கடைப்பிடித்து வழிபட்ட பார்வதிதேவியிடம் அவதரித்து, மயில் வடிவினனான ஸிந்து என்ற அசுரனை அழித்து, அவனையே வாகனமாகக் கொண்டவர் இந்த விநாயகர்.

பாலசந்திரர்: தேவர்களை அடக்கியாண்ட அநலன் என்ற அசுரனை விநாயகர் விழுங்கி னார். அதனால் உண்டான வெம்மை நீங்க, மிக குளிர்ச்சியான சந்திரனை நெற்றியில் அணிந்து பாலசந்திரர் என்று பெயர் பெற்றார்.

தூமகேது: புகை வடிவான அசுரன் ஒருவனை அழிப்பதற்காக அவதரித்தவர் தூமகேது விநாயகர். மாதவன், ஸுமுதா என்ற அரச தம்பதியருக்குப் பிள்ளையாகத் தோன்றி, தூம கேதுவை வதைத்தார் இந்த பிள்ளையார்.

கணேசர்: பலி என்னும் அரக்கனைக் கொல்ல கணங்களுக்குத் தலைவனாக வந்து வெற்றி கண்டதால் கணேசர் என்ற திருப்பெயர் பெற்றார் பிள்ளையார்.

கணபதி: பார்வதி பரமேஸ்வரர் யானையின் சித்திரத்தைப் பார்த்துக் களிக்கும்போது அவதரித்தவர் கணபதி.

மகோற்கடர்: காச்யப முனிவரின் பிரார்த்தனையால், அதிதியிடம் பிறந்தவர் மகோற்கடர். தேவாத்த நாராத்ரர்கள் இவரால் சம்ஹாரம் செய்யப்பட்டனர்.

துண்டி கணபதி: துராஸதன் என்ற அரக்கனை அழிக்க, உமையவளின் திருவருளால் அவதரித்தவர் துண்டி கணபதி.

வல்லப கணபதி: மரீசி முனிவரின் மகள் வல்லபையை மணந்து வல்லப கணபதி என்று பெயர் பெற்றார்.


புராணங்களும்  பிள்ளையாரும்!

விநாயகர் புராணத்தை முதன்முதலில் எழுதியவர் கச்சியப்பர்.

வரேண்ய மன்னனுக்கு கணபதி உபதேசித்தது 'கணேச கீதை!’

 விநாயகரின் முன் நிற்கும் துவார பாலகர்கள் வீமர், விகடர்.

கணேச மந்திரத்தைக் கண்டறிந்து சொன்னவர் கனக மகரிஷி.

 ராவணனை வெல்வதற்காக ராமன் வழிபட்ட விநாயக வடிவம் 'ஹேரம்ப கணபதி’.

 பிள்ளையாரைப் போன்ற உருவம் கொண்ட பக்தர், புருசுண்டி முனிவர்.

 மைத்திராயணி சம்ஹிதை 'அத்தி முகன் தந்தி’ என கணபதியைக் குறிப்பிடுகிறது.

 முத்கல புராணம் 32 வகை கணபதிகளைக் குறிப்பிடுகிறது.

'விஷ்வக் சேன சம்ஹிதை’ விநாயகரை நாராயணனின் அம்சம் என்கிறது.

 கயிலையின் ஒரு பகுதியான ஆனந்த புவனம் ஆனைமுகனின் இருப்பிடம்.

 சித்ரம், சித்ராத்தம், சித்ராபாசம் என்று விநாயகர் சிற்ப வடிவ வகைகள் மூன்றாகும்.

நந்தனாருக்காக பிள்ளையார் குளம் வெட்டிய திருத்தலம் திருப்புன்கூர்.

புத்தர் தம் சீடரான ஆனந்தருக்கு 'கணபதி ஹ்ருதய’ மந்திரத்தை உபதேசித்துள்ளார்.

எஸ்.ஸ்ருதி, சென்னை

 

Do you like the story?

Please Appreciate the Author by clapping!

Editor’s Pick