தூளி கட்டி வேண்டிக்கொண்டால் குழந்தை வரம் நிச்சயம்!

லைப்பகுதிக் கோயில்களுக்குச்  சென்று சுவாமி தரிசனம் செய்து வந்தாலே உடலும் மனமும் உற்சாகம் கொள்ளும், மன நிம்மதி  கிடைக்கும் என்பார்கள், நம் முன்னோர்கள். இத்தகைய தனித்துவ அம்சம் கொண்ட மலைப்பகுதிக் கோயில்தான் தேவதானம்பேட்டையில்  அருளாட்சி புரியும் வனதுர்கை அம்மன் கோயில்.

விழுப்புரம் மாவட்டம், செஞ்சியிலிருந்து சுமார் 20 கி.மீ. தொலைவில் அமைந்திருக்கிறது, தேவதானம்பேட்டை. இங்கிருந்து நடைப்பயணமாக மலையேறினால், சுமார் 6 கி.மீ. தூரத்தில் வன துர்கையைத் தரிசிக்கலாம். அப்படியொரு திருத்தலத்துக்குப் பயணப்பட்டோம்.

பாதையின் தொடக்கத்தில் படிகள் இருந்தாலும்,  தூரம் செல்லச் செல்ல கற்களும் பாறைகளுமாகவே இருப்பது கால்களுக்கு நல்ல பயிற்சியாக அமைந்தது.  அடிவாரத்தில் இருந்து மலை மீது செல்வதற்குச் சுமார் 2 மணி நேரம் ஆகும் என்பதால், பாட்டிலில் குடிநீர் எடுத்துக்கொண்டு கிளம்பினோம். ஒற்றையடிப் பாதையாக மலைகளைக் கடக்கநேரிட்டது. கோயிலைச் சென்றடைய வழியெங்கும் பாறைகள் மீது அம்புக் குறியிட்டுள்ளனர்.

மலையின் மேலே செல்லச்செல்ல குளிர்ந்த காற்று வீசியது மனதை லேசாக்கியது. கோயிலை நெருங்கியவுடன் வீசும் விபூதி வாசனை நம்மை பக்தி மணம் கமழச்செய்கிறது. மூச்சிரைக்க மலையேறினாலும், மேலே சென்று அம்மனின் திருமுகத்தைப் பார்த்ததும்  நாம் கடந்து வந்த தூரமோ, நமது களைப்போ நமக்குப் பெரிதாகத் தெரியவில்லை என்பது நிஜம். இங்கு வரும் பக்தர்களும், சில வெளிநாட்டவர்களும் இங்கேயே சில மணி  நேரம் தங்கி அம்மனைத் தரிசித்து  மூலிகைக் காற்றைச் சுவாசித்துச் செல்கின்றனர்.

தல வரலாறு:

முன்னொரு காலத்தில் காட்டுப்பேட்டை எனும் இப்பகுதியில் சிவபக்தர்களான  தம்பதியர், குழந்தைவரம் வேண்டிப் பிரார்த்தனை செய்துவந்தனர். அப்போது, இவ்வூரின் குளப் பகுதியில் கேட்பாரற்று ஒரு பெண் குழந்தை அழுதுகொண்டு இருக்கவே, அந்தத் தம்பதி, அது தங்களுக்கு இறைவன் கொடுத்த குழந்தையெனக் கருதி, எடுத்துச் சென்று வளர்க்க ஆரம்பித்தனர். பின்னர், அக்குழந்தை கன்னிப்பெண்ணாக வளர்ந்தாள்.

ஒருநாள், வீட்டின் தேவைக்காக அந்தப் பெண் நீர் எடுத்துவர, குளக்கரைக்குச் சென்றாள். அப்போது சிவபெருமான் மானுட ரூபத்தில் குளக்கரையில் தோன்றி, அக்கன்னிப்பெண்ணின் தெய்வாம்சத்தை அவளுக்கு உணர்த்தினார். அதனைக் கண்ட, அப்பகுதியைச் சார்ந்தவர்கள் வயது வந்த ஓர் ஆணுடன், கன்னிப்பெண் நெடுநேரம் பேசுகிறாள் எனத் தவறாகச் செய்தி பரப்பினர்.

இதனால் கோபமடைந்த அந்தப் பெண்ணின் வளர்ப்புத் தாய், தந்தையர் தங்கள் பெண்ணைக் கோபத்துடன் கண்டித்து, பெண்ணின் கற்பின் மீது சந்தேகம் கொண்டு வீட்டை விட்டு வெளியேற்றிவிட்டனர் .

Do you like the story?

Please Appreciate the Author by clapping!

Editor’s Pick

மாதத்திற்கு 7 எக்ஸ்க்ளுசிவ் கட்டுரைகள் படிக்க லாகின் செய்யுங்கள்அனைத்து எக்ஸ்க்ளுசிவ் கட்டுரைகளையும் படிக்க சந்தா செய்யுங்கள்