கிருஷ்ண பட்சணம்!

லட்சுமி ஸ்ரீநிவாசன்

வெண்ணெய்ப் பிரியனான கண்ணனுக்கு, முறுக்கும் சீடையும்கூட ரொம்பப் பிடிக்குமாம். இதற்கான சுவாரஸ்ய காரணங்களாக சில செவிவழித் தகவல்களைச் சொல்வார்கள்.

கண்ணனும் அவன் தோழர்களும் மட்பாண்டங்களை வைத்து விளையாடும்போது, பெரும்பாலும் அந்தப் பானைகள் உடைந்து போக, உடையாமல் திகழும் அவற்றின் வாய்ப்பகுதியை கைகளிலும் தோள்களிலும் வளையல்களாகவும் வீரக் கழல்களாகவும் அணிந்துகொண்டு விளையாடு வார்களாம். இதன் நினைவாகவே  ஜன்மாஷ்டமி தினத்தில் கண்ணனுக்கு முறுக்கு படைக்கப்படுகிறதாம். அதேபோல், சகோதரி தேவகி எட்டாவதாகக் கருவுற்று இருக்கிறாள் என்பதை அறிந்ததும், கம்சன் தன் பற்களை நறநறவென கடித்து கோபாவேசப்பட்டானாம். இதன் ஞாபகமாக சீடை செய்யப்படுகிறது என்பது ஒரு தகவல்.

எட்டாவது குழந்தையாவது தங்கியதே என்ற களிப்பில், கம்சனின் தங்கை பலகாரம் செய்து கொண்டாடியதாகவும், அதையொட்டியே கோகுலாஷ்டமி தினத்தில் நாமும் பட்சணங்கள் படைத்து, கண்ணனை வழிபடுகிறோம் என்பார்கள் பெரியோர்கள்.

சரி... வெண்ணெய், முறுக்கு, சீடை ஆகிய பட்சணங்கள் மட்டும்தான் கண்ணனுக்குப் பிடித்தமானவையா... இல்லை! பக்தர்கள் அன்போடு அளிக்கும் எதையும் மிகப் பிரியத்துடன் ஏற்றுக்கொள்வான் கண்ணன்.  நாமும், கோகுலாஷ்டமியில் நம் வீடு தேடி வரும் கண்ணனுக்கு அன்போடு சில பட்சணங்களைச் செய்து கொடுப்போமா?

Do you like the story?

Please Appreciate the Author by clapping!

Editor’s Pick