ரங்க ராஜ்ஜியம் - 9 | Srirangam: Spiritual history - Sakthi Vikatan | சக்தி விகடன்

வெளியிடப்பட்ட நேரம்: 06:00 (31/07/2018)

ரங்க ராஜ்ஜியம் - 9

இத்தொடரின் மற்ற பாகங்கள்:

இந்திரா சௌந்தர்ராஜன், ஓவியம்: ம.செ

யோத்தி அரண்மனையின் தர்பார் மண்டபம் திமிலோகமாய் காணப்பட்டது. நடுநாயகமாய் ரத்ன சிம்மாசனம். அருகில் இருபுறமும் இரண்டிரண்டாய் சிம்மாசனங்கள். அவற்றை அடுத்து வசிஷ்டர், வாமதேவர், ஜாபாலி, காஸ்யபர், காத்யாயனர், ஸ்ரீயக்ஞர், கௌதமர், விஜயர் ஆகிய அஷ்ட ரிஷிகளுக்கான ஆசனங்கள். அதுபோக மிதிலாபுரி ஜனங்களுக்கும், விபீஷண னுக்கும் பிரத்யேக ஆசனங்கள்.

இவை இப்படியென்றால், வெள்ளி மற்றும் தாமிரங்களால் ஆன பலதரப்பட்ட ஆசனங்களில் கோசலை, கைகேயி, சுமித்ரை உள்ளிட்ட ரவிகுல பந்துக்களும் சக ராஜ்ஜியாதிபதிகளும் அமர்ந் திருந்தனர். இவை போக, மண்டபத்தில் விரிக்கப் பட்டிருந்த ரத்தினக் கம்பளங்களில் அயோத்தி நகர வேத விற்பன்னர்கள் முதல் மகாஜனங்கள் வரை சகலரும் அமர்ந்திருந்தனர்.

அவர்கள் வரையிலும் இனிதான் ராம ராஜ்ஜியம் தொடங்கப்பட வேண்டும். இதுநாள் வரை பாதுகை ஆண்டது; இனி, பாதுகைக்கு உரியவனே ஆளப்போகிறான்.

அதற்கேற்ப ஸ்ரீராமன், சீதாபிராட்டி சகிதம் ராஜாங்கபூஷிதனாய், மரவுரியோடு தரித்திருந்த துவராடையை நீக்கி, பட்டும் பீதாம்பரமுமாய், பரிமள சுகந்தத்துடன், பரந்துவிரிந்த மார்பில் ரத்னஹாரம், முத்துவடகம் போன்ற ஆபரணங்கள் மின்னிட காட்சி தந்தான். அவன் கரம் பற்றி வந்த சீதை, பாற்கடலைவிட்டு மகாலட்சுமியானவள் அப்படியே எழுந்து வந்தது போல் லட்சுமிகரமாய் காட்சி தந்தாள். அவர்களுடன், ஒரு புறம் பரதனும், மறுபுறம் லட்சுமணனும், வெண்கொற்றக் குடை ஏந்திய வனாய் சத்ருக்னனும் வந்தார்கள்.

அந்தக் காட்சியால் மனம் கசிந்தவனாய் கண்களில் நீர் பனிக்க ‘ராம்... ராம்… ’ என்று உணர்ச்சி மேலிடக் குரல் கொடுத்தான் அனுமன். மக்கள் கூட்டம் அதை அப்படியே எதிரொலித்தது.

அதனூடே ராமன் சீதையுடன் ரத்தின சிம்மாசனத்தின் முன் நின்றிட, அருகில் லட்சு மணன், பரதன், சத்ருக்னன் நின்றிருக்க, ராமன் பணிவுடன் அவையோரை வணங்கினான். அப்படியே சீதையுடன் சென்று அஷ்ட ரிஷிகளை நெருங்கி அவர்கள் காலில் விழுந்து ஆசிபெற்றான்.

[X] Close

[X] Close