ரங்க ராஜ்ஜியம் - 21 | Ranga Rajyam: Spiritual history - Sakthi Vikatan | சக்தி விகடன்

ரங்க ராஜ்ஜியம் - 21

இத்தொடரின் மற்ற பாகங்கள்:
ஓவியம்: ம.செ

மெய்யில் வாழ்க்கையை மெய்யெனக் கொள்ளும், இவ்
வையந் தன்னொடும் கூடுவ தில்லையான்,
‘ஐயனே அரங்கா’ என்றழைக்கின்றேன்
மையல் கொண்டொழிந் தேனென்றன் மாலுக்கே!’

-பெருமாள் திருமொழி (3-ல்)
குலசேகராழ்வார்


கள் கமலவல்லியின் மாற்றத்தைக் கண்டு திகைத்துப்போனான் நந்தசோழன். மந்திரிமார்கள் கேட்ட கேள்விகளுக்கு கமலவல்லி அளித்த பதில்களோ, மன்னவனின் திகைப்பை மேலும் அதிகப்படுத்தின.

‘‘வழிபாடுகளின் பொருட்டு பசியும் பட்டினியும் கிடப்பது சரியா’’ என்றொருவர் கேட்க, ‘‘அமுதனைக் கண்டவள் என்பதால் என்னவோ பசியே இல்லை’’ என்று பதில் அளித்தாள்.

“இயற்கைக்கு மாறாக உள்ளதே தாங்கள் சொல்வது. அது எப்படி?” - என்று கேட்டார் இன்னொரு மந்திரி.

“சரியாகத்தான் கூறியுள்ளீர்! எனக்கு நேரிட்ட அனுபவம் இயற்கைக்கு மாறானதே. எல்லோருக்கும் நிகழக்கூடிய ஒன்றல்ல. ஆனால் இந்த அனுபவம், இதுவரை நான் வாழ்ந்தது வாழ்க்கையில்லை - இனி வாழப் போவதே வாழ்வென்று சொல்கிறது. அதற்கென்ன சொல்கிறீர்?”

அதிகம் பேசாத, நிமிர்ந்தும் பார்க்காத, பார்த்தாலும் தந்தையான நந்தசோழனையன்றி பிறரைப் பார்த்தேயறிந்திராத இளவரசியா இத்தனை தெளிவாக பதில் கூறுகிறாள் என்று அந்த மந்திரி மட்டுமல்ல, அனைவருமே ஆச்சரியப் பட்டனர்.

திருவரங்க ஆலயத்து வேதியரும் அப்போது அங்கு அழைத்துவரப் பட்டிருந்தார். நந்தசோழன் அவரை ஏறிட்டான். அவன் அப்படி ஏறிட்டுப் பார்த்ததே, ‘நடந்ததைக் கூறு’ என்பதுபோல் இருந்தது.

“சோழச் சக்ரவர்த்திக்கு அடியேன் அரங்க தாசனின் அனந்தமான வந்தனங்கள். இளவரசியார் அரங்கநாதப்பெருமானின் யௌவன கோலம் காணும் பேறு பெற்றுள்ளார். அதனால் எனக்கும் எம்பெருமானின் மேலாடை தரிசனம் வாய்த்தது. தேவியார் பெற்ற பேறு அவரின் முன்ஜன்ம வினை! எம்பெருமான் எதையோ உலகுக்கு உணர்த்த விரும்புகிறார் போலும். அதையொட்டியே இந்தச் சம்பவம் நடந்துள்ளதாய் பலரின் உள்ளம் கருதுகிறது” என்று பணிவாய்க் கூறி முடித்தார். நந்தசோழன் பதிலேதும் கூறாமல் எல்லோரையும் ஒரு பார்வை பார்த்தான்.

Do you like the story?

Please Appreciate the Author by clapping!

Editor’s Pick