Published:Updated:

புல்லுகட்டு உரசியதால் படுகொலை... சாதிவெறி தலைவிரித்தாடும் நெல்லை!

புல்லுகட்டு உரசியதால் படுகொலை... சாதிவெறி தலைவிரித்தாடும் நெல்லை!
பிரீமியம் ஸ்டோரி
News
புல்லுகட்டு உரசியதால் படுகொலை... சாதிவெறி தலைவிரித்தாடும் நெல்லை!

புல்லுகட்டு உரசியதால் படுகொலை... சாதிவெறி தலைவிரித்தாடும் நெல்லை!

சாதித் தீயின் கொடூரமும் வேகமும் இன்னும் முழுமையாக அகற்றப்படவில்லை என்பதன் அடையாளமாக இந்தியா முழுக்கவே அவ்வப்போது சாதியப் படுகொலைகள் அரங்கேறி வருகின்றன. நெல்லையில் நடந்திருக்கும் கோரக் கொலையில் பறிபோன அப்பாவி இளைஞரின் உயிர், அதை இன்னுமொரு முறை ரத்தமும் சதையுமாக நிரூபித்திருக்கிறது.

புல்லுகட்டு உரசியதால் படுகொலை... சாதிவெறி தலைவிரித்தாடும் நெல்லை!

நெல்லை புறநகர் பகுதியான கரையிருப்பு கிராமத்தைச் சேர்ந்தவர் அசோக். தனியார் டயர் கம்பெனியில் வேலை செய்துவந்தவர், இந்திய ஜனநாயக வாலிபர் சங்கத்தின் நெல்லை மாவட்டப் பொருளாளராகவும் செயல்பட்டு வந்தார். அசோக், அந்தப் பகுதி மக்களின் தேவைகளுக்காகவும் உரிமைகளுக்காகவும் குரல் கொடுத்து வந்துள்ளார்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
புல்லுகட்டு உரசியதால் படுகொலை... சாதிவெறி தலைவிரித்தாடும் நெல்லை!



இந்நிலையில், ஜூன் 12-ம் தேதி இரவுப் பணிக்குச் செல்வதற்காகப் பேருந்து நிறுத்தத்துக்கு வந்தார் அசோக். அப்போது அங்குப் பதுங்கியிருந்த கும்பல் ஒன்று அவரை ஓடஓட விரட்டி வெட்டிக் கொன்றதுடன், அவரது உடலை ரயில்வே தண்டவாளத்தில் வீசிவிட்டுத் தப்பிச் சென்றது. இந்தச் சம்பவத்தால் கொதித்துப் போன அசோக்கின் உறவினர்களும் சி.பி.எம் கட்சியினரும் சாலை மறியலில் ஈடுபட்டனர். அசோக்கின் உறவினர்கள் மற்றும் மார்க்சிஸ்ட் நிர்வாகிகளுடன் மாவட்ட நிர்வாகமும் காவல்துறை யும் நடத்திய பேச்சுவார்த்தைக்குப் பின்னர் சாலைமறியல் கைவிடப்பட்டு, அசோக்கின் உடல் அடக்கம் நடைபெற்றது. செங்கொடி போர்த்தியநிலையில், அசோக்கின் உடல் வைக்கப் பட்டிருந்த சவப்பெட்டியை இந்திய ஜனநாயக வாலிபர் சங்கத்தின் அகில இந்தியத் தலைவரான ரியாஸ் உள்ளிட்ட தோழர்கள் சுமந்து சென்றார்கள்.

புல்லுகட்டு உரசியதால் படுகொலை... சாதிவெறி தலைவிரித்தாடும் நெல்லை!

அசோக்கின் தாய் ஆவுடையம்மாள் பேசவே முடியாமல் கதறிக்கொண்டிருந்தார். நடந்த சம்பவத்தை நம்பவே முடியாத நிலையில், தந்தை முருகன் வெறித்துப் பார்த்த படியே இருந்தார். அவருக்கு ஆறுதல் சொல்லிவிட்டுப் பேசினோம். ‘‘எனக்கு மூன்று மகன்கள். மூன்று பேருமே மார்க்சிஸ்ட் கட்சியில் உறுப்பினர்களாக இருக்கிறார்கள். இரண்டாவது மகன் அசோக், ஊருக்குள் யாருக்கு என்ன பிரச்னை என்றாலும் ஓடோடி உதவி செய்வான். ஒரு வாரத்துக்கு முன் அம்மாவைக் கூட்டிக்கொண்டு வயலுக்குப் போயிருந்தான். மாட்டுக்குப் புல்லுக்கட்டு எடுத்துக்கொண்டு பைக்கில் வரும்போது பாதையில் சிலர் பேசிக்கொண்டிருந்தார்கள். அப்போது புல்லுக்கட்டின் நுனிப்பகுதி அவர்களில் ஒருவர்மீது உரசியிருக்கிறது. உடனே சாதியைச் சொல்லி அசிங்கமாகப் பேசியிருக்கிறார்கள். அதைத் தட்டிக்கேட்ட என் மனைவியை அடித்துவிட்டார்கள். என் மகன், போலீஸ் ஸ்டேஷனில் புகார் கொடுத்தான். அந்த ஆத்திரத்தில் என் பையனை அநியாயமாகக் கொன்றுவிட்டார்கள்’’ எனக் கதறினார்.

அசோக் படுகொலையைத் தமிழகத்தின் பெரும்பாலான அரசியல் கட்சிகள் கண்டித்துள்ளன. இந்திய கம்யூனிஸ்ட் கட்சியின் மாநிலச் செயலாளரான முத்தரசன், ‘‘பட்டியல் சமூக மக்களைப் பாதுகாக்கச் சட்டங்கள் இருந்தாலும் யதார்த்த வாழ்க்கையில் அவர்கள் எந்தப் பாதுகாப்பும் இல்லாதவர்களாகவே உள்ளனர். அதற்கு அசோக் கொலையே சாட்சி’’ என்றார். 

புல்லுகட்டு உரசியதால் படுகொலை... சாதிவெறி தலைவிரித்தாடும் நெல்லை!

மார்க்சிஸ்ட் மாநிலச் செயலாளரான கே.பாலகிருஷ்ணன், ‘‘தென் மாவட்டங்களில் ஆதிக்க சாதியினரால் பட்டியல் சமூகத்தினர் படுகொலை செய்யப்படும் சம்பவங்கள் தொடர்ச்சியாக நடக்கின்றன. அரசும் காவல்துறையும் இதைத் தடுத்து நிறுத்தி சமூக நல்லிணக்கத்தை ஏற்படுத்த உறுதியான நடவடிக்கை எடுக்க வேண்டும்’’ என வலியுறுத்தினார்.

தமிழகத்தில் கடந்த ஐந்து ஆண்டுகளில் 187 சாதி ஆணவப் படுகொலைகள் நடந்துள்ளதாக மனிதநேய மக்கள் கட்சித் தலைவரான பேராசிரியர் ஜவாஹிருல்லா அதிர்ச்சித் தகவல் தெரிவித்துள்ளார். மேலும் இவற்றைத் தடுக்கும் வகையில், சாதி ஆணவப் படுகொலைக்கு எதிராகத் தனிச் சட்டம் கொண்டுவர வேண்டும் என்றும் அவர் கேட்டுக்கொண்டார். 

புல்லுகட்டு உரசியதால் படுகொலை... சாதிவெறி தலைவிரித்தாடும் நெல்லை!

படுகொலை செய்யப்பட்ட அசோக் குறித்து நம்மிடம் பேசிய மார்க்சிஸ்ட் கட்சியின் நெல்லை மாவட்டச் செயலாளர் கே.ஜி.பாஸ்கரன், ‘‘கடந்த சில தினங்களுக்கு முன் அவருடைய தாயாரைத் தாக்கியவர்கள்மீது காவல்துறையில் புகார் செய்தார் அசோக். மிகுந்த அலட்சியப் போக்குடனேயே அந்தப் புகாரை போலீஸார் கையாண்டனர். ‘வன்கொடுமை தடுப்புச் சட்டத்தில் புகார் அளிப்பவருக்கு உரிய பாதுகாப்பு கொடுக்க வேண்டும். விரைந்து விசாரணை நடத்த வேண்டும்’ என்கிற வழிகாட்டுதல்களை போலீஸார் பின்பற்றவில்லை. அத்துடன் எதிர்த்தரப்பினர் அளித்த புகாரின்பேரில் அசோக்மீது வழக்குப்பதிவு செய்தார்கள். அவரது குடும்பத்துக்கு 50 லட்சம் ரூபாய் இழப்பீடு வழங்க வேண்டும். குடும்பத்தில் ஒருவருக்கு அரசு வேலை கொடுக்க வேண்டும். நெல்லை கரையிருப்புப் பகுதியை வன்கொடுமை அதிகரித்துள்ள மண்டலமாக அறிவித்துப் பாதுகாப்பு வழங்க வேண்டும் என்பது உள்ளிட்ட எட்டு கோரிக்கைகளை அரசுக்கு முன்வைத்துள்ளோம்’’ என்றார்.

காவல்துறையினரிடம் பேசினோம். ‘‘ஆறு பேரைக் கைது செய்து சிறையில் அடைத்துள் ளோம். தலைமறைவாக இருக்கும் இரு குற்றவாளிகளைப் பிடிக்க தனிப்படை அமைத்துள்ளோம். மாவட்ட நிர்வாகம், காவல்துறை, சமூக அமைப்புகளுடன் இணைந்து இந்தப் பகுதியில் ஒற்றுமையை ஏற்படுத்த நடவடிக்கை எடுக்கத் திட்ட மிட்டுள்ளோம்’’ என்றனர். 

- பி.ஆண்டனிராஜ்

படங்கள்: எல்.ராஜேந்திரன்